Hum se Musa bin Ismail ne bayan kiya, kaha hum se Abdul Aziz bin Abdullah bin Abi Salamah ne bayan kiya, kaha hum ko Zuhri ne khabar di, unhein Aamir bin Saad bin Abi Waqqas ne aur in se un ke walid ne ke hamare yahan Rasool Allah salla Allahu alaihi wasallam meri iyadat ke liye tashreef laaye main Hajjat-ul-Wada ke zamana mein ek sakht beemari mein mubtala ho gaya tha main ne arz kiya ke meri beemari jis hadd ko pahunch chuki hai usay Aap dekh rahe hain, main sahib e daulat hoon aur meri waris meri sirf ek larki ke siwa aur koi nahi to kiya main apna do tihayi maal sadqa karoon. Nabi Karim salla Allahu alaihi wasallam ne farmaya ke nahi. Main ne arz kiya phir aadha kar doon, Aap ne farmaya ke nahi. Main ne arz kiya ek tihayi kar doon. Nabi Karim salla Allahu alaihi wasallam ne farmaya ke tihayi bahut kafi hai agar apne warison ko ghani chhorr kar jao yeh is se behtar hai ke unhein muhtaj chhorro aur woh logon ke samne hath phailate phirein aur jo bhi kharch karo ge aur is se Allah ki khushnoodi haasil karna maqsood ho ga is par bhi tumhein sawab mile ga. Yahan tak ke is luqma par bhi tumhein sawab mile ga jo apni biwi ke munh mein daalte ho.