Mujh se Abdullah Bin Muhammad Jafi ne bayan kiya ‘ hum se Abu Ahmad Zubairi ne bayan kiya ‘ hum se Abdur Rahman Bin Ghaseel ne bayan kiya ‘ un se Hamza Bin Abi Usaid aur Zubair Bin Munzir Bin Abi Usaid ne aur un se Abu Usaid Radi Allahu Anhu ne bayan kiya ke Rasul Allah Sallallahu Alaihi Wasallam ne jang-e-Badr ke mauqa par humein hidayat farmai thi ke jab kuffar tumhare qareeb aa jayein to un par teer chalana aur (jab tak wo door rahein) apne teeron ko bachaye rakhna
.

Mujh se Muhammad Bin Abdur Rahim ne bayan kiya ‘ hum se Abu Ahmad Zubairi ne bayan kiya ‘ hum se Abdur Rahman Bin Ghaseel ne ‘ un se Hamza Bin Abi Usaid aur Munzir Bin Abi Usaid ne aur un se Abu Usaid Radi Allahu Anhu ne bayan kiya ke jang-e-Badr mein Rasul Allah Sallallahu Alaihi Wasallam ne humein hidayat ki thi ke jab kuffar tumhare qareeb aa jayein yani hamla o hujoom karein (itne ke tumhare nishane ki zadd mein aa jayein) to phir un par teer barsane shuru karna aur (jab tak wo tum se qareeb na hon) apne teer ko mehfooz rakhna
.

Mujh se Amr Bin Khalid ne bayan kiya ‘ hum se Zuhair ne bayan kiya ‘ hum se Abu Ishaq ne bayan kiya ke mein ne Bara Bin Azib Radi Allahu Anhu se suna ‘ wo bayan kar rahe thay ke Nabi Kareem Sallallahu Alaihi Wasallam ne Uhud ki larai mein teer andazon par Abdullah Bin Jubair Radi Allahu Anhu ko sardar muqarrar kiya tha is larai mein hamare satrah aadmi shaheed hue thay. Nabi Kareem Sallallahu Alaihi Wasallam aur aap ke sahabiyon se Badr ki larai mein ek sau chalees mushrikeen ko nuqsan pahuncha tha. Satrah in mein se qatl kar diye gaye thay aur satrah qaidi bana kar laye gaye thay is par Abu Sufyan ne kaha ke aaj ka din Badr ke din ka badla hai aur larai ki misal dowl ki si hai
.

Mujh se Muhammad Bin Ala ne bayan kiya ‘ hum se Abu Usama ne bayan kiya ‘ un se Buraid ne ‘ un se un ke walid ne ‘ is se Abu Burdah aur un se Abu Musa Ashari Radi Allahu Anhu ne ‘ mein guman karta hoon ke unhon ne Nabi Kareem Sallallahu Alaihi Wasallam se bayan kiya ke aap Sallallahu Alaihi Wasallam ne farmaya ”khair o bhalayi wo hai jo Allah Ta'ala ne humein Uhud ki larai ke baad ata farmai aur khuloos-e-amal ka sawab wo hai jo Allah Ta'ala ne humein Badr ki larai ke baad ata farmaya.
.

Mujh se Yaqub ne bayan kiya, hum se Ibrahim Bin Saad ne bayan kiya, un se un ke walid ne, un ke dada se ke Abdur Rahman Bin Auf Radi Allahu Anhu ne kaha Badr ki larai ke mauqa par mein saff mein khara hua tha. Mein ne murr ke dekha to meri dahni aur bayein taraf do naujawan kharay thay. Abhi mein in ke mutaliq koi faisla bhi na kar paya tha ke ek ne mujh se chupke se poocha taake is ka sathi sunne na paye. Chacha! Mujhe Abu Jahl ko dikha do. Mein ne kaha bhatije! Tum ise dekh kar kya karo ge? Us ne kaha, mein ne Allah Ta'ala ke samne ye ahad kiya hai ke agar mein ne ise dekh liya to ya ise qatl kar ke rahoon ga ya phir khud apni jaan de doon ga. Doosre naujawan ne bhi apne sathi se chupate hue mujh se yahi baat poochi. Unhon ne kaha ke is waqt in dono naujawanon ke darmiyan mein kharay ho kar mujhe bahut khushi hui. Mein ne ishare se unhein Abu Jahl dikha diya. Jise dekhte hi wo dono baaz ki tarah is par jhapte aur foran hi ise maar giraya. Ye dono Afra ke bete thay
.

Hum se Musa Bin Ismail ne bayan kiya, hum se Ibrahim ne bayan kiya, unhein Ibn Shihab ne khabar di, kaha ke mujhe Umar Bin Usaid Bin Jariyah Saqafi ne khabar di jo Bani Zuhra ke haleef thay aur Abu Hurairah Radi Allahu Anhu ke shagirdon mein shamil thay ke Abu Hurairah Radi Allahu Anhu ne kaha ke Nabi Kareem Sallallahu Alaihi Wasallam ne das jasoos bheje aur un ka ameer Aasim Bin Sabit Ansari Radi Allahu Anhu ko banaya jo Aasim Bin Umar Bin Khattab Radi Allahu Anhu ke nana hote hain. Jab ye log Usfan aur Makkah ke darmiyan maqam-e-Haddah par pahunche to Bani Huzail ke ek qabila ko in ke aane ki ittila mil gayi. Is qabila ka naam Bani Lihyan tha. Is ke sau teer andaz in Sahaba Radi Allahu Anhum ki talash mein nikle aur in ke nishan-e-qadam ke andaze par chalne lage. Aakhir is jagah pahunch gaye jahan baith kar in Sahaba Radi Allahu Anhum ne khajoor khayi thi. Unhon ne kaha ke ye Yasrib (Madinah) ki khajoor (ki ghutliyan) hain. Ab phir wo in ke nishan-e-qadam ke andaze par chalne lage. Jab Aasim Bin Sabit Radi Allahu Anhu aur in ke sathiyon ne in ke aane ko maloom kar liya to ek (mehfooz) jagah panah li. Qabila walon ne unhein apne ghere mein le liya aur kaha ke neeche utar ao aur hamari panah khud qabool kar lo to tum se hum waada karte hain ke tumhare kisi aadmi ko bhi hum qatl nahi karein ge. Aasim Bin Sabit Radi Allahu Anhu ne kaha. Musalmanon! Mein kisi kafir ki panah mein nahi utar sakta. Phir unhon ne dua ki, ay Allah! Hamare halat ki khabar apne Nabi ko kar de aakhir qabila walon ne musalmanon par teer andazi ki aur Aasim Radi Allahu Anhu ko shaheed kar diya. Baad mein un ke waada par teen Sahaba utar aaye. Ye hazrat Khubaib, Zaid Bin Dasnah aur ek teesre Sahabi thay. Qabila walon ne jab in teeno sahabiyon par qabu pa liya to in ki kaman se tant nikal kar isi se unhein bandh diya. Teesre Sahabi ne kaha, ye tumhari pehli dagha bazi hai mein tumhare sath kabhi nahi ja sakta. Mere liye to inhein ki zindagi namuna hai. Aap ka ishara in Sahaba ki taraf tha jo abhi shaheed kiye ja chuke thay. Kuffar ne unhein gheesetna shuru kiya aur zabardasti ki lekin wo kisi tarah in ke sath jaane par tayyar na hue. (To unhon ne un ko bhi shaheed kar diya) aur Khubaib Radi Allahu Anhu aur Zaid Bin Dasnah Radi Allahu Anhu ko sath le gaye aur (Makkah mein le ja kar) unhein bech diya. Ye Badr ki larai ke baad ka waqia hai. Haris Bin Aamir Bin Naufal ke larkon ne Khubaib Radi Allahu ko khareed liya. Unhon hi ne Badr ki larai mein Haris Bin Aamir ko qatl kiya tha. Kuch dinon tak to wo un ke yahan qaid rahe aakhir unhon ne un ke qatl ka irada kiya. Unhein dinon Haris ki kisi larki se unhon ne zer-e-naaf baal saaf karne ke liye ustra manga. Us ne de diya. Is waqt is ka ek chota sa baccha in ke paas (khelta hua) is aurat ki be-khabri mein chala gaya. Phir jab wo in ki taraf aayi to dekha ke baccha in ki raan par baitha hua hai. Aur ustra in ke hath mein hai unhon ne bayan kiya ke ye dekhte hi wo is darja ghabra gayi ke Khubaib Radi Allahu Anhu ne is ki ghabrahat ko dekh liya aur bole, kya tumhein is ka khauf hai ke mein is bacche ko qatl kar doon ga? Yaqeen rakkho ke aisa hargiz nahi kar sakta. In khatoon ne bayan kiya ke Allah ki qasam! Mein ne kabhi koi qaidi Khubaib Radi Allahu Anhu se behtar nahi dekha. Allah ki qasam! Mein ne ek din angoor ke ek khosha se unhein angoor khate dekha jo in ke hath mein tha halankay wo lohe ki zanjiron mein jakre hue thay aur Makkah mein is waqt koi phal bhi nahi tha. Wo bayan karti theen ke wo to Allah ki taraf se bheji hui rozi thi jo is ne Khubaib Radi Allahu Anhu ke liye bheji thi. Phir Banu Harisah unhein qatl karne ke liye Haram se bahar le jaane lage to Khubaib Radi Allahu Anhu ne un se kaha ke mujhe do rakat namaz parhne ki ijazat de do. Unhon ne is ki ijazat di to unhon ne do rakat namaz parhi aur farmaya: Allah ki qasam! Agar tumhein ye khayal na hone lagta ke mujhe ghabrahat hai (maut se) to aur zyada der tak parhta. Phir unhon ne dua ki ke ay Allah! In mein se har ek ko alag alag halak kar aur ek ko bhi baqi na chor aur ye ashaar parhe ”jab mein Islam par qatl kiya ja raha hoon to mujhe koi parwah nahi ke Allah ki raah mein mujhe kis pehlu par pachara jaye ga aur ye to sirf Allah ki raza hasil karne ke liye hai. Agar wo chahe ga to mere jism ke ek ek jorr par sawab ata farmaye ga.“ Is ke baad Abu Sarwah Uqbah Bin Haris in ki taraf barha aur is ne unhein shaheed kar diya. Khubaib Radi Allahu Anhu ne apne amal-e-hasan se har is musalman ke liye jise qaid kar ke qatl kiya jaye (qatl se pehle do rakat) namaz ki sunnat qaim ki hai. Idhar jis din in Sahaba Radi Allahu Anhum par museebat aayi thi Aap Sallallahu Alaihi Wasallam ne apne Sahaba Radi Allahu Anhum ko isi din is ki khabar de di thi. Quraish ke kuch logon ko jab maloom hua ke Aasim Bin Sabit Radi Allahu Anhu shaheed kar diye gaye hain to in ke paas apne aadmi bheje taake in ke jism ka koi aisa hissa layein jis se unhein pehchana ja sake. Kyunke unhon ne bhi (Badr mein) in ke ek sardar (Uqbah Bin Abi Muait) ko qatl kiya tha lekin Allah Ta'ala ne in ki laash par baadal ki tarah bharon ki ek fouj bhej di aur unhon ne aap ki laash ko kuffar-e-Quraish ke in aadmiyon se bacha liya aur wo in ke jism ka koi hissa bhi na kaat sake aur Ka'b Bin Malik Radi Allahu Anhu ne bayan kiya ke mere samne logon ne Murarah Bin Rabee Umri Radi Allahu Anhu aur Hilal Bin Umayyah Waqifi Radi Allahu Anhu ka zikr kiya. (Jo ghazwa-e-Tabook mein nahi ja sake thay) ke wo salih Sahabiyon mein se hain aur Badr ki larai mein shareek hue thay
.

Hum se Qutaibah ne bayan kiya, hum se Lais ne bayan kiya, un se Yahya un se Nafi ne ke Ibn Umar Radi Allahu Anhuma ne Jumah ke din zikr kiya ke Saeed Bin Zaid Bin Amr Bin Nufail Radi Allahu Anhuma jo badri Sahabi thay, bimar hain. Din charh chuka tha, Ibn Umar Radi Allahu Anhuma sawar ho kar in ke paas tashreef le gaye. Itne mein Jumah ka waqt qareeb ho gaya aur wo Jumah ki namaz (majbooran) na parh sake
.

Aur Lais Bin Saad ne bayan kiya ke mujh se Yunus ne bayan kiya, un se Ibn Shihab ne bayan kiya, un se Ubaidullah Bin Abdullah Bin Utbah ne bayan kiya ke un ke walid ne Umar Bin Abdullah Bin Arqam Zuhri ko likha ke tum Sabee'ah Bint-ul-Haris Aslamiyah Radi Allahu Anha ke paas jao aur un se un ke waqia ke mutaliq poocho ke unhon ne Nabi Kareem Sallallahu Alaihi Wasallam se masla poocha tha to aap ne un ko kya jawab diya tha? Chunanche unhon ne mere walid ko is ke jawab mein likha ke Sabee'ah Bint-ul-Haris Radi Allahu Anha ne unhein khabar di hai ke wo Saad Bin Khawlah Radi Allahu Anhuma ke nikah mein theen. Un ka talluq Bani Aamir Bin Luayyy se tha aur wo Badr ki jang mein shirkat karne walon mein se thay. Phir Hajjat-ul-Wida ke mauqa par in ki wafat ho gayi thi aur is waqt wo hamal se theen. Saad Bin Khawlah Radi Allahu Anhuma ki wafat ke kuch hi din baad un ke yahan baccha paida hua. Nifas ke din jab wo guzar chukein to nikah ka paigham bhejne walon ke liye unhon ne acche kapre pehne. Is waqt Banu Abd-ul-Dar ke ek Sahabi Abu-ul-Sanabil Bin Ba'kak Radi Allahu Anhu in ke yahan gaye aur un se kaha, mera khayal hai ke tum ne nikah ka paigham bhejne walon ke liye ye zeenat ki hai. Kya nikah karne ka khayal hai? Lekin Allah ki qasam! Jab tak (Saad Radi Allahu Anhu ki wafat par) char mahine aur das din na guzar jayein tum nikah ke qabil nahi ho sakteen. Sabee'ah Radi Allahu Anha ne bayan kiya ke jab Abu-ul-Sanabil ne mujh se ye baat kahi to mein ne sham hote hi kapre pehne aur Nabi Kareem Sallallahu Alaihi Wasallam ki khidmat mein hazir ho kar is ke bare mein, mein ne aap se masla maloom kiya. Nabi Kareem Sallallahu Alaihi Wasallam ne mujh se farmaya ke mein baccha paida hone ke baad iddat se nikal chuki hoon aur agar mein chahoon to nikah kar sakti hoon. Is riwayat ki mutabi'at Asbagh ne Ibn Wahab se ki hai, un se Yunus ne bayan kiya aur Lais ne kaha ke mujh se Yunus ne bayan kiya, un se Ibn Shihab ne, (unhon ne bayan kiya ke) hum ne un se poocha to unhon ne bayan kiya ke mujhe Banu Aamir Bin Luayyy ke ghulam Muhammad Bin Abdur Rahman Bin Sauban ne khabar di ke Muhammad Bin Iyas Bin Bukair ne unhein khabar di aur un ke walid Iyas Badr ki larai mein shareek thay
.