Hum se Mualla bin Asad ne bayan kiya , kaha hum se Wuhaib bin Khalid ne bayan kiya , in se Abdullah bin Taoos ne , in se in ke walid Taoos ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”logon ka hashr teen firqon mein ho ga (ek firqa wale) log raghbat karne neiz daraanay wale hon ge . (doosra firqa aise logon ka ho ga ke) ek oont par do aadmi sawar hon ge kisi oont par teen hon ge , kisi oont par chaar hon ge aur kisi par das hon ge . Aur baaqi logon ko aag jama kare gi (ahal e shirk ka yeh teesra firqa ho ga) jab woh qailula karein ge to aag bhi in ke saath thehri ho gi jab woh raat guzarein ge to aag bhi in ke saath wahan thehri ho gi jab woh subah karein ge to aag bhi subah ke waqt wahan maujood ho gi aur jab woh shaam karein ge to aag bhi shaam ke waqt in ke saath maujood ho gi .“

Hum se Abdullah bin Muhammad ne bayan kiya , kaha hum se Yunus bin Muhammad Baghdadi ne bayan kiya , kaha hum se Shayban Nahwi ne bayan kiya , kaha in se Qatadah ne , kaha hamase Anas bin Malik razi Allahu anhu ne bayan kiya ke ek sahabi ne kaha , Ae Allah ke Nabi! Qayamat mein kafiron ko in ke chehre ke bal kis tarah hashr kiya jaye ga . Nabi Karim salla Allahu alaihi wasallam ne farmaya ke woh zaat jis ne unhein duniya mein do paon par chalaya usay is par qudrat nahi hai ke Qayamat ke din unhein chehre ke bal chala de . Qatadah razi Allahu anhu ne kaha ke zaroor hai , hamare Rabb ki izzat ki qasam , beshak woh munh ke bal chala sakta hai .

Hum se Ali bin Abdullah Madini ne bayan kiya , kaha hum se Sufyan bin Uyaynah ne bayan kiya ke Amr bin Dinar ne kaha ke main ne Saeed bin Jubayr se suna , unhon ne Ibn Abbas razi Allahu anhuma se suna aur unhon ne Nabi Karim salla Allahu alaihi wasallam se suna , Aap salla Allahu alaihi wasallam ne farmaya ”tum Allah se Qayamat ke din nange paon , nange badan aur paidal chal kar bin khatna milo ge .“ Sufyan ne kaha ke yeh hadees in (nau ya das hadeeson) mein se hai jin ke mutalliq hum samajhte hain ke Ibn Abbas razi Allahu anhuma ne khud in ko Nabi Karim salla Allahu alaihi wasallam se suna .

Hum se Qutaybah bin Saeed ne bayan kiya , unhon ne kaha hum se Sufyan bin Uyaynah ne bayan kiya , in se Amr bin Dinar ne bayan kiya , in se Saeed bin Jubayr ne , in se Abdullah bin Abbas razi Allahu anhuma ne bayan kiya ke main ne Nabi Karim salla Allahu alaihi wasallam se suna ke Aap mimbar par khutba mein farma rahe thay ke tum Allah Ta'ala se is haal mein milo ge ke nange paon , nange jism aur baghair khatna ho ge .

Mujh se Muhammad bin Bashar ne bayan kiya , kaha hum se Ghundar ne bayan kiya , kaha hum se Shubah ne bayan kiya , in se Mugheera bin Nu-man ne bayan kiya , in se Saeed bin Jubayr ne , in se Ibn Abbas razi Allahu anhuma ne bayan kiya ke Nabi Karim salla Allahu alaihi wasallam hamain khutba dene ke liye khare huay aur farmaya ”tum log Qayamat ke din is haal mein jama kiye jao ge ke nange paon aur nange jism ho ge . Jaisa ke Allah Ta'ala ne farmaya «kamaa bada'naa awwala khalqin nueeduhoo» ke ”jis tarah hum ne shuru mein paida kiya tha isi tarah lauta dein ge .“ Aur tamam makhlooqat mein sab se pehle jise kapra pehnaya jaye ga woh Ibrahim alaihissalam hon ge aur meri ummat ke bahut se log laaye jayein ge jin ke aamal-name bayein hath mein hon ge . Main is par kahoon ga: Ae mere Rabb! Yeh to mere saathi hain . Allah Ta'ala farmaye ga tumhein maloom nahi ke unhon ne tumhare baad kya kya nayi nayi bidaat nikali thien . Is waqt main bhi wahi kahoon ga jo naik bande (Esa alaihissalam) ne kaha «wa kuntu alaihim shaheedam-maa dumtu feehim» ke ”ya Allah! Main jab tak in mein maujood raha is waqt tak main in par gawah tha .“ Rasool Allah salla Allahu alaihi wasallam ne bayan kiya ke farishte (mujh se) kahein ge ke yeh log hamesha apni aerhiyon ke bal phirte hi rahe (murtad hote rahe) .

Hum se Qutaybah bin Saeed ne bayan kiya , kaha hum se Khalid bin Haris ne bayan kiya , kaha hum se Hatim bin Abi Sagheera ne bayan kiya , in se Abdullah bin Abi Mulaykah ne bayan kiya , kaha ke mujh se Qasim bin Muhammad bin Abi Bakr ne bayan kiya aur in se Aisha razi Allahu anha ne bayan kiya ke Rasool Allah salla Allahu alaihi wasallam ne farmaya ”tum nange paon , nange jism , bila khatna ke uthaye jao ge .“ Aisha razi Allahu anha farmati hain ke is par main ne poochha: ya Rasool Allah! To kya mard auratein ek doosre ko dekhte hon ge ? Nabi Karim salla Allahu alaihi wasallam ne farmaya ke is waqt muamla is se kahin zyada sakht ho ga , is ka khayal bhi koi nahi kar sake ga .

Hum se Muhammad bin Bashar ne bayan kiya , unhon ne kaha hum se Ghundar ne bayan kiya , unhon ne kaha hum se Shubah ne bayan kiya , in se Abu Ishaq ne bayan kiya , in se Amr bin Maymoon ne bayan kiya aur in se Abdullah bin Masood razi Allahu anhu ne bayan kiya ke hum Nabi Karim salla Allahu alaihi wasallam ke saath ek khaime mein thay . Aap salla Allahu alaihi wasallam ne farmaya kya tum is par raazi ho ke ahal e jannat ka ek chauthayi raho ? Hum ne kaha ke ji haan . Aap salla Allahu alaihi wasallam ne farmaya kya tum is par raazi ho ke ahal e jannat ka tum ek tihayi raho ? Hum ne kaha ji haan . Aap salla Allahu alaihi wasallam ne farmaya kya tum is par raazi ho ke ahal e jannat ka tum nisf raho ? Hum ne kaha ji haan . Phir Aap salla Allahu alaihi wasallam ne farmaya ke is zaat ki qasam jis ke hath mein Muhammad (salla Allahu alaihi wasallam) ki jaan hai , mujhe umeed hai ke tum log (Ummat e Muslimah) ahal e jannat ka hissa hon ge aur aisa is liye ho ga ke jannat mein farman-bardar nafs ke alawa aur koi dakhil na ho ga aur tum log shirk karne walon ke darmiyan (tadaad mein) is tarah hon ge jaise siyah bail ke jism par sufaid baal hote hain ya jaise surkh ke jism par ek siyah baal ho .

Hum se Ismail bin Oways ne bayan kiya , kaha mujh se mere bhai ne bayan kiya , in se Sulayman ne , in se Sawr ne , in se Abu al-Ghais ne , in se Abu Hurairah razi Allahu anhu ne aur in se Nabi Karim salla Allahu alaihi wasallam ne farmaya ke Qayamat ke din sab se pehle Adam alaihissalam ko pukara jaye ga . Phir in ki nasl unhein dekhe gi to kaha jaye ga ke yeh tumhare buzurg dada Adam hain . (pukaarne par) woh kahein ge ke labbaik wa sadaik . Allah Ta'ala farmaye ga ke apni nasl mein se dozakh ka hissa nikaal lo . Adam alaihissalam arz karein ge Ae Parvardigar! Kitnon ko nikaaloon ? Allah Ta'ala farmaye ga feesad (ninaanway feesad dozakhi ek jannati) . Sahabah rizwan-ullaahi alaihim ne arz kiya: ya Rasool Allah! Jab hum mein sau mein ninaanway nikaal diye jayein to phir baaqi kya reh jayein ge ? Nabi Karim salla Allahu alaihi wasallam ne farmaya ke tamam ummaton mein meri ummat itni hi tadaad mein ho gi jaise siyah bail ke jism par sufaid baal hote hain .