Hum se Muhammad bin Ma'mar ne byaan kiya , kaha ke hum se Abu Aasim ne Jareer bin Hazim se byaan kiya , unhon ne kaha ke main ne Imam Hasan Basri se suna , unhon ne byaan kiya ke hum ne Amr bin Taghlib razi Allahu anhu se suna ke Rasool Allah salla Allahu alaihi wasallam ke paas kuch maal aaya ya koi cheez aayi . Aap ne baaz sahabah ko is mein se ata kiya aur baaz ko kuch nahi diya . Phir aap ko maloom hua ke jin logon ko aap ne nahi diya tha unhein is ka ranj hua , is liye aap ne Allah ki hamd o tareef ki phir farmaya «Amma ba'd» ! Allah ki qasam! main baaz logon ko deta hoon aur baaz ko nahi deta lekin main jis ko nahi deta woh mere nazdeek un se zyada mehboob hain jin ko main deta hoon . Main to un logon ko deta hoon jin ke dilon mein be-sabri aur lalach paata hoon lekin jin ke dilon Allah Ta'ala ne khair aur be-niyaz banaye hain , main un par bharosa karta hoon . Amr bin Taghlib bhi in hi logon mein se hain . Allah ki qasam! mere liye Rasool Allah salla Allahu alaihi wasallam ka yeh aik kalimah Surkh oonton se zyada mehboob hai .