Aur Abdullah Bin Umar (Radi Allahu Anhuma) (jab safar se wapas aate to) mulaqatiyon ke aane ki wajah se roza nahi rakhte thay
.

Hum se Muhammad Bin Salam ne bayan kiya, kaha hum ko Wakee ne khabar di, unhein Shuba ne, unhein Muharib Bin Dithar ne aur unhein Jabir Bin Abdullah (Radi Allahu Anhuma) ne ke Nabi Kareem (Sallallahu Alaihi Wasallam) jab Madinah tashreef laye (Ghazwa Tabuk ya Zat-ur-Riqa se) to ont ya gaye zibah ki (rawi ko shubha hai) Maaz Anbari ne (apni riwayat mein) kuch ziyadati ke sath kaha. Un se Shuba ne bayan kiya, un se Muharib Bin Dithar ne, unhon ne Jabir Bin Abdullah (Radi Allahu Anhuma) se suna ke Nabi Kareem (Sallallahu Alaihi Wasallam) ne mujh se ont khareeda tha. Do auqiya aur ek dirham ya (rawi ko shubha hai ke do auqiya) do dirham mein. Jab Aap maqam Sirar par pahunche to Aap ne hukm diya aur gaye zibah ki gayi aur logon ne is ka gosht khaya. Phir jab Aap Madinah Munawwarah pahunche to mujhe hukm diya ke pehle masjid mein ja kar do rakat namaz parhoon, is ke baad mujhe mere ont ki qemat wazan kar ke inayait farmayi
.

Hum se Abu Waleed ne bayan kiya, kaha hum se Shuba ne bayan kiya, un se Muharib Bin Dithar ne aur un se Jabir Bin Abdullah (Radi Allahu Anhuma) ne bayan kiya ke mein safar se wapas Madinah pahuncha to Aap (Sallallahu Alaihi Wasallam) ne mujhe hukm diya ke masjid mein ja kar do rakat nafal namaz parhoon, Sirar (Madinah Munawwarah se teen meel ke fasle par mashriq mein) ek jagah ka naam hai
.