Hum se Abu-ul-Numan Muhammad Bin Fazl ne bayan kiya, kaha hum se Jarir Bin Hazim ne bayan kiya, un se Nafi ne ke Abdullah Bin Umar Radi Allahu Anhuma har tarah ke saanp ko maar dala karte thay
.

Lekin jab Abu Lubaba Bashir Bin Abdul Munzir Radi Allahu Anhu ne jo Badr ki larai mein shareek thay, in se bayan kiya ke Nabi Kareem Sallallahu Alaihi Wasallam ne ghar mein nikalne wale saanp ke marne se mana farmaya tha to unhon ne bhi ise maarna chor diya tha
.

Mujh se Ibrahim Bin-ul-Munzir ne bayan kiya, kaha hum se Muhammad Bin Falih ne bayan kiya, un se Musa Bin Uqba ke hum se Ibn Shihab ne bayan kiya aur un se Anas Bin Malik Radi Allahu Anhu ne bayan kiya ke Ansar ke chand logon ne Rasul Allah Sallallahu Alaihi Wasallam se ijazat chahi aur arz kiya ke aap humein ijazat ata farmayein to hum apne bhanje Abbas Radi Allahu Anhu ka fidiya maaf kar dein lekin Nabi Kareem Sallallahu Alaihi Wasallam ne farmaya ”Allah ki qasam! In ke fidiya se ek dirham bhi na chorna.“
.

Hum se Abu Aasim ne bayan kiya, kaha hum se Ibn Juraij, un se Zuhri, un se Ata Bin Yezid Laisi, un se Ubaidullah Bin Adi aur un se Miqdad Bin Aswad Radi Allahu Anhu. (Doosri sanad) Imam Bukhari ne kaha aur mujh se Ishaq Bin Mansoor ne bayan kiya, kaha hum se Yaqub Bin Ibrahim Bin Saad, un se Ibn Shihab ke bhatije (Muhammad Bin Abdullah) ne, apne chacha (Muhammad Bin Muslim Bin Shihab) se bayan kiya, unhein Ata Bin Yezid Laisi summ-al-Jandai ne khabar di, unhein Ubaidullah Bin Adi Bin Khiyar ne khabar di aur unhein Miqdad Bin Amr Kindi Radi Allahu Anhu ne, wo Bani Zuhra ke haleef thay aur Badr ki larai mein Rasul Allah Sallallahu Alaihi Wasallam ke sath thay. Unhon ne khabar di ke unhon ne Rasul Allah Sallallahu Alaihi Wasallam se arz kiya ke agar kisi mauqa par meri kisi kafir se takkar ho jaye aur hum dono ek doosre ko qatl karne ki koshish mein lag jayein aur wo mere ek hath par talwar maar kar ise kaat dale, phir wo mujh se bhag kar ek darakht ki panah le kar kehne lage ”mein Allah par iman le aaya.“ To kya ya Rasul Allah! Is ke is iqrar ke baad phir bhi mein ise qatl kar doon? Nabi Kareem Sallallahu Alaihi Wasallam ne farmaya ke phir tum ise qatl na karna. Unhon ne arz kiya ya Rasul Allah! Wo pehle mera ek hath bhi kaat chuka hai? Aur ye iqrar mere hath kaatne ke baad kiya hai? Aap Sallallahu Alaihi Wasallam ne phir bhi yahi farmaya ke ise qatl na karna, kyunke agar tu ne ise qatl kar dala to ise qatl karne se pehle jo tumhara maqam tha ab is ka wo maqam ho ga aur tumhara maqam wo ho ga jo is ka maqam is waqt tha jab is ne is kalma ka iqrar nahi kiya tha
.

Mujh se Yaqub Bin Ibrahim ne bayan kiya, kaha hum se Ibn Alaiyyah ne bayan kiya, kaha hum se Sulaiman Taimi ne bayan kiya, kaha hum se Anas Radi Allahu Anhu ne bayan kiya ke Rasul Allah Sallallahu Alaihi Wasallam ne Badr ki larai ke din farmaya ”kaun dekh kar aaye ga ke Abu Jahl ke sath kya hua? Abdullah Bin Masood Radi Allahu Anhu is ke liye rawanah hue aur dekha ke Afra ke dono beton ne ise qatl kar diya hai aur is ki laash thanda hone wali hai. Unhon ne poocha, Abu Jahl tum hi ho? Ibn Alaiyyah ne bayan kiya ke Ibn Masood Radi Allahu Anhu ne poocha tha ke tu Abu Jahl hai? Is par is ne kaha, kya is se bhi bara koi ho ga jise tum ne aaj qatl kar diya hai? Sulaiman ne bayan kiya, kaha ke ya is ne yun kaha, ”jise is ki qaum ne qatl kar diya hai? (Kya is se bhi bara koi ho ga) kaha ke Abu Mijlaz ne bayan kiya ke Abu Jahl ne kaha, kash! Ek kisan ke siwa mujhe kisi aur ne maara hota
.

Mujh se Muhammad Bin Abbad ne bayan kiya, kaha hum ko Hisham ne khabar di, unhein Ma'mar, unhein Hisham Bin Urwah, unhein un ke walid aur un se Zubair Radi Allahu Anhu ne bayan kiya ke jab Nabi Kareem Sallallahu Alaihi Wasallam ki wafat ho gayi to mein ne Abu Bakr Radi Allahu Anhu se kaha aap humein sath le kar hamare Ansari bhaiyon ke yahan chalein. Phir hamari mulaqat do naik-tareen Ansari sahabiyon se hui jinhon ne Badr ki larai mein shirkat ki thi. Ubaidullah ne kaha, phir mein ne is hadees ka tazkira Urwah Bin Zubair se kiya to unhon ne bataya ke wo dono Sahabi Uwaim Bin Sa'idah aur Ma'n Bin Adi Radi Allahu Anhuma thay
.

Hum se Ishaq Bin Ibrahim ne bayan kiya, unhon ne Muhammad Bin Fuzail se suna, unhon ne Ismail Ibn Abi Khalid se, unhon ne Qais Bin Abi Hazim se ke badri Sahaba ka (salana) wazeefa paanch paanch hazar tha. Umar Radi Allahu Anhu ne farmaya ke mein unhein (badri Sahaba ko) in sahabiyon par fazilat doon ga jo in ke baad iman laye
.

Mujh se Ishaq Bin Mansoor ne bayan kiya, kaha hum se Abdur Razzaq ne bayan kiya, kaha hum ko Ma'mar ne khabar di, unhein Zuhri, unhein Muhammad Bin Jubair, un se in ke walid ne bayan kiya ke Nabi Kareem Sallallahu Alaihi Wasallam se mein ne suna, aap Maghrib ki namaz mein Surah-at-Toor ki tilawat kar rahe thay, ye pehla mauqa tha jab mere dil mein iman ne qarar pakra
.

Aur isi sanad se marwi hai, un se Muhammad Bin Jubair Bin Mut'im aur un se in ke walid (Jubair Bin Mut'im Radi Allahu Anhu) ne ke Nabi Kareem Sallallahu Alaihi Wasallam ne Badr ke qaidiyon ke mutaliq farmaya tha ”agar Mut'im Bin Adi Radi Allahu Anhu zinda hote aur in paleed qaidiyon ke liye sifarish karte to mein unhein in ke kehne se chor deta.“
.

Aur Lais ne Yahya Bin Saeed Ansari se bayan kiya, unhon ne kaha ke hum se Saeed Bin Musayyib ne bayan kiya ke pehla fasad jab barpa hua yani Usman Radi Allahu Anhu ki shahadat ka to is ne ashab-e-Badr mein se kisi ko baqi nahi chora. Phir jab doosra fasad barpa hua yani Harrah ka, to is ne ashab-e-Hudaybiyyah mein se kisi ko baqi nahi chora. Phir teesra fasad barpa hua to wo is waqt tak nahi gaya jab tak logon mein kuch bhi khoobi ya aql baqi thi
.