Hum se Musa Bin Ismail ne bayan kiya, kaha hum se Jareer Bin Hazim ne bayan kiya, kaha hum se Hasan Basri ne bayan kiya, kaha ke mujh se Amr Bin Taghlib (Radi Allahu Anhu) ne bayan kiya, unhon ne bayan kiya ke Rasul Allah (Sallallahu Alaihi Wasallam) ne kuch logon ko diya aur kuch logon ko nahi diya. Ghaliban jin logon ko Aap (Sallallahu Alaihi Wasallam) ne nahi diya tha, un ko nagawar hua. To Aap (Sallallahu Alaihi Wasallam) ne farmaya ke mein kuch aise logon ko deta hoon ke mujhe jin ke bigad jane (Islam se phir jane) aur be-sabri ka darr hai. Aur kuch log aise hain jin par mein bharosa karta hoon, Allah Ta'ala ne un ke dilon mein bhalayi aur be-niyazi rakhi hai (un ko mein nahi deta) Amr Bin Taghlib (Radi Allahu Anhu) bhi unhi mein shamil hain. Amr Bin Taghlib (Radi Allahu Anhu) kaha karte thay ke Rasul Allah (Sallallahu Alaihi Wasallam) ne meri nisbat ye jo kalma farmaya agar is ke badle surkh ont milte to bhi mein itna khush na hota. Abu Asim ne Jareer se bayan kiya ke mein ne Hasan Basri se suna, wo bayan karte thay ke hum se Amr Bin Taghlib (Radi Allahu Anhu) ne bayan kiya ke Rasul Allah (Sallallahu Alaihi Wasallam) ke paas mal ya qaidi aaye thay aur unhein ko Aap ne taqseem farmaya tha
.