Hum se Makki Ibn-e-Ibrahim ne bayan kiya, unhein Hanzalah ne Salim se khabar di, unhon ne Abu Hurairah Radhiallahu Anhu se suna, woh Rasoolullah Sallallahu Alaihi Wasallam se riwayat karte hain Aap Sallallahu Alaihi Wasallam ne farmaaya ke (ek waqt aisa aayega ke jab) ilm utha liya jaayega. Jahaalat aur fitne phail jaayenge aur Harj badh jaayega. Aap se poocha gaya ke ya RasoolAllah! Harj se kya muraad hai? Aap Sallallahu Alaihi Wasallam ne apne haath ko harkat de kar farmaaya is tarah, goya Aap Sallallahu Alaihi Wasallam ne us se qatl muraad liya.

Hum se Imran bin Maisarah ne bayan kiya, un se Abdul Waris ne Abu Tayyah ke waaste se naql kiya, woh Anas se riwayat karte hain ke Rasoolullah Sallallahu Alaihi Wasallam ne farmaaya. Alaamat-e-qiyamat mein se yeh hai ke (deeni) ilm uth jaayega aur jahl hi jahl zahir ho jaayega. Aur (elaaniya) sharaab pi jaayegi aur zina phail jaayega.

Hum se Musaddad ne bayan kiya un se Yahya ne Sho’bah se naql kiya, woh Qatadah se aur Qatadah Anas se riwayat karte hain, unhon ne farmaaya ke main tum se ek aisi Hadees bayan karta hun jo mere baad tum se koi nahi bayan karega, main ne Rasoolullah Sallallahu Alaihi Wasallam ko yeh farmaate huwe suna ke alaamat-e-qiyamat mein se yeh hai ke ilm (deen) kam ho jaayega. Jahl zahir ho jaayega. Zina bakasrat hoga. Aurtein badh jaayengi aur mard kam ho jaayenge. Hatta ke 50 aurton ka nigraan sirf ek mard reh jaayega.

Hum se Abul Yamaan Hakeem bin Nafi ne byaan kiya , kaha ke hamein Shuayb ne khabar di , kaha ke hum se Abu al-Zinad (Abdullah bin Dhakwan) ne byaan kiya , in se Abdur Rahman bin Hurmuz Aaraj ne aur in se Abu Hurairah razi Allahu anhu ne byaan kiya ke Nabi Karim salla Allahu alaihi wasallam ne farmaya ke Qiyamat us waqt tak na aayegi jab tak ilm-e-deen na uth jayega aur zalzalun ki kasrat na ho jayegi aur zamana jaldi jaldi na guzre ga aur fitne fasad phoot parein ge aur «haraj» ki kasrat ho jayegi aur «haraj» se murad qatal hai . Qatal aur tumhare darmiyan daulat o maal ki itni kasrat hogi ke woh ubal pare ga .

Hum se Abul Yaman Hakam bin Nafi ne byaan kiya ‘ unhon ne kaha ke humein Shuayb ne khabar di ‘ kaha ke hum se Abul Zinad ne byaan kiya ‘ un se Abdul Rahman bin Hurmuz Aaraj ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya Qayamat aane se pehle maal o daulat ki is qadar kasrat ho jaye gi aur log is qadar maaldar ho jayeinge ke is waqt sahib-e-maal ko is ki fikr ho gi ke is ki zakat kaun qabool kare aur agar kisi ko dena bhi chahe ga to is ko yeh jawab mile ga ke mujhe is ki haajat nahi hai .

Hum se Hakam bin Nafi ne bayan kiya, kaha hum se Shuaib ne bayan kiya, un se Zuhri ne bayan kiya, kaha mujhe Abu Salamah ne khabar di aur un se Abu Hurairah Radi Allahu Anhu ne bayan kiya ke Rasoolullah Sallallahu Alaihi Wa Sallam ne farmaya "Qiyamat is waqt tak qaim nahi hogi jab tak do jama'atein (Musalmanon ki) aapas mein jang na kar lein aur dono ka dawa ek hoga (ke woh haq par hain)."

Hum se Abdullah bin Muhammad Musnadi ne bayan kiya, kaha hum se Abdur Razzaq ne bayan kiya, kaha hum ko Ma'mar ne khabar di, unhein Hammam ne aur unhein Abu Hurairah Radi Allahu Anhu ne ke Nabi Kareem Sallallahu Alaihi Wa Sallam ne farmaya "Qiyamat is waqt tak qaim na hogi jab tak do jama'atein aapas mein jang na kar lein. Dono mein badi bhari jang hogi. Halankay dono ka dawa ek hi hoga aur Qiyamat is waqt tak qaim na hogi jab tak taqreeban tees jhoote Dajjal paida na ho lein. In mein har ek ka yahi guman hoga ke woh Allah ka Nabi hai."

Hum se Musa bin Ismail ne byaan kiya , unhon ne kaha hum se Abdul Wahid ne byaan kiya , unhon ne kaha hum se Amarah ne byaan kiya , unhon ne kaha hum se Abu Zurah ne byaan kiya , kaha hum se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke is waqt tak Qayamat qaim na ho gi , jab tak sooraj Maghrib se tuloo na ho le . Jab log usay dekhein ge to iman layein ge lekin yeh woh waqt ho ga jab kisi aise shakhs ko is ka iman koi nafa na de ga jo pehle se iman na rakhta ho .

Mujh se Ishaq ne byaan kiya , kaha hum ko Abdur Razzaq ne khabar di , kaha hum ko Mamar ne khabar di , unhein Hammam ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke Qayamat is waqt tak qaim na ho gi , jab tak sooraj Maghrib se na tuloo ho le . Jab Maghrib se sooraj tuloo ho ga aur log dekh lein ge to sab iman layein ge lekin yeh waqt ho ga jab kisi ko is ka iman nafa na de ga , phir Aap salla Allahu alaihi wasallam ne is aayat ki tilawat ki .

Hum se Hafs bin Umar Hauzi ne byaan kiya, kaha hum se Hisham bin Urwah ne byaan kiya, un se Qatadah ne aur un se Anas razi Allahu anhu ne byaan kiya ke main tum se woh hadees byaan karoon ga jo main ne Rasool Allah salla Allahu alaihi wasallam se suni hai, mere siwa yeh hadees tum se koi aur nahi byaan karne wala hai. Main ne Nabi Karim salla Allahu alaihi wasallam se suna, Aap salla Allahu alaihi wasallam farma rahe thay ke Qayamat ki nishaniyon mein se yeh bhi hai ke Quran o hadees ka ilm utha liya jaye ga aur jahalat barh jaye gi. Zina ki kasrat ho jaye gi aur sharab log zyada peene lagein ge. Mard kam ho jayein ge aur auraton ki tadaad zyada ho jaye gi. Halat yeh ho jaye gi ke pachaas pachaas auraton ka sanbhaalne wala (khabar-geer) ek mard ho ga.

Hum se Muslim bin Ibrahim ne bayan kiya , kaha hum se Hisham Dastawai ne bayan kiya , kaha hum se Qatadah ne bayan kiya aur in se Anas razi Allahu anhu ne bayan kiya ke main ne Rasool Allah salla Allahu alaihi wasallam se ek hadees suni jo tum se ab meere siwa koi aur nahi bayan kare ga (kyunke ab meere siwa koi sahabi zinda maujood nahi raha hai) . Nabi Karim salla Allahu alaihi wasallam ne farmaya ke Qayamat ki nishaniyon mein se yeh hai ke jahalat ghalib ho jaye gi aur ilm kam ho jaye ga , zina-kari barh jaye gi , sharab kasrat se pee jaane lage gi , auratein bahut ho jayein gi , yahan tak ke pachaas pachaas auraton ki nigrani karne wala sirf ek hi mard reh jaye ga .

Hum se Abu al-Yaman ne bayan kiya, kaha hum ko Shuayb ne khabar di, unhein Zuhri ne kaha ke mujhe Humayd bin Abd-ur-Rahman ne khabar di aur in se Abu Hurairah razi Allahu anhu ne bayan kiya ke Rasool Allahsalla Allahu alaihi wasallam ne farmaya ”zamana jaldi jaldi guzre ga aur deen ka ilm duniya mein kam ho jaye ga aur dilon mein bakheeli sama jaye gi aur larayi barh jaye gi.“ Sahabah razi Allahu anhum ne arz kiya «haraj» kiya hota hai? Farmaya qatl khoon-rezi.

Hum se Abu al-Yaman ne bayan kiya , kaha hum ko Shuayb ne khabar di , kaha hamase Abu al-Zinad ne bayan kiya , in se Abd-ul-Rahman ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”Qayamat is waqt tak qaim na ho gi jab tak sooraj maghrib se na nikle ga . Jab sooraj maghrib se nikle ga aur log dekh lein ge to sab iman le aayein ge , yahi woh waqt ho ga jab kisi ko is ka iman nafa nahi de ga jo is se pehle iman na laya ho ga ya jis ne iman ke baad amal e khair na kiya ho . Pas Qayamat aa jaye gi aur do aadmi kapra darmiyan mein (khareed o farokht ke liye) phailaye huay hon ge . Abhi khareed o farokht bhi nahi hui ho gi aur na unhon ne usay lapeita hi ho ga (ke Qayamat qaim ho jaye gi) aur Qayamat is haal mein qaim ho jaye gi ke ek shakhs apni oontni ka doodh le kar aa raha ho ga aur usay pee bhi nahi sake ga aur Qayamat is haal mein qaim ho jaye gi ke ek shakhs apna hauz tayyar kara raha ho ga aur is ka pani bhi na pee paye ga . Qayamat is haal mein qaim ho jaye gi ke ek shakhs apna luqma apne munh ki taraf uthaye ga aur usay khane bhi na paye ga .“

Hamain Dawood bin Shabeeb ne khabar di, kaha hum se Humam ne bayan kiya, in se Qatadah ne, kaha hamain ko Anas razi Allahu anhu ne khabar di hai ke main tum se ek aaisi hadees bayan karoon ga ke meere baad koi usay nahi bayan kare ga. Main ne yeh hadees Nabi Karim salla Allahu alaihi wasallam se suni hai. Main ne Nabi Karim salla Allahu alaihi wasallam ko yeh kehte suna ke Qayamat is waqt tak qaim nahi ho gi ya yun farmaya ke Qayamat ki nishaniyon mein se yeh hai ke ilm e deen duniya se uth jaye ga aur jahalat phail jaye gi, sharab bakasrat pee jaane lage gi aur zina phail jaye ga. Mard kam ho jayein ge aur auraton ki kasrat ho gi. Halat yahan tak pahunch jaye gi ke pachaas auraton par ek hi khabar lene wala mard reh jaye ga.

Hum se Ali bin Abdullah Madini ne bayan kiya , kaha hum se Sufyan ne bayan kiya , kaha hum se Abu al-Zinad ne bayan kiya , in se Aaraj ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”Qayamat is waqt tak qaim nahi ho gi jab tak do aise giroh aapas mein jang na karein jin ka dawa ek hi ho .“

`Hum se Ayash bin al-Waleed ne bayan kiya, unhon ne kaha hum ko Abdula'la ne khabar di, unhon ne kaha hum se Ma'mar ne bayan kiya, un se Zuhri ne, un se Suwaid bin Musayyib ne bayan kiya, un se Abu Hurairah Radi Allahu Anhu ne ke Nabi Kareem صلی اللہ علیہ وسلم ne farmaya ”Zamana qareeb hota jaye ga aur amal kam hota jaye ga aur lalach dilon mein daal diya jaye ga aur fitne zahir hone lagein ge aur «Haraj» ki kasrat ho jaye gi.“ Logon ne sawal kiya: ya Rasul Allah! yeh «Haraj» kya cheez hai? Nabi Kareem صلی اللہ علیہ وسلم ne farmaya ke qatl! qatl! . Aur Yunus aur Laith aur Zuhri ke bhatije ne bayan kiya, un se Zuhri ne, un se Hamid ne, un se Abu Hurairah Radi Allahu Anhu ne Nabi Kareem صلی اللہ علیہ وسلم se.

`Hum se Ubaidullah bin Musa ne bayan kiya, kaha hum se A'mash ne, un se Shaqeeq ne bayan kiya ke mein Abdullah bin Masood aur Abu Musa Radi Allahu Anhuma ke saath tha, in donon hazrat ne bayan kiya ke Nabi Kareem صلی اللہ علیہ وسلم ne farmaya ”Qayamat ke din se pehle aise din hon ge jin mein jahalat utre pade gi aur ilm utha liya jaye ga aur «Haraj» barh jaye ga aur «Haraj» qatl hai.“

`Hum se Qutaiba ne bayan kiya, unhon ne kaha hum se Jareer ne bayan kiya, in se A'mash ne bayan kiya aur un se Abu Wa'il ne bayan kiya ke mein Abdullah bin Masood aur Abu Musa Radi Allahu Anhuma ke saath baitha hua tha to Abu Musa Radi Allahu Anhu ne bayan kiya ke mein ne Nabi Kareem صلی اللہ علیہ وسلم se suna isi tarah. «Haraj» Habsha ki zaban mein qatl ko kehte hain.

`Aur Abu Awana ne bayan kiya, un se Aasim ne, un se Abu Wa'il ne aur un se Abu Musa Ash'ari Radi Allahu Anhu ne ke unhon ne Abdullah Radi Allahu Anhu se kaha Aap wo hadees jaante hain jo Nabi Kareem صلی اللہ علیہ وسلم ne «Haraj» ke dinon wagaira ke mutalliq bayan ki. Ibn Masood Radi Allahu Anhu ne kaha ke mein ne Aap صلی اللہ علیہ وسلم ko yeh farmate suna tha ke wo bad-bakht-tareen logon mein se hon ge jin ki zindagi mein qayamat aaye gi.

`Hum se Ismail ne bayan kiya, kaha mujh se Imam Malik ne bayan kiya, un se Abuz Zinad ne, un se A'raj ne aur un se Abu Hurairah Radi Allahu Anhu ne ke Nabi Kareem صلی اللہ علیہ وسلم ne farmaya ”Qayamat qaim na ho gi yahan tak ke ek shakhs doosre ki qabr ke paas se guzre ga aur kahe ga, kaash! mein isi ki jagah hota.“

`Hum se Abul Yaman ne bayan kiya, kaha hum ko Shuaib ne khabar di, kaha hum se Abuz Zinad ne bayan kiya, un se Abdur Rahman ne aur un se Abu Hurairah Radi Allahu Anhu ne ke Rasul Allah صلی اللہ علیہ وسلم ne farmaya ”Qayamat is waqt tak qaim na ho gi jab tak do azeem jama'atein jang na karein gi. In donon jama'aton ke darmiyan badi khoon-rezi ho gi. Halanke donon ka dawa ek hi ho ga aur yahan tak ke bahut se jhoote Dajjal bheje jayein ge. Taqreeban tees Dajjal. In mein se har ek dawa kare ga ke wo Allah ka Rasul hai aur yahan tak ke ilm utha liya jaye ga aur zalzalon ki kasrat ho gi aur zamana qareeb ho jaye ga aur fitne zahir ho jayein ge aur haraj barh jaye ga aur haraj se murad qatl hai aur yahan tak ke tumhare paas maal ki kasrat ho jaye gi balki beh pade ga aur yahan tak ke sahab-e-maal ko is ka fikr daman-geer ho ga ke is ka sadqa qabool kaun kare aur yahan tak ke wo pesh kare ga lekin jis ke samne pesh kare ga wo kahe ga ke mujhe is ki zaroorat nahi hai aur yahan tak ke log badi badi imaraton par aapas mein fakhr karein ge. Ek se ek barh charh kar imaratein banayein ge aur yahan tak ke ek shakhs doosre ki qabr se guzre ga aur kahe ga ke kash mein bhi isi jagah hota aur yahan tak ke sooraj magrib se nikle ga. Pas jab wo is tarah tulu ho ga aur log dekh lein ge to sab iman le aayein ge lekin yeh wo waqt ho ga jab kisi aise shakhs ko is ka iman lana faida na pahunchaye ga jo pehle se iman na laya ho ya us ne apne iman ke saath acche kaam na kiye hon aur qayamat achanak is tarah qaim ho jaye gi ke do aadmiyon ne apne darmiyan kapra phaila rakkha ho ga aur ise abhi bech na paye hon ge na lapait paye hon ge aur qayamat is tarah barpa ho jaye gi ke ek shakhs apni oontni ka doodh nikal kar wapas hua ho ga ke ise kha bhi na paya ho ga aur qayamat is tarah qaim ho jaye gi ke wo apne hauz ko durust kar raha ho ga aur is mein se pani bhi na piya ho ga aur qayamat is tarah qaim ho jaye gi ke us ne apna luqma munh ki taraf uthaya ho ga aur abhi ise khaya bhi na ho ga.

`Hum se Abul Yaman ne bayan kiya, kaha hum ko Shuaib ne khabar di, unhein Zuhri ne, unhein Urwa ne bayan kiya aur un se Aisha Radi Allahu Anha ne ke Hind bint Utba bin Rabi'a aayin aur kaha: ya Rasul Allah! roo-e-zameen ka koi gharana aisa nahi tha jis ke mutalliq is darja mein zillat ki khwahish-mand hoon jitna Aap ke gharana ki zillat o ruswayi ki mein khwahish-mand thi lekin ab mera yeh haal hai ke mein sab se zyada khwahish-mand hoon ke roo-e-zameen ke tamam gharano mein Aap ka gharana izzat o sar-bulandi wala ho. Phir unhon ne kaha ke Abu Sufyan Radi Allahu Anhu bakheel aadmi hain, to kya mere liye koi haraj hai agar mein un ke maal mein se (un ki ijazat ke bagair le kar) apne ahl o ayal ko khilaon? Nabi Kareem صلی اللہ علیہ وسلم ne un se farmaya ke tumhare liye koi haraj nahi hai, agar tum unhein dastoor ke mutabiq khilao.