Is qissa ko Urwah ne Aisha razi Allahu anha se bayan kiya unhon ne Nabi Karim salla Allahu alaihi wasallam se naqal kiya hai.

Hum se Qutaybah bin Saeed ne bayan kiya, kaha hum se Layth bin Saad ne, in se Saeed bin Abi Saeed ne aur in se Abu Hurairah razi Allahu anhu ne, unhon ne bayan kiya ke jab Khaibar fatah hua to Rasool Allah salla Allahu alaihi wasallam ko ek bakri hadiya mein pesh ki gayi (ek Yahudi aurat Zaynub bint Haris ne pesh ki thi) jis mein zehar bhara hua tha, is par Nabi Karim salla Allahu alaihi wasallam ne farmaya ke yahan par jitne Yahudi hain unhein mere paas jama karo. Chunanche sab Nabi Karim salla Allahu alaihi wasallam ke paas jama kiye gaye. Nabi Karim salla Allahu alaihi wasallam ne farmaya ke main tum se ek baat poochon ga kya tum mujhe sahih sahih baat bata do ge? Unhon ne kaha ke haan Ae Abu al-Qasim! Phir Nabi Karim salla Allahu alaihi wasallam ne farmaya ke tumhara par-dada kaun hai? Unhon ne kaha ke falan. Nabi Karim salla Allahu alaihi wasallam ne farmaya ke tum jhoot kehte ho tumhara par-dada to falan hai. Is par woh bole ke Aap ne sach farmaya, durust farmaya, phir Nabi Karim salla Allahu alaihi wasallam ne in se farmaya kya agar main tum se koi baat poochon ga to tum mujhe sach sach bata do ge? Unhon ne kaha ke haan Ae Abu al-Qasim! Aur agar hum jhoot bolein bhi to Aap hamara jhoot pakar lein ge jaisa ke abhi hamare par-dada ke mutalliq Aap ne hamara jhoot pakar liya. Nabi Karim salla Allahu alaihi wasallam ne farmaya ke dozakh wale kaun log hain? Unhon ne kaha ke kuch din ke liye to hum is mein rahein ge phir Aap log hamari jagah le lein ge. Nabi Karim salla Allahu alaihi wasallam ne farmaya ke tum is mein zillat ke saath pare raho ge, wallah! Hum is mein tumhari jagah kabhi nahi lein ge. Aap ne phir in se daryaft farmaya kya agar main tum se ek baat poochon to tum mujhe is ke mutalliq sahih sahih bata do ge? Unhon ne kaha ke haan? Nabi Karim salla Allahu alaihi wasallam ne daryaft farmaya kya tum ne is bakri mein zehar milaya tha, unhon ne kaha ke haan. Nabi Karim salla Allahu alaihi wasallam ne daryaft farmaya ke tumhein is kaam par kis jazba ne aamada kiya tha? Unhon ne kaha ke hamara maqsad yeh tha ke agar Aap jhoote hon ge to hamain Aap se najat mil jaye gi aur agar sache hon ge to Aap ko nuqsan nahi pahuncha sake ga.