Mujh se Ishaq Bin Ibrahim ne bayan kiya, hum ko Jarir ne khabar di, unhein Yahya Bin Saeed Ansari ne, unhein Muaz Bin Rifa'ah Bin Rafi Zuraqi ne apne walid (Rifa'ah Bin Rafi) se, jo Badr ki larai mein shareek hone walon mein se thay, unhon ne bayan kiya ke Jibrail Alaihis Salam Nabi Kareem Sallallahu Alaihi Wasallam ki khidmat mein aaye aur aap se unhon ne poocha ke Badr ki larai mein shareek hone walon ka aap ke yahan darja kya hai? Aap Sallallahu Alaihi Wasallam ne farmaya ke musalmanon mein sab se afzal ya aap Sallallahu Alaihi Wasallam ne isi tarah ka koi kalma irshad farmaya. Jibrail Alaihis Salam ne kaha ke jo farishte Badr ki larai mein shareek hue thay un ka bhi darja yahi hai
.

Hum se Sulaiman Bin Harb ne bayan kiya, hum se Hammad ne bayan kiya, un se Yahya ne, un se Muaz Bin Rifa'ah Bin Rafi ne ke Rifa'ah Radi Allahu Anhu Badr ki larai mein shareek hue thay aur (in ke walid) Rafi Radi Allahu Anhu Bai'at-e-Uqbah mein shareek hue thay to aap apne bete (Rifa'ah) se kaha karte thay ke Bai'at-e-Uqbah ke barabar Badr ki shirkat se mujhe zyada khushi nahi hai. Bayan kiya ke Jibrail Alaihis Salam ne Nabi Kareem Sallallahu Alaihi Wasallam se is bare mein poocha tha
.

Hum se Ishaq Bin Mansoor ne bayan kiya, hum ko Yezid Bin Haroon ne khabar di, kaha hum ko Yahya Bin Saeed Ansari ne khabar di aur unhon ne Muaz Bin Rifa'ah se suna ke ek farishte ne Nabi Kareem Sallallahu Alaihi Wasallam se poocha aur Yahya Bin Saeed Ansari se riwayat hai ke Yezid Bin Haad ne unhein khabar di ke jis din Muaz Bin Rifa'ah ne un se ye hadees bayan ki thi to wo bhi in ke sath thay. Yezid ne bayan kiya ke Muaz ne kaha tha ke poochne wale Jibrail Alaihis Salam thay
.

Mujh se Ibrahim ne bayan kiya, hum ko Abdur Wahhab Saqafi ne khabar di, kaha hum se Khalid Hazza ne bayan kiya, un se Ikrimah aur un se Ibn Abbas Radi Allahu Anhuma ne ke Nabi Kareem Sallallahu Alaihi Wasallam ne Badr ki larai mein farmaya tha ke ye hain Jibrail Alaihis Salam apne ghore ka sar thame hue aur hathyar lagaye hue
.