Hum se Abu-ul-Numan ne bayan kiya, kaha hum se Hammad Bin Zaid ne bayan kiya, un se Nafi ne ke Umar Bin Khattab (Radi Allahu Anhu) ne arz kiya: Ya Rasul Allah! Zamana-e-Jahiliyat (kufr) mein mein ne ek din ke itikaf ki mannat mani thi, to Rasul Allah (Sallallahu Alaihi Wasallam) ne ise poora karne ka hukm farmaya. Nafi ne bayan kiya ke Hunain ke qaidiyon mein se Umar (Radi Allahu Anhu) ko do bandiyan mili theen. To Aap ne unhein Makkah ke kisi ghar mein rakha. Unhon ne bayan kiya ke phir Nabi Kareem (Sallallahu Alaihi Wasallam) ne Hunain ke qaidiyon par ihsan kiya (aur sab ko muft azad kar diya) to galiyon mein wo daudne lage. Umar (Radi Allahu Anhu) ne kaha, Abdullah! Dekho to ye kya muamla hai. Unhon ne bataya ke Rasul Allah (Sallallahu Alaihi Wasallam) ne un par ihsan kiya hai (aur Hunain ke tamam qaidi muft azad kar diye gaye hain) Umar (Radi Allahu Anhu) ne kaha ke phir ja in dono larkiyon ko bhi azad kar de. Nafi ne kaha ke Rasul Allah (Sallallahu Alaihi Wasallam) ne maqam-e-Jarana se Umrah ka ihram nahi bandha tha. Agar Aap (Sallallahu Alaihi Wasallam) wahan se Umrah ka ihram bandhte to Abdullah Bin Umar (Radi Allahu Anhuma) ko ye zaroor maloom hota aur Jareer Bin Hazim ne jo Ayub se riwayat ki, unhon ne Nafi se, unhon ne Ibn Umar (Radi Allahu Anhuma) se, is mein yun hai ke (wo dono bandiyan jo Umar Radi Allahu Anhu ko mili theen) khums mein se theen. (Itikaf se mutaliq ye riwayat) Ma'mar ne Ayub se naql ki hai, un se Nafi ne, un se Abdullah Bin Umar (Radi Allahu Anhuma) ne nazar ka qissa jo riwayat kiya hai is mein ek din ka lafz nahi hai
.