Hum se Muhammad Bin Salam ne bayan kiya, un se Sufyan Bin Uyaina ne bayan kiya, un se Sulaiman Ahwal ne, unhon ne Said Bin Jubair se suna aur unhon ne Ibn Abbas (Radi Allahu Anhuma) se suna Aap ne Jumerat ke din ka zikr karte hue kaha, tumhein maloom hai ke Jumerat ka din, haye! Ye kaun sa din hai? Is ke baad wo itna roye ke un ke aansuon se kankariyan tarr ho gayeen. Said ne kaha mein ne arz kiya, Ya Abu Abbas! Jumerat ke din se kya matlab hai? Unhon ne kaha ke isi din Rasul Allah (Sallallahu Alaihi Wasallam) ki takleef (maradh-ul-maut) mein shiddat paida hui thi aur Aap (Sallallahu Alaihi Wasallam) ne farmaya tha ke mujhe (likhne ka) ek kaghaz de do taake mein tumhare liye ek aisi kitab likh jaoon, jis ke baad tum kabhi gumrah na ho. Is par logon ka ikhtilaf ho gaya. Phir Aap (Sallallahu Alaihi Wasallam) ne khud hi farmaya ke Nabi ki maujoodgi mein jhagadna ghair-munasib hai, doosre log kehne lage, bhala kya Aap (Sallallahu Alaihi Wasallam) be-kar baatein farmayenge accha, phir puch lo, ye sun kar Aap (Sallallahu Alaihi Wasallam) ne farmaya ke mujhe meri halat par chhod do, kyunke is waqt mein jis aalam mein hoon, wo is se behtar hai jis ki taraf tum mujhe bula rahe ho. Is ke baad Aap (Sallallahu Alaihi Wasallam) ne teen baaton ka hukm farmaya, ke Mushrikon ko Jazeerah Arab se nikal dena aur wafood ke sath isi tarah khatir tawazu ka muamla karna, jis tarah mein kiya karta tha. Teesri baat kuch bhali si thi, ya to Said ne is ko bayan na kiya, ya mein bhool gaya. Sufyan ne kaha ye jumla (teesri baat kuch bhali si thi) Sulaiman Ahwal ka kalam hai
.