Hum se Muhammad bin Kaseer ne byaan kiya , kaha hum ko Sufyan Sawri ne khabar di , unhein Saeed bin Ibrahim ne , in se Aamir bin Saad razi Allahu anhu ne , unhon ne Saad razi Allahu anhu se ke Nabi Karim salla Allahu alaihi wasallam meri iyadat ke liye tashreef laye . Main is waqt Makkah Mukarramah mein beemar thu . Main ne Nabi Karim salla Allahu alaihi wasallam se kaha ke meere paas maal hai . kiya main apne tamam maal ki wasiyat kar doon ? Aap salla Allahu alaihi wasallam ne farmaya ke nahi . Main ne kaha phir aadhe ki kar doon ? Nabi Karim salla Allahu alaihi wasallam ne farmaya ke nahi! Main ne kaha , phir tihayi ki kar doon (farmaya) tihayi ki kar do aur tihayi bhi bahut hai . Agar tum apne warison ko maldar chhor kar jao yeh is se behtar hai ke tum unhein muhtaj o tang-dast chhoro ke logon ke samne woh hath phailate phirein aur tum jab bhi kharch karo ge to woh tumhari taraf se sadqa ho ga . Yahan tak ke is luqma par bhi sawab mile ga jo tum apni biwi ke munh mein rakhne ke liye uthao ge aur umeed hai ke abhi Allah tumhein zinda rakkhe ga , tum se bahut se logon ko nafa pahunche ga aur bahut se doosre (kuffar) nuqsan uthayein ge .