Mujh se Yaqoob bin Ibrahim ne byaan kiya, kaha hum se Hushaym ne byaan kiya, kaha hum ko Sayyar ne khabar di, unhein Shabi ne, unhein Jabir bin Abdullah razi Allahu anhuma ne, unhon ne byaan kiya ke hum Nabi Karim salla Allahu alaihi wasallam ke saath ek ghazwa (Ghazwa Tabook) mein thay. Wapas hote huay jab hum Madinah Munawwarah ke qareeb pahunche to main ne apne sust-raftar oont ko teiz chalane laga. Ek sahab ne peeche se mere qareeb pahunch kar mere oont ko ek chhari se jo un ke paas thi, maara. Is se oont bari achhi chaal chalne laga, jaisa ke tum ne achhe oonton ko chalte huay dekha ho ga. Main ne murr kar dekha to Rasool Allah salla Allahu alaihi wasallam thay. Main ne arz kiya: ya Rasool Allah! Meri nayi shadi hui hai. Nabi Karim salla Allahu alaihi wasallam ne is par poocha, kya tum ne shadi kar li? Main ne arz kiya ke ji haan. Daryaft farmaya, kunwari se ki hai ya bewa se? Byaan kiya ke main ne arz kiya ke bewa se ki hai. Nabi Karim salla Allahu alaihi wasallam ne farmaya ke kunwari se kyun na ki? Tum is ke saath khelte aur woh tumhare saath khelti. Byaan kiya ke phir jab hum Madinah pahunche to shehar mein dakhil hone lage lekin Aap salla Allahu alaihi wasallam ne farmaya ke thehar jao raat ho jaye phir dakhil hona taake paraganda baal aurat choti kangha kar le aur jis ka shohar maujood na raha ho woh mu-e-zer-e-naaf saaf kar le.

Hum se Khalad bin Yahya ne bayan kiya , kaha hum se Misar ne , kaha hum se Muharib bin Dithar ne Jabir bin Abdullah ke wastay se , woh kehte hain ke mein Nabi Karim salla Allahu alaihi wa sallam ki khidmat mein hazir hua . Aap salla Allahu alaihi wa sallam is waqt masjid mein tashreef farma thay . Misar ne kaha mera khayal hai ke Muharib ne chasht ka waqt bataya tha . Nabi Karim salla Allahu alaihi wa sallam ne farmaya ke pehle do rakat namaz parh aur mera Nabi Karim salla Allahu alaihi wa sallam par kuch qarz tha . Jisay aap salla Allahu alaihi wa sallam ne ada kiya aur zyada hi diya .

Hum se Muhammad Bin Bashar ne bayan kiya, kaha ke hum se Abdul Wahhab ne bayan kiya, kaha ke hum se Ubaidullah ne bayan kiya, un se Wahb Bin Kaisan ne bayan kiya aur un se Jabir Bin Abdullah (Radi Allahu Anhuma) ne bayan kiya ke mein Nabi Kareem (Sallallahu Alaihi Wasallam) ke sath ek ghazwa (Dhat-ul-Riqa ya Tabuk) mein tha. Mera ont thak kar sust ho gaya. Itne mein mere paas Nabi Kareem (Sallallahu Alaihi Wasallam) tashreef laye aur farmaya Jabir! mein ne arz kiya: ya Rasul Allah! hazir hoon. Farmaya kya baat hui ? mein ne kaha ke mera ont thak kar sust ho gaya hai, chalta hi nahi is liye mein peeche reh gaya hoon. Phir aap apni sawari se utre aur mere isi ont ko ek teerhay munh ki lakri se kheenchne lage (yaani hank-ne lage) aur farmaya ke ab sawar ho ja. Chunanche mein sawar ho gaya. Ab to ye haal hua ke mujhe usay Rasul Allah (Sallallahu Alaihi Wasallam) ke barabar pohanchne se rokna par jata tha. Aap (Sallallahu Alaihi Wasallam) ne daryaft farmaya, Jabir tu ne shadi bhi kar li hai ? mein ne arz ki ji han! daryaft farmaya kisi kunwari larki se ki hai ya bewa se. mein ne arz kiya ke mein ne to ek bewa se kar li hai. Farmaya, kisi kunwari larki se kyun na ki ke tum is ke sath khelte aur wo bhi tumhare sath khelti. (Jabir bhi kunware thay) mein ne arz kiya ke meri kai behenein hain. (aur meri maan ka intiqal ho chuka hai) is liye mein ne yehi pasand kiya ke aisi aurat se shadi karoon, jo unhein jama rakkhe. un ke kangha kare aur un ki nigrani kare. Phir Aap (Sallallahu Alaihi Wasallam) ne farmaya ke accha ab tum ghar pohanch kar khair-o-afiyat ke sath khoob maze urana. Is ke baad farmaya, kya tum apna ont becho ge ? mein ne kaha ji han! chunanche Aap (Sallallahu Alaihi Wasallam) ne ek oqiya chandi mein khareed liya, Rasul Allah (Sallallahu Alaihi Wasallam) mujh se pehle hi Madinah pohanch gaye thay. Aur mein doosre din subah ko pohancha. Phir hum masjid aaye to Nabi Kareem (Sallallahu Alaihi Wasallam) masjid ke darwaza par mile. Aap (Sallallahu Alaihi Wasallam) ne daryaft farmaya, kya abhi aaye ho ? mein ne arz kiya ke ji han! farmaya, phir apna ont chor de aur masjid mein ja ke do rak'at namaz parh. Mein andar gaya aur namaz parhi. Is ke baad Aap (Sallallahu Alaihi Wasallam) ne Bilal (Radi Allahu Anhu) ko hukm diya ke mere liye ek oqiya chandi tol de. Unhon ne ek oqiya chandi jhukti hui tol di. Mein peeth morr kar chala to Aap (Sallallahu Alaihi Wasallam) ne farmaya ke Jabir ko zara bulao. Mein ne socha ke shayad ab mera ont phir mujhe wapas karein ge. Halankay is se zyada nagawar mere liye koi cheez nahi thi. Chunanche Aap (Sallallahu Alaihi Wasallam) ne yehi farmaya ke ye apna ont le ja aur is ki qeemat bhi tumhari hai
.

Hum se Makki Bin Ibrahim ne bayan kiya, kaha ke hum se Ibn Jurayj ne bayan kiya, un se Ata Bin Abi Rabah aur kai logon ne ek doosre ki riwayat mein ziyadati ke sath. Sab rawiyon ne is hadees ko Jabir (Radi Allahu Anhu) tak nahi pahunchaya balkay ek rawi ne un mein se mursalan riwayat kiya hai. Wo Jabir Bin Abdullah (Radi Allahu Anhuma) se riwayat karte hain ke unhon ne bayan kiya, mein Rasul Allah (Sallallahu Alaihi Wasallam) ke sath ek safar mein tha aur mein ek sust oont par sawar tha aur wo sab se aakhir mein rehta tha. Ittifaq se Nabi Kareem (Sallallahu Alaihi Wasallam) ka guzar meri taraf se hua to Aap (Sallallahu Alaihi Wasallam) ne farmaya ye kaun sahab hain ? Mein ne arz kiya Jabir Bin Abdullah, Aap (Sallallahu Alaihi Wasallam) ne farmaya kya baat hui (ke itne peeche reh gaye ho) mein bola ke ek nihayat sust raftar oont par sawar hoon. Aap (Sallallahu Alaihi Wasallam) ne farmaya, tumhare paas koi chhari bhi hai ? Mein ne kaha ke ji han hai. Aap (Sallallahu Alaihi Wasallam) ne farmaya ke wo mujhe de-day. Mein ne Aap ki khidmat mein wo pesh kar di. Aap ne is chhari se oont ko jo maara aur danta to is ke baad wo sab se aage rehne laga. Nabi Kareem (Sallallahu Alaihi Wasallam) ne phir farmaya ke ye oont mujhe farokht kar day. Mein ne arz kiya ke Ya Rasul Allah! ye to Aap (Sallallahu Alaihi Wasallam) ka hi hai, lekin Aap (Sallallahu Alaihi Wasallam) ne farmaya ke ise mujhe farokht kar day. Ye bhi farmaya ke chaar dinar mein ise mein khareedta hoon waise tum Madinah tak isi par sawar ho kar chal sakte ho. Phir jab Madinah ke qareeb hum pahunche to mein (doosri taraf) jane laga. Aap (Sallallahu Alaihi Wasallam) ne daryaft farmaya ke kahan ja rahe ho ? Mein ne arz kiya ke mein ne ek bewa aurat se shadi kar li hai Aap (Sallallahu Alaihi Wasallam) ne farmaya ke kisi bakira se kyun na ki ke tum bhi us ke sath khelte aur wo bhi tumhare sath khelti. Mein ne arz kiya ke walid shahadat pa chuke hain. Aur ghar mein kai behnein hain. Is liye mein ne socha ke kisi aisi khatoon se shadi karoon jo bewa aur tajurbah-kar ho. Aap (Sallallahu Alaihi Wasallam) ne farmaya ke phir to theek hai, phir Madinah pahunchne ke baad Aap (Sallallahu Alaihi Wasallam) ne farmaya ke Bilal! in ki qeemat ada kar do aur kuch barha kar day do. Chunanche unhon ne chaar dinar bhi diye. Aur faltu ek qiraat bhi diya. Jabir (Radi Allahu Anhu) kaha karte thay ke Nabi Kareem (Sallallahu Alaihi Wasallam) ka ye inam mein apne se kabhi juda nahi karta, chunanche Nabi Kareem (Sallallahu Alaihi Wasallam) ka wo qiraat Jabir (Radi Allahu Anhu) hamesha apni theili mein mahfooz rakkha karte thay
.

Hum se Muhammad Bin Yusuf Bikandi ne bayan kiya, kaha ke hum ko Jarir ne khabar di, unhein Mugheerah ne, unhein Shabi ne aur un se Jabir Bin Abdullah (Radi Allahu Anhuma) ne bayan kiya ke mein Rasul Allah (Sallallahu Alaihi Wasallam) ke sath ek ghazwa mein shareek tha. Aap (Sallallahu Alaihi Wasallam) ne farmaya, apne oont ke baare mein tumhari kya raye hai. Kya tum ise bechoge ? Mein ne kaha han, chunanche oont mein ne Aap (Sallallahu Alaihi Wasallam) ko bech diya. Aur jab Aap (Sallallahu Alaihi Wasallam) Madinah pahunche. To subah oont ko lay kar mein Aap (Sallallahu Alaihi Wasallam) ki khidmat mein hazir ho gaya. Aap (Sallallahu Alaihi Wasallam) ne mujhe is ki qeemat ada kar di
.

Hum se Muslim Bin Ibrahim ne bayan kiya, kaha hum se Abu Aqeel ne bayan kiya, un se Abul Mutawakkil Naaji ne bayan kiya ke mein Jabir Bin Abdullah (Radi Allahu Anhuma) ki khidmat mein hazir hua to unhon ne bayan kiya ke Nabi Kareem (Sallallahu Alaihi Wasallam) masjid mein tashreef rakhte thay. Is liye mein bhi masjid ke andar chala gaya. Albatta oont balat ke ek kinare par baandh diya. Aap (Sallallahu Alaihi Wasallam) se mein ne arz kiya ke Ya Rasul Allah! Aap ka oont hazir hai. Aap (Sallallahu Alaihi Wasallam) bahar tashreef laye aur oont ke chaaron taraf tehalne lage. Phir farmaya ke qeemat bhi lay aur oont bhi lay ja
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya Muharib Bin Disar se aur unhon ne Jabir Bin Abdullah (Radi Allahu Anhuma) se suna, Aap farmate thay ke mein ne Nabi Kareem (Sallallahu Alaihi Wasallam) ko safar mein ek ont becha tha. Jab hum Madinah pahunche to Aap (Sallallahu Alaihi Wasallam) ne farmaya ke masjid mein ja kar do rakat namaz parh, phir Aap (Sallallahu Alaihi Wasallam) ne wazan kiya. Shuba ne bayan kiya, mera khayal hai ke (Jabir Radi Allahu Anhu ne kaha) mere liye wazan kiya (Aap Sallallahu Alaihi Wasallam ke hukm se Bilal Radi Allahu Anhu ne) aur (is palre ko jis mein sikka tha) jhuka diya. (Taake mujhe zyada mile) is mein se kuch thora sa mere paas jab se mehfooz tha. Lekin Shaam wale (Omvi lashkar) Yaum-e-Harrah ke moqa par mujh se chheen kar le gaye
.

Hum se Abu Nuaim Fazl Bin Dukain ne bayan kiya, kaha hum se Zakariya ne bayan kiya, kaha ke mein ne Aamir se suna, unhon ne bayan kiya ke mujh se Jabir (Radi Allahu Anhu) ne bayan kiya ke wo (ek ghazwa ke moqa par) apne oont par sawar aa rahe thay, oont thak gaya tha. Nabi Kareem (Sallallahu Alaihi Wasallam) ka idhar se guzar hua to Aap (Sallallahu Alaihi Wasallam) ne oont ko ek zarb lagayi aur us ke haq mein dua farmayi, chunancha oont itni tezi se chalne laga ke kabhi is tarah nahi chala tha. Phir Aap (Sallallahu Alaihi Wasallam) ne farmaya ke ise ek oqiyah mein mujhe bech do. Mein ne inkar kiya magar Aap (Sallallahu Alaihi Wasallam) ke israr par phir mein ne Aap (Sallallahu Alaihi Wasallam) ke hath bech diya, lekin apne ghar tak is par sawari ko mustasna kara liya. Phir jab hum (Madinah) pahunch gaye, to mein ne oont Aap (Sallallahu Alaihi Wasallam) ko pesh kar diya aur Aap (Sallallahu Alaihi Wasallam) ne is ki qeemat bhi ada kar di, lekin jab mein wapas hone laga to mere peeche ek sahab ko mujhe bulane ke liye bheja (mein hazir hua to) Aap (Sallallahu Alaihi Wasallam) ne farmaya ke mein tumhara oont koi le thora hi raha tha, apna oont le jao, ye tumhara hi maal hai. (Aur qeemat wapas nahi li) Shuba ne Mugheerah ke waste se bayan kiya, un se Aamir ne aur un se Jabir (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne Madinah tak oont par mujhe sawar hone ki ijazat di thi, Ishaq ne Jarir se bayan kiya aur un se Mugheerah ne ke (Jabir Radi Allahu Anhu ne farmaya tha) pas mein ne oont is shart par bech diya ke Madinah pahunchne tak is par mein sawar rahoon ga. Ata waghairah ne bayan kiya ke (Rasul Allah Sallallahu Alaihi Wasallam ne farmaya tha) is par Madinah tak ki sawari tumhari hai. Muhammad Bin Munkadir ne Jabir (Radi Allahu Anhu) se bayan kiya ke unhon ne Madinah tak sawari ki shart lagayi thi. Zaid Bin Aslam ne Jabir (Radi Allahu Anhu) ke wasita se bayan kiya ke (Rasul Allah Sallallahu Alaihi Wasallam ne farmaya tha) Madinah tak is par tum hi raho ge. Abu Zubair ne Jabir (Radi Allahu Anhu) se bayan kiya ke Madinah tak ki sawari ki Aap (Sallallahu Alaihi Wasallam) ne mujhe ijazat di thi. Aamash ne Salim se bayan kiya aur un se Jabir (Radi Allahu Anhu) ne ke (Rasul Allah Sallallahu Alaihi Wasallam ne farmaya) apne ghar tak tum isi par sawar ho ke jao. Ubaidullah aur Ibn Ishaq ne Wahab se bayan kiya aur un se Jabir (Radi Allahu Anhu) ne ke oont ko Rasul Allah (Sallallahu Alaihi Wasallam) ne ek oqiyah mein khareeda tha. Is riwayat ki mutabiat Zaid Bin Aslam ne Jabir (Radi Allahu Anhu) se ki hai. Ibn Juraij ne Ata waghairah se bayan kiya aur un se Jabir (Radi Allahu Anhu) ne (ke Nabi Kareem Sallallahu Alaihi Wasallam ne farmaya tha) mein tumhara ye oont char dinar mein leta hoon, is hisab se ke ek dinar das dirham ka hota hai, char dinar ka ek oqiyah hoga. Mugheerah ne Shabi ke wasita se aur unhon ne Jabir (Radi Allahu Anhu) se (un ki riwayat mein aur) isi tarah Ibn Munkadir aur Abu Zubair ne Jabir (Radi Allahu Anhu) se apni riwayat mein qeemat ka zikr nahi kiya hai. Aamash ne Salim se aur unhon ne Jabir (Radi Allahu Anhu) se apni riwayat mein ek oqiyah sone ki wazahat ki hai. Abu Ishaq ne Salim se aur unhon ne Jabir (Radi Allahu Anhu) se apni riwayat mein do so dirham bayan kiye hain aur Dawood Bin Qais ne bayan kiya, un se Ubaidullah Bin Miqsam ne aur un se Jabir (Radi Allahu Anhu) ne ke Aap (Sallallahu Alaihi Wasallam) ne oont Tabook ke raste mein (ghazwa se wapas hote hue) khareeda tha. Mera khayal hai ke unhon ne kaha ke char oqiyah mein (khareeda tha) Abu Nazrah ne Jabir (Radi Allahu Anhu) se riwayat mein bayan kiya ke bees dinar mein khareeda tha. Shabi ke bayan ke mutabiq ek oqiyah hi zyada riwayaton mein hai. Isi tarah shart lagana bhi zyada riwayaton se sabit hai aur mere nazdeek sahi bhi yehi hai, ye Abu Abdullah (Imam Bukhari Rahimahullah) ne farmaya
.

Hum se Ishaq Bin Ibrahim ne bayan kiya, kaha hum ko Jarir ne khabar di, unhein Mugheera ne, unhein Shabi ne aur un se Jabir Bin Abdullah (Radi Allahu Anhuma) ne bayan kiya ke mein Rasul Allah (Sallallahu Alaihi Wasallam) ke sath ek ghazwah (jung Tabook) mein shareek tha. Unhon ne bayan kiya ke Rasul Allah (Sallallahu Alaihi Wasallam) peeche se aa kar mere paas tashreef laye. Mein apne pani ladne wale ek oont par sawar tha. Chunke wo thak chuka tha, is liye aahista aahista chal raha tha. Aap (Sallallahu Alaihi Wasallam) ne mujh se daryaft farmaya ke Jabir! Tumhare oont ko kya ho gaya hai? Mein ne arz kiya ke thak gaya hai. Jabir (Radi Allahu Anhu) ne bayan kiya ke phir Aap (Sallallahu Alaihi Wasallam) peeche gaye aur use danta aur us ke liye dua ki. Phir to wo barabar doosre oonton ke aage aage chalta raha. Phir Aap (Sallallahu Alaihi Wasallam) ne daryaft farmaya, apne oont ke mutalliq kya khayal hai? Mein ne kaha ke ab accha hai. Aap ki barkat se aisa ho gaya hai. Aap (Sallallahu Alaihi Wasallam) ne farmaya phir kya ise becho ge? Unhon ne bayan kiya ke mein sharminda ho gaya, kyunke hamare paas pani lane ko is ke siwa aur koi oont nahi raha tha. Magar mein ne arz kiya, ji haan! Aap (Sallallahu Alaihi Wasallam) ne farmaya phir bech de. Chunancha mein ne wo oont Aap (Sallallahu Alaihi Wasallam) ko bech diya aur ye tay paya ke Madinah tak mein isi par sawar ho kar jaun ga. Bayan kiya ke mein ne arz kiya, ya Rasul Allah! Meri shadi abhi nayi hui hai. Mein ne Aap (Sallallahu Alaihi Wasallam) se (aage barh kar apne ghar jaane ki) ijazat chahi to Aap (Sallallahu Alaihi Wasallam) ne ijazat inayat farma di. Is liye mein sab se pehle Madinah pahunch aaya. Jab mamun se mulaqat hui to unhon ne mujh se oont ke mutalliq poocha. Jo mamla mein kar chuka tha is ki unhein itla di. To unhon ne mujhe bura bhala kaha. (Ek oont tha tere paas wo bhi bech dala ab pani kis par laye ga) Jab mein ne Nabi Kareem (Sallallahu Alaihi Wasallam) se ijazat chahi thi to Aap (Sallallahu Alaihi Wasallam) ne mujh se daryaft farmaya tha ke kunwari se shadi ki hai ya bewa se? Mein ne arz kiya tha bewa se is par Aap (Sallallahu Alaihi Wasallam) ne farmaya tha ke bakira se kyun na ki, wo bhi tumhare sath khelti aur tum bhi us ke sath khelte. (Kyunke Jabir Radi Allahu Anhu bhi abhi kunware thay) Mein ne kaha ya Rasul Allah! Mere baap ki wafat ho gayi hai ya (ye kaha ke) wo (Uhud) mein shaheed ho chuke hain aur meri chhoti chhoti behenein hain. Is liye mujhe accha nahi maloom hua ke unhein jaisi kisi larki ko byah ke laun, jo na unhein adab sikha sake na un ki nigrani kar sake. Is liye mein ne bewa se shadi ki taake wo un ki nigrani kare aur unhein adab sikhaye. Unhon ne bayan kiya, phir jab Nabi Kareem (Sallallahu Alaihi Wasallam) Madinah pahunche to subah ke waqt mein isi oont par Aap (Sallallahu Alaihi Wasallam) ki khidmat mein hazir hua. Aap (Sallallahu Alaihi Wasallam) ne mujhe is oont ki qeemat ata farmai aur phir wo oont bhi wapas kar diya. Mugheera rawi (Rahimahullah) ne kaha ke hamare nazdeek baia mein ye shart lagana accha hai kuch bura nahi
.

Hum se Muhammad Bin Salam ne bayan kiya, kaha hum ko Wakee ne khabar di, unhein Shuba ne, unhein Muharib Bin Dithar ne aur unhein Jabir Bin Abdullah (Radi Allahu Anhuma) ne ke Nabi Kareem (Sallallahu Alaihi Wasallam) jab Madinah tashreef laye (Ghazwa Tabuk ya Zat-ur-Riqa se) to ont ya gaye zibah ki (rawi ko shubha hai) Maaz Anbari ne (apni riwayat mein) kuch ziyadati ke sath kaha. Un se Shuba ne bayan kiya, un se Muharib Bin Dithar ne, unhon ne Jabir Bin Abdullah (Radi Allahu Anhuma) se suna ke Nabi Kareem (Sallallahu Alaihi Wasallam) ne mujh se ont khareeda tha. Do auqiya aur ek dirham ya (rawi ko shubha hai ke do auqiya) do dirham mein. Jab Aap maqam Sirar par pahunche to Aap ne hukm diya aur gaye zibah ki gayi aur logon ne is ka gosht khaya. Phir jab Aap Madinah Munawwarah pahunche to mujhe hukm diya ke pehle masjid mein ja kar do rakat namaz parhoon, is ke baad mujhe mere ont ki qemat wazan kar ke inayait farmayi
.

Hum se Qutaiba ne bayan kiya, kaha hum se Sufyan Bin Uyainah ne bayan kiya, kaha hum ko Amr Bin Dinar ne khabar di aur un se Jabir Bin Abdullah Ansari (Radi Allahu Anhuma) ne bayan kiya ke Rasul Allah Sallallahu Alaihi Wasallam ne mujh se daryaft farmaya ”Jabir! Kya nikah kar liya?“ Mein ne arz kiya, ji haan. Nabi Kareem Sallallahu Alaihi Wasallam ne farmaya ”Kunwari se ya bewa se?“ Mein ne arz kiya ke bewa se. Aap Sallallahu Alaihi Wasallam ne farmaya ”Kisi kunwari larki se kyun na kiya? Jo tumhare sath khela karti.“ Mein ne arz kiya: Ya Rasul Allah! Mere walid Uhud ki larayi mein shaheed ho gaye. Nau larkiyan chorin. Pas meri nau bahenen maujood hain. Isi liye mein ne munasib nahi khayal kiya ke unhein jaisi na-tajrubah kar larki in ke pas la kar bitha doon, balkey ek aisi aurat laon jo in ki dekh bhaal kar sake aur in ki safai-o-suthrayi ka khayal rakhe. Aap Sallallahu Alaihi Wasallam ne farmaya ke tum ne accha kiya
.

`Hum se Abu Nu'man ne bayan kiya, kaha hum se Hushaim ne bayan kiya, kaha hum se Sayyar bin Abi Sayyar ne bayan kiya, un se Aamir Shabi ne aur un se Jabir bin Abdullah Radi Allahu Anhuma ne bayan kiya ke hum Nabi Kareem صلی اللہ علیہ وسلم ke saath ek jihad se wapas ho rahe thay. Mein apne oont ko, jo sust tha tez chalane ki koshish kar raha tha. Itne mein mere peeche se ek suwar mujh se aa kar mila aur apna naiza mere oont ko chabhoo diya. Is ki wajah se mera oont tez chal para jaisa ke kisi umda qism ke oont ki chaal tum ne dekhi ho gi. Achanak Nabi Kareem صلی اللہ علیہ وسلم mil gaye. Nabi Kareem صلی اللہ علیہ وسلم ne daryaft farmaya jaldi kyun kar rahe ho? Mein ne arz kiya abhi meri shadi nayi hui hai. Aap صلی اللہ علیہ وسلم ne daryaft farmaya ke kanwari se ya bewa se? Mein ne arz kiya ke bewa se. Nabi Kareem صلی اللہ علیہ وسلم ne is par farmaya ke kisi kanwari se kyun na ki tum is ke saath khel kood karte aur wo tumhare saath karti. Bayan kiya ke phir jab hum Madinah mein dakhil hone wale thay to Aap صلی اللہ علیہ وسلم ne farmaya ke thodi der thehar jao aur raat ho jaye tab dakhil ho taake pareshan balon wali kangha kar lewe aur jin ke shohar maujood nahi thay wo apne baal saaf kar lein.

`Hum se Adam bin Abi Ayas ne bayan kiya, kaha hum se Shu'ba ne bayan kiya, kaha hum se Muharib bin Disar ne bayan kiya, kaha ke mein ne Jabir bin Abdullah Radi Allahu Anhuma se suna, unhon ne arz kiya ke mein ne shadi ki to Nabi Kareem صلی اللہ علیہ وسلم ne mujh se daryaft farmaya ke kis se shadi ki hai? Mein ne arz kiya ke ek aurat se. Aap صلی اللہ علیہ وسلم ne farmaya kanwari se kyun na ki ke is ke saath tum khel kood karte. Muharib ne kaha ke phir mein ne Nabi Kareem صلی اللہ علیہ وسلم ka yeh irshad Amr bin Dinar se bayan kiya to unhon ne kaha ke mein ne Jabir bin Abdullah Radi Allahu Anhuma se suna hai. Mujh se unhon ne Nabi Kareem صلی اللہ علیہ وسلم ka farman is tarah bayan kiya ke Rasul Allah صلی اللہ علیہ وسلم ne mujh se farmaya ke tum ne kisi kanwari aurat se shadi kyun na ki ke tum is ke saath khel kood karte aur wo tumhare saath khelti.

Hum se Musaddad bin Musarhad ne byaan kiya, in se Hushaym bin Bashir ne, un se Sayyar bin Darwan ne, un se Aamir Shabi ne aur un se Jabir razi Allahu anhu ne byaan kiya ke main Rasool Allah salla Allahu alaihi wasallam ke saath ek jihad (Ghazwa Tabook) mein tha, jab hum wapas ho rahe thay to main apne sust-raftar oont ko teiz chalane ki koshish kar raha tha. Itne mein mere peeche se ek sawar mere qareeb aaye. Main ne murr kar dekha to Rasool Allah salla Allahu alaihi wasallam thay. Aap salla Allahu alaihi wasallam ne farmaya jaldi kyun kar rahe ho? Main ne arz kiya ke meri shadi abhi nayi hui hai. Aap salla Allahu alaihi wasallam ne daryaft farmaya, kunwari aurat se tum ne shadi ki ya bewa se? Main ne arz kiya ke bewa se. Aap salla Allahu alaihi wasallam ne is par farmaya, kunwari se kyun na ki? Tum is ke saath khelte aur woh tumhare saath khelti. Jabir ne byaan kiya ke phir jab hum Madinah pahunche to hum ne chaha ke shehar mein dakhil ho jayein lekin Aap salla Allahu alaihi wasallam ne farmaya ke thehar jao. Raat ho jaye phir dakhil hona taake tumhari biwiyaan jo paraganda baal hain woh kanghi choti kar lein aur jin ke khawand ghaib thay woh mu-e-zer-e-naaf saaf kar lein. Hushaym ne byaan kiya ke mujh se ek motabar rawi ne byaan kiya ke Nabi Karim salla Allahu alaihi wasallam ne yeh bhi farmaya ke «al-kaysu, al-kaysu» yani Ae Jabir! Jab tu ghar pahunche to khoob khoob «kaysu» kijo (Imam Bukhari rahmahullah ne kaha) «kaysu» ka matlab hai ke aulad hone ki khwahish kijo.

Hum se Musaddad bin Musarhad ne byaan kiya , kaha hum se Hammad bin Zayd ne , in se Amr ne aur in se Jabir bin Abdullah razi Allahu anhuma ne ke meere walid shaheed ho gaye aur unhon ne saat larkiyaan chhorien ya (rawi ne kaha ke) nau larkiyaan . Chunanche main ne ek pehle ki shadi shuda aurat se nikah kiya . Rasool Allah salla Allahu alaihi wasallam ne mujh se daryaft farmaya ke Jabir! tum ne shadi ki hai ? Main ne kaha ji haan . Farmaya , kunwari se ya biyahi se . Main ne arz kiya ke biyahi se . Farmaya tum ne kisi kunwari larki se shadi kyun na ki . tum is ke saath khelte aur woh tumhare saath khelti . tum is ke saath hansi mazaaq karte aur woh tumhare saath hansi karti . Jabir razi Allahu anhu ne byaan kiya ke is par main ne Nabi Karim salla Allahu alaihi wasallam se arz kiya ke Abdullah (meere walid) shaheed ho gaye aur unhon ne kai larkiyaan chhori hain , is liye main ne yeh pasand nahi kiya ke in ke paas in hi jaisi larki biyah laoon , is liye main ne ek aaisi aurat se shadi ki hai jo in ki dekh-bhaal kar sake aur in ki islah ka khayal rakkhe . Nabi Karim salla Allahu alaihi wasallam ne is par farmaya ke Allahtumhein barkat de ya (rawi ko shak thu) Nabi Karim salla Allahu alaihi wasallam ne «khairan» farmaya yani Allahtum ko khair ata kare .

Hum se Abu al-Nu-man ne bayan kiya, kaha hum se Hammad bin Zayd ne bayan kiya, in se Amr ne aur in se Jabir razi Allahu anhu ne bayan kiya ke mere walid shaheed huay to unhon ne saat ya nau larkiyaan chhorri thien (rawi ko tadaad mein shubha thu) phir main ne ek aurat se shadi ki to Rasool Allahsalla Allahu alaihi wasallam ne daryaft farmaya ke Jabir kiya tum ne shadi kar li hai? Main ne kaha ji haan. Farmaya kunwari se ya bewa se? Main ne biyahi se. Farmaya, kisi larki (kunwari) se kyun na ki. tum is ke saath khelte aur woh tumhare saath khelti ya (Aap salla Allahu alaihi wasallam ne farmaya ke) tum usay hansate aur woh tumhein hansati. Main ne arz ki, mere walid (Abdullah) shaheed huay aur saat ya nau larkiyaan chhorri hain. Is liye main ne pasand nahi kiya ke main in ke paas unhi jaisi larki laoon. Chunanche main ne aaisi aurat se shadi ki jo in ki nigrani kar sake. Nabi Karim salla Allahu alaihi wasallam ne farmaya ke Allah tumhein barkat ata farmaiye. Ibn Uyaynah aur Muhammad bin Maslamah ne Amr se riwayat mein ”Allah tumhein barkat ata farmaiye“ ke alfaz nahi kahe.