Hum se Abdullah Bin Yusuf ne bayan kiya, kaha hum se Laith Bin Saad ne bayan kiya, kaha ke mujh se Said Maqbari ne bayan kiya, un se Abu Hurairah (Radi Allahu Anhu) ne bayan kiya ke jab Khaibar fatah hua to (Yahudiyon ki taraf se) Nabi Kareem (Sallallahu Alaihi Wasallam) ki khidmat mein murghi ka ya aise gosht ka hadiya pesh kiya gaya jis mein zehar tha. Is par Nabi Kareem (Sallallahu Alaihi Wasallam) ne farmaya ke jitne Yahudi yahan maujood hain unhein mere paas jama karo, chunanche wo sab aa gaye. Is ke baad Nabi Kareem (Sallallahu Alaihi Wasallam) ne farmaya ke dekho, mein tum se ek baat poochon ga. Kya tum log sahi sahi jawab do ge? Sab ne kaha ji haan, Aap (Sallallahu Alaihi Wasallam) ne daryaft farmaya, tumhare baap kaun thay? Unhon ne kaha ke falan! Aap (Sallallahu Alaihi Wasallam) ne farmaya ke tum jhoot bolte ho, tumhare baap to falan thay. Sab ne kaha ke Aap sach farmate hain. Phir Aap (Sallallahu Alaihi Wasallam) ne farmaya, agar mein tum se ek aur baat poochon to tum sahi waqiya bayan kar do ge? Sab ne kaha ji haan, Ae Abu-ul-Qasim! Aur agar hum jhoot bhi bolein ge to Aap hamari jhoot ko isi tarah pakad lein ge jis tarah Aap ne abhi hamare baap ke bare mein hamare jhoot ko pakad liya, Aap (Sallallahu Alaihi Wasallam) ne is ke baad daryaft farmaya ke Dozakh mein jane wale kaun log honge? Unhon ne kaha ke kuch dinon ke liye to hum is mein dakhil ho jayenge lekin phir Aap log hamari jagah dakhil kar diye jayenge. Nabi Kareem (Sallallahu Alaihi Wasallam) ne farmaya tum is mein barbad raho, Allah gawah hai ke hum tumhari jagah is mein kabhi dakhil nahi kiye jayenge. Phir Aap ne daryaft farmaya ke agar mein tum se koi baat poochon to kya tum mujh se sahi waqiya bata do ge? Is martaba bhi unhon ne yahi kaha ke haan! Ae Abu-ul-Qasim! Aap (Sallallahu Alaihi Wasallam) ne daryaft kiya ke kya tum ne is murghi ke gosht mein zehar milaya hai? Unhon ne kaha ji haan, Aap (Sallallahu Alaihi Wasallam) ne daryaft farmaya ke tum ne aisa kyun kiya? Unhon ne kaha ke hamara maqsad ye tha ke agar Aap jhoote hain (nubuwwat mein) to humein aaram mil jaye ga aur agar Aap waqayi Nabi hain to ye zehar Aap ko koi nuqsan na pahuncha sakega
.