Aur Allah Ta'ala ne (Surah Baraat mein) farmaya «jaahidil-kuffaara wal-munaafiqeena waghluzh alaihim» ”kuffar aur munafiqeen se jihad kar aur un par sakhti kar.“

Hum se Busrah bin Safwan ne bayan kiya, unhon ne kaha hum se Ibrahim ne bayan kiya, in se Zuhri ne bayan kiya, in se Qasim ne bayan kiya aur in se Aisha razi Allahu anha ne bayan kiya ke Nabi Karim salla Allahu alaihi wasallam andar tashreef laaye aur ghar mein ek parda latka hua tha jis par tasveerein thien. Nabi Karim salla Allahu alaihi wasallam ke chehre ka rang badal gaya. Phir Aap ne parda pakra aur usay phaar diya. Umm al-Momineen ne bayan kiya ke Nabi Karim salla Allahu alaihi wasallam ne farmaya ”Qayamat ke din in logon par sab se zyada azab ho ga, jo yeh suratein banate hain.“

Hum se Musaddad ne bayan kiya, kaha hum se Yahya bin Saeed Qattan ne bayan kiya, in se Ismail bin Abi Khalid ne bayan kiya, kaha hum se Qays bin Abi Hazim ne aur in se Abu Masood ne bayan kiya ke ek shakhs Nabi Karim salla Allahu alaihi wasallam ki khidmat mein hazir hua aur arz kiya main subah ki namaz jama'at se falan Imam ki wajah se nahi parhta kyunke woh bahut lambi namaz parhate hain. Unhon ne kaha ke is din in Imam sahab ko nasihat karne mein Nabi Karim salla Allahu alaihi wasallam ko main ne jitna ghussa mein dekha aisa main ne Aap ko kabhi nahi dekha tha, phir Nabi Karim salla Allahu alaihi wasallam ne farmaya ke Ae logo! Tum mein se kuch log (namaz ba-jama'at parhne se) logon ko door karne wale hain, pas jo shakhs bhi logon ko namaz parhaye mukhtasar parhaye, kyunke namaziyon mein koi beemar hota hai koi burha koi kaam-kaj wala.

Hum se Musa bin Ismail ne bayan kiya, unhon ne kaha hum se Juwayriyah ne bayan kiya, in se Nafi ne bayan kiya aur in se Abdullah bin Masood razi Allahu anhu ne bayan kiya ke Nabi Karim salla Allahu alaihi wasallam namaz parh rahe thay ke Aap salla Allahu alaihi wasallam ne masjid mein qibla ki jaanib munh ka thook dekha. Phir Aap ne usay apne hath se saaf kiya aur ghussa huay phir farmaya jab tum mein se koi shakhs namaz mein hota hai Allah Ta'ala is ke samne hota hai. Is liye koi shakhs namaz mein apne samne na thooke.

Hum se Muhammad bin Salam ne bayan kiya, kaha hum ko Ismail bin Jafar ne khabar di, kaha hum ko Rabia bin Abi Abd-ur-Rahman ne khabar di, unhein Zayd bin Khalid Juhani ne ke ek sahab ne Rasool Allah salla Allahu alaihi wasallam se luqta (rasta mein giri pari cheez jise kisi ne utha liya ho) ke mutalliq poochha to Aap salla Allahu alaihi wasallam ne farmaya saal bhar logon se poochhte raho phir is ka sar-bandhan aur zarf pehchan ke rakh aur kharch kar daal. Phir agar is ke baad is ka maalik aa jaye to woh cheez usay wapas kar de. Poochha: ya Rasool Allah! Bhooli bhatki bakri ke mutalliq kya hukm hai? Aap salla Allahu alaihi wasallam ne farmaya ke usay pakar la kyunke woh tumhare bhai ki hai ya phir bheriye ki ho gi. Poochha: ya Rasool Allah! Aur khoya hua oont? Bayan kiya ke is par Nabi Karim salla Allahu alaihi wasallam naraz ho gaye aur Aap ke donon rukhsar surkh ho gaye, ya rawi ne yun kaha ke Aap ka chehra surkh ho gaya, phir Aap ne farmaya ke tumhein is oont se kya gharaz hai is ke saath to is ke paon hain aur is ka pani hai woh kabhi na kabhi apne maalik ko pa le ga.

Aur Makki bin Ibrahim ne bayan kiya unhon ne kaha ke hum se Abdullah bin Saeed ne bayan kiya (doosri sanad) Imam Bukhari rahmahullah ne kaha aur mujh se Muhammad bin Ziyad ne bayan kiya, unhon ne kaha hum se Muhammad bin Jafar ne bayan kiya, unhon ne kaha hum se Abdullah bin Saeed ne bayan kiya, unhon ne kaha ke mujh se Amr bin Ubaidullah ke ghulam Salim Abu al-Nadr ne bayan kiya, in se Busr bin Saeed ne bayan kiya aur in se Zayd bin Sabit razi Allahu anhu ne bayan kiya ke Rasool Allah salla Allahu alaihi wasallam ne khajoor ki shakhon ya boriye se ek makan chhote se hujre ki tarah bana liya tha. Wahan aa kar Aap tahajjud ki namaz parha karte thay, chand log bhi wahan aa gaye aur unhon ne Aap ki iqteda mein namaz parhi phir sab log doosri raat bhi aa gaye aur thehre rahe lekin Aap ghar hi mein rahe aur bahar in ke paas tashreef nahi laaye. Log aawaz buland karne lage aur darwaze par kankariyaan maarien to Nabi Karim salla Allahu alaihi wasallam ghussa ki halat mein bahar tashreef laaye aur farmaya tum chahte ho ke hamesha yeh namaz parhte raho taake tum par farz ho jaye (is waqt mushkil ho) dekho tum nafl namazein apne gharon mein hi parha karo. Kyunke farz namazon ke siwa aadmi ki behtareen nafl namaz woh hai jo ghar mein parhi jaye.