Mujh se Khalifa ne bayan kiya, hum se Abdullah Ansari ne bayan kiya, un se Saeed ne bayan kiya, un se Qatadah aur un se Anas Bin Malik Radi Allahu Anhu ne bayan kiya ke Abu Zaid Radi Allahu Anhu wafat pa gaye aur unhon ne koi aulad nahi chori, wo Badr ki larai mein shareek hue thay
.

Hum se Abdullah Bin Yusuf Tanaisi ne bayan kiya, kaha hum se Lais Bin Saad ne bayan kiya, kaha ke mujh se Yahya Bin Saeed Ansari ne bayan kiya un se Qasim Bin Muhammad ne, un se Abdullah Bin Khabbab Radi Allahu Anhu ne ke Abu Saeed Bin Malik Khudri Radi Allahu Anhu safar se wapas aaye to in ke ghar wale qurbani ka gosht in ke samne laye, unhon ne kaha ke mein ise is waqt tak nahi khaoon ga jab tak is ka hukm na maloom kar loon. Chunanche wo apni walidah ki taraf se apne ek bhai ke paas maloom karne gaye. Wo Badr ki larai mein shareek hone walon mein se thay yani Qatadah Bin Numan Radi Allahu Anhu. Unhon ne bataya ke baad mein wo hukm mansookh kar diya gaya tha jis mein teen din se zyada qurbani ka gosht khane ki mamanat ki gayi thi
.

Mujh se Ubaid Bin Ismail ne bayan kiya, hum se Abu Usama ne bayan kiya, un se Hisham Bin Urwah ne, un se un ke walid ne bayan kiya aur un se Zubair Radi Allahu Anhu ne bayan kiya ke Badr ki larai mein meri mud-bher Ubaidah Bin Saeed Bin Aas se ho gayi. Is ka sara jism lohe mein gharq tha aur sirf aankh dikhayi de rahi thi. Is ki kuniyat Abu-zaat-ul-Karsh thi. Kehne laga ke mein Abu-zaat-ul-Karsh hoon. Mein ne chote barchay se is par hamla kiya aur is ki aankh hi ko nishana banaya. Chunanche is zakham se wo mar gaya. Hisham ne bayan kiya ke mujhe khabar di gayi hai ke Zubair Radi Allahu Anhu ne kaha ke phir mein ne apna paon is ke upar rakh kar poora zor lagaya aur bari dushwari se wo barcha is ki aankh se nikal saka. Is ke dono kinare murr gaye thay. Urwah ne bayan kiya ke phir Rasul Allah Sallallahu Alaihi Wasallam ne Zubair Radi Allahu Anhu ka wo barcha talab farmaya to unhon ne wo pesh kar diya. Jab Nabi Kareem Sallallahu Alaihi Wasallam ki wafat ho gayi to unhon ne ise wapas le liya. Phir Abu Bakr Radi Allahu Anhu ne talab kiya to unhon ne unhein bhi de diya. Abu Bakr Radi Allahu Anhu ki wafat ke baad Umar Radi Allahu Anhu ne talab kiya. Unhon ne unhein bhi de diya. Umar Radi Allahu Anhu ki wafat ke baad unhon ne ise le liya. Phir Usman Radi Allahu Anhu ne talab kiya to unhon ne unhein bhi de diya. Usman Radi Allahu Anhu ki shahadat ke baad wo Ali Radi Allahu Anhu ke paas chala gaya aur in ke baad in ki aulad ke paas aur is ke baad Abdullah Bin Zubair Radi Allahu Anhuma ne ise le liya aur in ke paas hi raha, yahan tak ke wo shaheed kar diye gaye
.

Hum se Abu-ul-Yaman ne bayan kiya, hum ko Shuaib ne khabar di, unhein Zuhri ne kaha ke mujhe Abu Idrees Aaizullah Bin Abdullah ne khabar di aur unhein Ubadah Bin Samit Radi Allahu Anhu ne, wo Badr ki larai mein shareek hue thay ke Rasul Allah Sallallahu Alaihi Wasallam ne farmaya tha ke mujh se bai'at karo
.

Hum se Yahya Bin Bukair ne bayan kiya, kaha hum se Lais Bin Saad ne bayan kiya, ان سے Aqeel ne, unhein Ibn Shihab Zuhri ne khabar di, unhein Urwah Bin Zubair Radi Allahu Anhuma ne, unhein Nabi Kareem Sallallahu Alaihi Wasallam ki zaujah mutahharah Aisha Radi Allahu Anha ne ke Abu Huzaifah Radi Allahu Anhu jo Rasul Allah Sallallahu Alaihi Wasallam ke sath Badr ki larai mein shareek hone walon mein thay, ne Salim Radi Allahu Anhu ko apna munh bola beta banaya tha aur apni bhatiji Hind Bint Walid Bin Utbah se shadi kara di thi. Salim Radi Allahu Anhu ek Ansari khatoon ke ghulam thay. Jaise Nabi Kareem Sallallahu Alaihi Wasallam ne Zaid Bin Harisah Radi Allahu Anhu ko apna munh bola beta bana liya tha. Jahiliyat mein ye dastoor tha ke agar koi shakhs kisi ko apna munh bola beta bana leta to log isi ki taraf ise mansoob kar ke pukarte aur munh bola beta is ki mirath ka bhi waris hota. Yahan tak ke Allah Ta'ala ne ye ayat nazil ki «Ud'oohum li-aabaa'ihim» ”Unhein un ke baapon ki taraf mansoob kar ke pukaro.“ To Sahla Radi Allahu Anha Nabi Kareem Sallallahu Alaihi Wasallam ki khidmat mein hazir huin. Phir tafseel se rawi ne hadees bayan kiya
.

Hum se Ali Bin Abdullah Madini ne bayan kiya, kaha hum se Bishr Bin Mufazzal ne bayan kiya, kaha hum se Khalid Bin Zakwan, un se Rubai Bint Muawwaz Radi Allahu Anha ne bayan kiya ke jis raat meri shadi hui thi Nabi Kareem Sallallahu Alaihi Wasallam is ki subah ko mere yahan tashreef laye aur mere bistar par baithe, jaise ab tum yahan mere paas baithe hue ho. Chand bacchiyan duff baja rahi theen aur wo ashaar parh rahi theen jin mein in ke in khandan walon ka zikr tha jo Badr ki larai mein shaheed ho gaye thay. Unhein mein ek larki ne ye misra bhi parha ke hum mein Nabi Kareem Sallallahu Alaihi Wasallam hain jo kal hone wali baat ko jaante hain. Aap Sallallahu Alaihi Wasallam ne farmaya ke ye na parho, balkay jo pehle parh rahi theen wahi parho
.

Hum se Ibrahim Bin Musa Raazi ne bayan kiya, kaha hum ko Hisham Bin Yusuf ne khabar di, unhein Ma'mar Bin Rashid ne, unhein Zuhri. (Doosri sanad) aur hum se Ismail Bin Abi Uwais ne bayan kiya, kaha ke mujh se mere bhai Abdul Hamid ne bayan kiya, un se Sulaiman Bin Bilal, un se Muhammad Bin Abi Ateeq, un se Ibn Shihab (Zuhri), un se Ubaidullah Bin Abdullah Bin Utbah Bin Masood aur un se Ibn Abbas Radi Allahu Anhuma ne bayan kiya ke mujhe Rasul Allah Sallallahu Alaihi Wasallam ke Sahabi Abu Talha Radi Allahu Anhu ne khabar di wo Nabi Kareem Sallallahu Alaihi Wasallam ke sath Badr ki larai mein shareek thay ke farishte is ghar mein nahi aate jis mein tasweer ya kutta ho. In ki murad jandar ki tasweer se thi
.

Hum se Abdan ne bayan kiya, kaha hum ko Abdullah Bin Mubarak ne khabar di, unhein Yunus Bin Yezid ne khabar di, (Doosri sanad) Imam Bukhari Rahimahullah ne kaha hum ko Ahmad Bin Salih ne khabar di, un se Anbasah Bin Khalid ne bayan kiya, kaha hum se Yunus ne bayan kiya, un se Zuhri ne, unhein Ali Bin Husain (Imam Zain-ul-Abidin) ne khabar di, unhein Husain Bin Ali Radi Allahu Anhuma ne khabar di aur un se Ali Radi Allahu Anhu ne bayan kiya ke jang-e-Badr ki ghanimat mein se mujhe ek aur oontni mili thi aur isi jang ki ghanimat mein se Allah Ta'ala ne Rasul Allah Sallallahu Alaihi Wasallam ka jo khums ke taur par hissa muqarrar kiya tha is mein se bhi Nabi Kareem Sallallahu Alaihi Wasallam ne mujhe ek oontni inayat farmai thi. Phir mera irada hua ke Nabi Kareem Sallallahu Alaihi Wasallam ki sahibzadi Fatimah Radi Allahu Anha ki ruksati kara laoon. Is liye Bani Qainuqa ke ek sunar se baat cheet ki ke wo mere sath chale aur hum izkhir ghaas layein. Mera irada tha ke mein is ghaas ko sunaron ke hath bech doon ga aur is ki qeemat walima ki dawat mein lagaoon ga. Mein abhi apni oontni ke liye palan, tokre aur rasiyan jama kar raha tha. Oontniyan ek Ansari Sahabi ke hujra ke qareeb baithi hui theen. Mein jin intezamat mein tha jab wo poore ho gaye to (oontniyon ko lene aaya) wahan dekha ke in ke kohan kisi ne kaat diye hain aur kookh cheer kar andar se kaleji nikal li hai. Ye halat dekh kar mein apne aansuon ko na rok saka. Mein ne poocha, ye kis ne kiya hai? Logon ne bataya ke Hamza Bin Abdul Muttalib Radi Allahu Anhu ne aur wo abhi isi hujra mein Ansar ke sath sharab noshi ki ek majlis mein mojood hain. In ke paas ek gaane wali hai aur in ke dost ahbab hain. Gaane wali ne gaate hue jab ye misra parha. Haan, ay Hamza! Ye umdah aur farbah oontniyan hain, to Hamza Radi Allahu Anhu ne kood kar apni talwar thami aur in dono oontniyon ke kohan kaat dale aur in ki kookh cheer kar andar se kaleji nikal li. Ali Radi Allahu Anhu ne bayan kiya ke phir mein wahan se Nabi Kareem Sallallahu Alaihi Wasallam ki khidmat mein hazir hua. Zaid Bin Harisah Radi Allahu Anhu bhi Nabi Kareem Sallallahu Alaihi Wasallam ki khidmat mein mojood thay. Aap Sallallahu Alaihi Wasallam ne mere gham ko pehle hi jaan liya aur farmaya ke kya baat pesh aayi? Mein bola: Ya Rasul Allah! Aaj jaisi takleef ki baat kabhi pesh nahi aayi thi. Hamza Radi Allahu Anhu ne meri dono oontniyon ko pakar ke in ke kohan kaat dale aur in ki kookh cheer dali hai. Wo yehein ek ghar mein sharab ki majlis jamaye baithe hain. Nabi Kareem Sallallahu Alaihi Wasallam ne apni chadar mubarak mangwayi aur ise odh kar aap tashreef le chale. Mein aur Zaid Bin Harisah Radi Allahu Anhu bhi sath sath holiye. Jab is ghar ke qareeb aap tashreef le gaye aur Hamza Radi Allahu Anhu ne jo kuch kiya tha is par unhein tanbih farmai. Hamza Radi Allahu Anhu sharab ke nashe mein mast thay aur in ki aankhein surkh theen. Unhon ne aap Sallallahu Alaihi Wasallam ki taraf nazar uthayi, phir zara aur upar uthayi aur aap ke ghutnon par dekhne lage, phir aur nazar uthayi aur aap ke chehra par dekhne lage. Phir kehne lage, tum sab mere baap ke ghulam ho. Aap Sallallahu Alaihi Wasallam samajh gaye ke wo is waqt bey-hosh hain. Is liye aap foran ulte paon is ghar se bahar nikal aaye, hum bhi aap ke sath thay
.

Mujh se Muhammad Bin Abbad ne bayan kiya, kaha hum ko Sufyan Bin Uyainah ne khabar di, kaha ke ye riwayat humein Abdur Rahman Bin Abdullah Asbahani ne likh kar bheji, unhon ne Abdullah Bin Ma'qal se suna ke Ali Radi Allahu Anhu ne Sahl Bin Hunaif Radi Allahu Anhu ke janaze par takbeerein kahein aur kaha ke wo Badr ki larai mein shareek thay
.

Hum se Abu-ul-Yaman ne bayan kiya, kaha hum ko Shuaib ne khabar di, un se Zuhri ne bayan kiya, unhein Salim Bin Abdullah ne khabar di, unhon ne Abdullah Bin Umar Radi Allahu Anhuma se suna aur unhon ne Umar Bin Khattab Radi Allahu Anhu se bayan kiya ke jab Hafsa Bint Umar Radi Allahu Anhuma ke shohar Khunais Bin Huzafa Sahmi Radi Allahu Anhu ki wafat ho gayi, wo Rasul Allah Sallallahu Alaihi Wasallam ke ashab mein thay aur Badr ki larai mein unhon ne shirkat ki thi aur Madinah mein in ki wafat ho gayi thi. Umar Radi Allahu Anhu ne bayan kiya ke meri mulaqat Usman Bin Affan Radi Allahu Anhu se hui to mein ne un se Hafsa ka zikr kiya aur kaha ke agar aap chahein to is ka nikah mein aap se kar doon. Unhon ne kaha ke mein soochoon ga. Is liye mein chand dinon ke liye thehar gaya, phir unhon ne kaha ke meri raye ye hui hai ke abhi mein nikah na karoon. Umar Radi Allahu Anhu ne kaha ke phir meri mulaqat Abu Bakr Radi Allahu Anhu se hui aur in se bhi mein ne yahi kaha ke agar aap chahein to mein aap ka nikah Hafsa Bint Umar se kar doon. Abu Bakr Radi Allahu Anhu khamosh ho gaye aur koi jawab nahi diya. In ka ye tariqa-e-amal Usman Radi Allahu Anhu se bhi zyada mere liye bais-e-takleef hua. Kuch dinon mein ne aur tawaqquf kiya to Nabi Kareem Sallallahu Alaihi Wasallam ne khud Hafsa Radi Allahu Anha ka paigham bheja aur mein ne in ka nikah Aap Sallallahu Alaihi Wasallam se kar diya. Is ke baad Abu Bakr Radi Allahu Anhu ki mulaqat mujh se hui to unhon ne kaha, shayad aap ko mere is tarz-e-amal se takleef hui ho gi ke jab aap ki mujh se mulaqat hui aur aap ne Hafsa Radi Allahu Anha ke mutaliq mujh se baat ki to mein ne koi jawab nahi diya. Mein ne kaha ke haan takleef hui thi. Unhon ne bataya ke aap ki baat ka mein ne sirf is liye koi jawab nahi diya tha ke Nabi Kareem Sallallahu Alaihi Wasallam ne (mujh se) Hafsa Radi Allahu Anha ka zikr kiya tha (mujh se mashwara liya tha ke mein is se nikah kar loon) aur mein Nabi Kareem Sallallahu Alaihi Wasallam ka raaz fash nahi kar sakta tha. Agar aap Hafsa Radi Allahu Anha se nikah ka irada chor dete to beshak mein in se nikah kar leta
.