`Hum se Muhammad bin Muqatil ne bayan kiya, kaha hum ko Abdullah ne khabar di, kaha hum ko Ismail bin Abi Khalid ne khabar di, unhein Qais ibn Abi Hazim ne, un se Abu Masood Ansari Radi Allahu Anhu ne bayan kiya ke ek aadmi Rasul Allah صلی اللہ علیہ وسلم ke paas aaya aur arz kiya: ya Rasul Allah! mein wallah subah ki jama'at mein falan (Imam Mu'az bin Jabal ya Ubayy bin Ka'b Radi Allahu Anhuma) ki wajah se shirkat nahi kar pata kyunke wo hamare saath is namaz ko bahut lambi kar dete hain. Abu Masood Radi Allahu Anhu ne kaha ke mein ne Nabi Kareem صلی اللہ علیہ وسلم ko wa'z o nasihat ke waqt is se zyada gazab-naak hota kabhi nahi dekha jaisa ke Aap is din thay. Phir Aap صلی اللہ علیہ وسلم ne farmaya ”Ae logo! tum mein se baaz namaziyoon ko nafrat dilane wale hain, pas tum mein se jo shakhs bhi logon ko namaz parhaye ise ikhtisar karna chahiye kyunke jama'at mein boodhe, bacche aur zaroorat-mand sab hi hote hain.“

Hum se Muhammed bin Katheer ne bayan kiya unhein Sufyan ne Abu Khalid se khabar di, woh Qais bin Abi Haazim se bayan karte hain, woh Abu Mas’ood Ansari se riwayat karte hain ke ek shakhs (Hazm bin Abi Ka’b) ne (Rasoolullah Sallallahu Alaihi Wasallam ki khidmat mein aa kar) arz kiya. Ya RasoolAllah! Falaan shakhs (Mu’aaz bin Jabal) lambi Namaz padhaate hain is liye main (jama’at ki) Namaz mein shareek nahi ho sakta (kiunki main din bhar oont charaane ki wajah se raat ko thak kar chakna-choor ho jaata hun aur taweel Qira’at sunne ki taaqat nahi rakhta) (Abu Mas’ood rawi kehte hain) ke us din se ziyada main ne kabhi Rasoolullah Sallallahu Alaihi Wasallam ko waaz ke dauraan itna gazabnaak nahi dekha. Aap Sallallahu Alaihi Wasallam ne farmaaya aye logon! Tum (aisi shiddat ikhtiyaar kar ke logon ko deen se) nafrat dilaane lage ho. (Sun lo) jo shakhs logon ko Namaz padhaaye to woh halki padhaaye, kiunki un mein beemaar, kamzor aur haajat waale (sab hi qism ke log) hote hain.

Hum se Ahmad bin Yunus ne byaan kiya , kaha ke hum se Zuhayr bin Muawiyah ne byaan kiya , kaha ke hum se Ismail bin Abi Khalid ne byaan kiya , kaha ke main ne Qais bin Abi Hazim se suna , kaha ke mujhe Abu Masood Ansari ne khabar di ke ek shakhs ne kaha ke ya Rasool Allah! qasam Allah ki main subah ki namaaz mein falan ki wajah se der mein jata hoon , kyunke woh namaaz ko bohot lamba kar dete hain , main ne Rasool Allah salla Allahu alaihi wasallam ko naseehat ke waqt us din se zyada (kabhi bhi) ghazab naak nahi dekha . Aap salla Allahu alaihi wasallam ne farmaya ke tum mein se kuch log yeh chahte hain ke (awam ko ibaadat se ya deen se) nafrat dila den , khabardaar tum mein logon ko jo shakhs bhi namaaz parhaye to halki parhaye . Kyunke namaziyon mein kamzor , boorhe aur zaroorat wale sab hi qism ke log hote hain .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne Abuz Zinad se khabar di , unhon ne Araj se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne farmaya , jab koi tum mein se logon ko namaaz parhaye to takhfeef kare kyunke jamaat mein zaeef bimaar aur boorhe (sab hi) hote hain , lekin akela parhe to jis qadar ji chahe tul de sakta hai .

Hum se Muhammad bin Yusuf Faryabi ne byaan kiya , kaha ke hum se Sufyan Thauri ne byaan kiya Ismail bin Abi Khalid se , unhon ne Qais bin Abi Hazim se , unhon ne Abu Masood Ansari razi Allahu anhu se , Aap ne farmaya ke ek shakhs ne Rasool Allah salla Allahu alaihi wasallam se kaha ke ya Rasool Allah! main Fajr ki namaaz mein takheer kar ke is liye shareek hota hoon ke falan sahib Fajr ki namaaz bohot taweel kar dete hain . Is par Aap salla Allahu alaihi wasallam is qadar ghussa huay ke main ne naseehat ke waqt us din se zyada ghazab naak Aap salla Allahu alaihi wasallam ko kabhi nahi dekha . Phir Aap salla Allahu alaihi wasallam ne farmaya logo! tum mein baaz log (namaaz se logon ko) door karne ka baais hain . Pas jo shakhs imam ho usay halki namaaz parhni chahiye is liye ke us ke peeche kamzor , boorhe aur zaroorat wale sab hi hote hain .

Hum se Aadam bin Abi Iyaas ne byaan kiya , kaha ke hum se Shubah ne byaan kiya , kaha ke hum se Muharib bin Dithar ne byaan kiya , kaha ke main ne Jabir bin Abdullah Ansari se suna , Aap ne batlaya ke ek shakhs paani uthane wala do oont liye huay aaya , raat taareek ho chuki thi . Us ne Muaz razi Allahu anhu ko namaaz parhate huay paya . Is liye apne oonton ko baitha kar (namaaz mein shareek hone ke liye) Muaz razi Allahu anhu ki taraf barha . Muaz razi Allahu anhu ne namaaz mein Surah Baqarah ya Surah Nisa shuru ki . Chunanchay woh shakhs niyat tor kar chal diya . Phir usay maloom hua ke Muaz razi Allahu anhu ne mujhe bura bhala kaha hai . Is liye woh Nabi Karim salla Allahu alaihi wasallam ki khidmat mein haazir hua aur Muaz ki shikayat ki , Nabi Karim salla Allahu alaihi wasallam ne us se farmaya , Muaz! kya tum logon ko fitna mein daalte ho . Aap salla Allahu alaihi wasallam ne teen marteba ( «fitaan» ya «faatan») farmaya: «sabbih isma rabbika , wash shamsi wa duhaha , wal layli iza yaghsha» (surtain) tum ne kyun na parheen , kyunke tumhare peeche boorhe , kamzor aur haajat mand namaaz parhte hain . Shubah ne kaha ke mera khayal hai ke yeh aakhri jumla (kyunke tumhare peeche al kh) hadees mein daakhil hai . Shubah ke saath is ki mutabaat Saeed bin Masrooq , Masar aur Shaybani ne ki hai aur Amr bin Dinar , Ubaydullah bin Muqsim aur Abuz Zubayr ne bhi is hadees ko Jabir ke wastay se byaan kiya hai ke Muaz ne Isha mein Surah Baqarah parhi thi aur Shubah ke saath is riwayat ki mutabaat Amash ne Muharib ke wastay se ki hai .

Hum se Sulayman bin Harb aur Abun Numan Muhammad bin Fadl ne byaan kiya , unhon ne kaha ke hum se Hammad bin Zaid ne byaan kiya , unhon ne Ayyub Sakhtiyani se , unhon ne Amr bin Dinar se , unhon ne Jabir razi Allahu anhu se farmaya ke Muaz razi Allahu anhu , Nabi Karim salla Allahu alaihi wasallam ke saath namaaz parhte phir wapas aa kar apni qom ko namaaz parhate thay .

Hum se Abu al-Waleed ne byaan kiya , kaha hum se Shubah ne byaan kiya , kaha hum ko Abu Ishaq ne khabar di , unhon ne Bara bin Azib razi Allahu anhu se suna , unhon ne byaan kiya ke main ne Surah «sabbih-isma rabbikal aa-la» Nabi Karim salla Allahu alaihi wasallam ke Madinah Munawwarah aane se pehle hi seekh li thi .

Hum se Muhammad bin Ubadah ne bayan kiya, kaha hum ko Yazid ne khabar di, kaha hum ko Saleem ne khabar di, kaha hum se Amr bin Dinar ne bayan kiya, in se Jabir bin Abdullah razi Allahu anhuma ne bayan kiya ke Maaz bin Jabal razi Allahu anhu Nabi Karim salla Allahu alaihi wasallam ke saath namaz parhte, phir apni qaum mein aate aur unhein namaz parhate. Unhon ne (ek martaba) namaz mein Surah al-Baqarah parhi. Is par ek sahab jama'at se alag ho gaye aur halki namaz parhi. Jab is ke mutalliq Maaz ko maloom hua to kaha woh munafiq hai. Maaz ki yeh baat jab un ko maloom hui to woh Nabi Karim salla Allahu alaihi wasallam ki khidmat mein hazir huay aur arz kiya: ya Rasool Allah! Hum log mehnat ka kaam karte hain aur apni oontniyon ko khud pani pilate hain Maaz ne kal raat hamain namaz parhayi aur Surah al-Baqarah parhni shuru kar di. Is liye main namaz torr kar alag ho gaya, is par woh kehte hain ke main munafiq hoon. Nabi Karim salla Allahu alaihi wasallam ne farmaya ”Ae Maaz! Tum logon ko fitna mein mubtala karte ho, teen martaba Aap salla Allahu alaihi wasallam ne yeh farmaya (jab Imam ho to) Surah «wash-shamsi wa duha-ha» aur «sab-bihisma rabbikal-a-la» jaisi suratein parha karo.

Hum se Musaddad ne bayan kiya, kaha hum se Yahya bin Saeed Qattan ne bayan kiya, in se Ismail bin Abi Khalid ne bayan kiya, kaha hum se Qays bin Abi Hazim ne aur in se Abu Masood ne bayan kiya ke ek shakhs Nabi Karim salla Allahu alaihi wasallam ki khidmat mein hazir hua aur arz kiya main subah ki namaz jama'at se falan Imam ki wajah se nahi parhta kyunke woh bahut lambi namaz parhate hain. Unhon ne kaha ke is din in Imam sahab ko nasihat karne mein Nabi Karim salla Allahu alaihi wasallam ko main ne jitna ghussa mein dekha aisa main ne Aap ko kabhi nahi dekha tha, phir Nabi Karim salla Allahu alaihi wasallam ne farmaya ke Ae logo! Tum mein se kuch log (namaz ba-jama'at parhne se) logon ko door karne wale hain, pas jo shakhs bhi logon ko namaz parhaye mukhtasar parhaye, kyunke namaziyon mein koi beemar hota hai koi burha koi kaam-kaj wala.