`Ibn Uyaina ne Khalaf bin Haushab se bayan kiya ke salaf fitna ke waqt in ashaar se misal dena pasand karte thay. Jin mein Imraul Qais ne kaha hai. Ibtida mein ik jawaan aurat ki surat hai yeh jang... dekh kar nadaan ise hote hain aashiq aur dang... jabke bhadke shole is ke phail jayein har taraf... tab wo ho jati hai boodhi aur badal jati hai rang... aisi bad-surat ko rakkhe kaun chonda hai safaid... soonghne aur choomne se is ke sab hote hain tang.

`Hum se Umar bin Hafs bin Ghiyas ne bayan kiya, kaha hum se hamare walid ne bayan kiya, kaha hum se A'mash ne bayan kiya, un se Shaqeeq ne bayan kiya, unhon ne Huzaifa Radi Allahu Anhu se suna, unhon ne bayan kiya ke hum Umar Radi Allahu Anhu ki khidmat mein baithe hue thay ke unhon ne poocha: tum mein se kise fitna ke baare mein Nabi Kareem صلی اللہ علیہ وسلم ka farman yaad hai? Huzaifa Radi Allahu Anhu ne kaha ke insan ka fitna (aazmaish) is ki biwi, is ke maal, is ke bacche aur padosi ke maamlaat mein hota hai jis ka kaffara namaz, sadqa, amr-bil-ma'roof aur nahi-anil-munkar kar deta hai. Umar Radi Allahu Anhu ne kaha ke mein is ke mutalliq nahi poochta balki is fitna ke baare mein poochta hoon jo darya ki tarah thaathein maare ga. Huzaifa Radi Allahu Anhu ne bayan kiya ke Ameerul Momineen Aap par is ka koi khatra nahi is ke aur Aap ke darmiyan ek band darwaza rukawat hai. Umar Radi Allahu Anhu ne poocha kya wo darwaza tod diya jaye ga ya khola jaye ga? Bayan kiya tod diya jaye ga. Umar Radi Allahu Anhu ne is par kaha ke phir to wo kabhi band na ho sake ga. Mein ne kaha ji haan. Hum ne Huzaifa Radi Allahu Anhu se poocha: kya Umar Radi Allahu Anhu is darwaza ke mutalliq jaante thay? Farmaya ke haan, jis tarah mein jaanta hoon ke kal se pehle raat aaye gi kyunke mein ne aisi baat bayan ki thi jo be-buniyaad nahi thi. Humein in se yeh poochte hue darr laga ke wo darwaza kaun thay. Chunancha hum ne Masrooq se kaha (ke wo poochein) jab unhon ne poocha ke wo darwaza kaun thay? To unhon ne kaha ke wo darwaza Umar Radi Allahu Anhu thay.