Hum se Muhammad Bin Yusuf ne bayan kiya, kaha hum se Ibn Uyainah ne bayan kiya, un se Amr ne, un se Jabir Bin Abdullah (Radi Allahu Anhuma) ne bayan kiya ke ye ayat hamare bare mein nazil hui thi «iz hammat taifatani minkum an tafshala» (Aal-e-Imran: 122) yani Bani Haritha aur Bani Salama ke bare mein. Meri khwahish nahi hai ke ye ayat nazil na hoti, jab ke Allah aage farma raha hai «wallahu waliyyuhuma» ”Aur Allah in dono jamaaton ka madadgaar tha“
.

Hum se Qutaiba ne bayan kiya, kaha hum se Sufyan Bin Uyainah ne bayan kiya, kaha hum ko Amr Bin Dinar ne khabar di aur un se Jabir Bin Abdullah Ansari (Radi Allahu Anhuma) ne bayan kiya ke Rasul Allah Sallallahu Alaihi Wasallam ne mujh se daryaft farmaya ”Jabir! Kya nikah kar liya?“ Mein ne arz kiya, ji haan. Nabi Kareem Sallallahu Alaihi Wasallam ne farmaya ”Kunwari se ya bewa se?“ Mein ne arz kiya ke bewa se. Aap Sallallahu Alaihi Wasallam ne farmaya ”Kisi kunwari larki se kyun na kiya? Jo tumhare sath khela karti.“ Mein ne arz kiya: Ya Rasul Allah! Mere walid Uhud ki larayi mein shaheed ho gaye. Nau larkiyan chorin. Pas meri nau bahenen maujood hain. Isi liye mein ne munasib nahi khayal kiya ke unhein jaisi na-tajrubah kar larki in ke pas la kar bitha doon, balkey ek aisi aurat laon jo in ki dekh bhaal kar sake aur in ki safai-o-suthrayi ka khayal rakhe. Aap Sallallahu Alaihi Wasallam ne farmaya ke tum ne accha kiya
.

Hum se Ahmad Bin Abi Shuraih ne bayan kiya, kaha hum ko Ubaidullah Bin Musa ne khabar di, un se Shaiban ne bayan kiya, un se Firas ne, un se Shabi ne bayan kiya ke mein ne Jabir Bin Abdullah (Radi Allahu Anhuma) se suna ke in ke walid (Abdullah Radi Allahu Anhu) Uhud ki larayi mein shaheed ho gaye thay aur qarz chor gaye thay aur che larkiyan bhi. Jab darakhton se khajoor utare jane ka waqt qareeb aaya to unhon ne bayan kiya ke mein Nabi Kareem Sallallahu Alaihi Wasallam ki khidmat mein hazir hua aur arz kiya ke jaisa ke Aap ke ilm mein hai, mere walid sahib Uhud ki larayi mein shaheed ho gaye aur qarz chor gaye hain, mein chahta tha ke qarz khwah Aap ko dekh lein (aur kuch narmi bartein) Aap Sallallahu Alaihi Wasallam ne farmaya ke jao aur har qism ki khajoor ka alag alag dher laga lo. Mein ne hukm ke mutabiq amal kiya aur phir Aap ko bulane gaya. Jab qarz khwahon ne Aap ko dekha to jaise is waqt mujh par aur zyada bhark utthe. (Kyunke wo yahoodi thay) Aap Sallallahu Alaihi Wasallam ne jab in ka ye tarz-e-amal dekha to Aap pehle sab se bare dher ke charon taraf teen martaba ghoome. Is ke baad is par baith gaye aur farmaya apne qarz khwahon ko bula lao. Aap Sallallahu Alaihi Wasallam barabar unhein naap ke dete rahe yahan tak ke Allah Ta'ala ne mere walid ki taraf se in ki sari amanat ada kar di. Mein is par khush tha ke Allah Ta'ala mere walid ki amanat ada kara de aur mein apni bahno ke liye ek khajoor bhi na le jaon lekin Allah Ta'ala ne tamam dusre dher bacha diye balkey is dher ko bhi jab dekha jis par Aap Sallallahu Alaihi Wasallam baithe hue thay ke jaise is mein se ek khajoor ka dana bhi kam nahi hua
.

Hum se Abdul Aziz Bin Abdullah ne bayan kiya, kaha hum se Ibrahim Bin Saad ne bayan kiya, un se in ke baap ne, in ke dada se ke Saad Bin Abi Waqqas Radi Allahu Anhu ne bayan kiya, Ghazwa Uhud ke mauqe par mein ne Rasul Allah Sallallahu Alaihi Wasallam ko dekha aur Aap ke sath do aur ashab (yani Jibrail Alaihis Salam aur Mikail Alaihis Salam insani surat mein) aaye hue thay. Wo Aap ko apni hifazat mein le kar kuffar se bari sakhti se larr rahe thay. In ke jism par safaid kapre thay. Mein ne unhein na is se pehle kabhi dekha tha aur na is ke baad kabhi dekha
.

Hum se Abdullah Bin Muhammad ne bayan kiya, kaha hum se Marwan Bin Muawiya ne bayan kiya, kaha hum se Hashim Bin Hashim Saadi ne bayan kiya, kaha mein ne Saeed Bin Musayyab se suna, unhon ne bayan kiya ke mein ne Saad Bin Abi Waqqas Radi Allahu Anhu se suna, wo bayan karte thay ke Ghazwa Uhud ke mauqe par Rasul Allah Sallallahu Alaihi Wasallam ne apne tarkash ke teer mujhe nikal kar diye aur farmaya ke khoob teer barsaye ja. Mere maan baap tum par fida hon
.

Hum se Musaddad Bin Musarhad ne bayan kiya, kaha hum se Yahya ne bayan kiya, un se Yahya Bin Saeed ne bayan kiya, unhon ne kaha ke mein ne Saeed Bin Musayyab se suna, unhon ne bayan kiya ke mein ne Saad Bin Abi Waqqas Radi Allahu Anhu se suna, wo bayan karte thay ke Ghazwa Uhud ke mauqe par Rasul Allah Sallallahu Alaihi Wasallam ne (meri himmat afzayi ke liye) apne walid aur walida dono ko jama farmaya ke mere maan baap tum par fida hon
.

Hum se Qutaiba Bin Saeed ne bayan kiya, kaha hum se Laith Bin Saad ne bayan kiya, un se Yahya Bin Kaseer ne bayan kiya, un se Ibn Al-Musayyab ne, unhon ne bayan kiya ke Saad Bin Abi Waqqas Radi Allahu Anhu ne bayan kiya ke Rasul Allah Sallallahu Alaihi Wasallam ne Ghazwa Uhud ke mauqe par (meri himmat barhane ke liye) apne walid aur walida dono ko jama farmaya. In ki murad Aap ke is irshad se thi jo Aap Sallallahu Alaihi Wasallam ne is waqt farmaya tha jab wo jung kar rahe thay ke mere maan baap tum par fida hon
.

Hum se Abu Nuaim ne bayan kiya, kaha hum se Mis'ar ne bayan kiya, un se Saad ne, un se Ibn Shaddad ne bayan kiya, unhon ne Ali Radi Allahu Anhu se suna, wo bayan karte thay ke Saad Radi Allahu Anhu ke siwa mein ne Nabi Kareem Sallallahu Alaihi Wasallam se nahi suna ke Aap is ke liye dua mein maan baap dono ko ba-een taur jama kar rahe hon
.

Hum se Busrah Bin Safwan ne bayan kiya, kaha hum se Ibrahim ne bayan kiya, un se in ke walid ne, un se Abdullah Bin Shaddad ne aur un se Ali Radi Allahu Anhu ne bayan kiya ke Saad Bin Malik ke siwa mein ne aur kisi ke liye Nabi Kareem Sallallahu Alaihi Wasallam ko apne walidain ka ek sath zikr karte nahi suna, mein ne khud suna ke Uhud ke din Aap Sallallahu Alaihi Wasallam farma rahe thay ke Saad! Khoob teer barsao. Mere maan baap tum par qurban hon
.

Hum se Musa Bin Ismail ne bayan kiya, un se Mutamir ne, un se in ke walid ne bayan kiya ke Abu Usman bayan karte thay ke in ghazwat mein se jin mein Nabi Kareem Sallallahu Alaihi Wasallam ne kuffar se qital kiya. Baaz ghazwa (Uhud) mein ek mauqe par Aap Sallallahu Alaihi Wasallam ke sath Talha aur Saad ke siwa aur koi baqi nahi reh gaya tha. Abu Usman ne ye baat Talha aur Saad (Radi Allahu Anhuma) se riwayat ki thi
.