Hum se Musa bin Ismail ne bayan kiya, kaha hum se Sulaiman bin Mugheerah ne bayan kiya, kaha hum se saabit ne Anas se naql kiya, unhon ne farmaaya ke hum ko Quran-e-Kareem mein Rasoolullah Sallallahu Alaihi Wasallam se sawaalaat karne se mana kar diya gaya tha aur hum ko isi liye yeh baat pasand thi ke koi hoshiyaar dehaati aaye aur Aap Sallallahu Alaihi Wasallam se deeni umoor poochey aur hum sunein. Chunanche ek dafa ek dehaati aaya aur us ne kaha ke (aye Muhammed Sallallahu Alaihi Wasallam!) Hamaare haan Aap ka muballigh gaya tha. Jis ne hum ko khabar di ke Allah ne Aap ko apna Rasool bana kar bheja hai, aisa Aap ka khayaal hai? Aap Sallallahu Alaihi Wasallam ne farmaaya us ne bilkul sach kaha hai. Phir us ne poocha ke aasman kis ne paida kiye? Aap Sallallahu Alaihi Wasallam ne farmaaya ke Allah Azza wa Jalla ne. Phir us ne poocha ke zameen kis ne paida ki hai aur pahaad kis ne? Aap Sallallahu Alaihi Wasallam ne farmaaya ke Allah Azza wa Jalla ne. Phir us ne poocha ke un mein nafa’ dene waali cheezein kis ne paida ki hain? Aap Sallallahu Alaihi Wasallam ne farmaaya Allah Azza wa Jalla ne. Phir us ne kaha ke pas us zaat ki qasam de kar Aap se poochta hun jis ne zameen-o-aasman aur pahaadon ko paida kiya aur us mein munafe’ paida kiye ke kya Allah Azza wa Jalla ne Aap ko apna Rasool bana kar bheja hai? Aap Sallallahu Alaihi Wasallam ne jawaab diya ke haan bilkul sach hai. (Allah ne mujh ko Rasool banaaya hai) phir us ne kaha ke Aap ke muballigh ne batlaaya hai ke hum par paanch waqt ki namazein aur maal se Zakat ada karna Islaami faraaiz hain, kya yeh durust hai? Aap Sallallahu Alaihi Wasallam ne farmaaya haan us ne bilkul sach kaha hai. Phir us ne kaha Aap ko us zaat ki qasam de kar poochta hun jis ne Aap Sallallahu Alaihi Wasallam ko Rasool banaaya hai kya Allah paak hi ne Aap ko in cheezon ka hukm farmaaya hai. Aap Sallallahu Alaihi Wasallam ne farmaaya haan bilkul durust hai. Phir woh bola aap ke qaasid ka khayaal hai ke hum mein se jo taaqat rakhta ho us par Baitullah ka Hajj farz hai. Aap Sallallahu Alaihi Wasallam ne farmaaya haan woh sachcha hai. Phir woh bola main Aap Sallallahu Alaihi Wasallam ko us zaat ki qasam de kar poochta hun jis ne Aap ko Rasool bana kar bheja ke kya Allah hi ne Aap Sallallahu Alaihi Wasallam ko yeh hukm farmaaya hai? Aap ne jawaab diya ke haan. Phir woh kehne laga ke qasam hai us zaat ki jis ne Aap ko haq ke saath mab’oos farmaaya main in baaton par kuch ziyada karunga na kam karunga. (Balki in hi ke mutabiq apni zindagi guzaarunga) Aap Sallallahu Alaihi Wasallam ne farmaaya agar is ne apni baat ko sach kar dikhaaya to woh zaroor zaroor jannat mein daakhil ho jaayega. (Note: San’aani ne kaha yeh Hadees is maqam par usi ek nuskha-e-Bukhari mein hai jo Firabri par padha gaya aur kisi nuskha mein nahi hai).

Aur Anas Radhiallahu Anhu ne farmaaya ke Uthman Radhiallahu Anhu ne masaahif (yani Quran) likhwaaye aur unhein chaaron taraf bhej diya. Aur Abdullah bin Umar Radhiallahu Anhuma, Yahya bin Sa’eed, aur Imam Malik Rahimahullah ke nazdeek yeh (kitaabat) jaaiz hai. Aur baaz Ahl-e-Hijaaz ne Munaawalah par Rasoolullah Sallallahu Alaihi Wasallam ki us Hadees se istedlaal kiya hai jis mein Aap ne ameer-e-lashkar ke liye khat likha tha. Phir (qaasid se) farmaaya tha ke jab tak tum falaan falaan jagah na pahunch jaao is khat ko mat padhna. Phir jab woh us jagah pahunch gaye to us ne khat ko logon ke saamne padha aur jo Aap Sallallahu Alaihi Wasallam ka hukm tha woh unhein batlaaya.

Ismail bin Abdullah ne hum se bayan kiya, un se Ibrahim bin Sa’d ne Saleh ke waaste se riwayat ki, unhon ne Ibn-e-Shihaab se, unhon ne Ubaidullah bin Abdullah bin ’Utbah bin Mas’ood Radhiallahu Anhu se naql kiya ke un se Abdullah bin Abbas Radhiallahu Anhuma ne bayan kiya ke Rasoolullah Sallallahu Alaihi Wasallam ne ek shakhs ko apna ek khat de kar bheja aur use yeh hukm diya ke use haakim-e-Bahrain ke paas le jaaye. Bahrain ke haakim ne woh khat Kisra (shaah-e-Iran) ke paas bhej diya. Jis waqt us ne woh khat padha to chaak kar daala (rawi kehte hain) aur mera khayaal hai ke Ibn-e-Musaiyab ne (us ke baad) mujh se kaha ke (us waqiya ko sun kar) Rasoolullah Sallallahu Alaihi Wasallam ne Ahl-e-Iran ke liye bad-dua ki ke woh (bhi chaak shudah khat ki tarah) tukde tukde ho jaayen.