Hum se Ishaq Wasti ne bayan kiya, kaha hum se Khalid ne bayan kiya, un se Khalid Hazza ne aur un se Abu Qilaba ne ke mujhe Abu Maleeh ne khabar di, kaha ke mein aap ke walid ke sath Abdullah Bin Amr (Radi Allahu Anhuma) ki khidmat mein hazir hua. Unhon ne hum se bayan kiya ke Rasul Allah (Sallallahu Alaihi Wasallam) ko mere roze ke mutaliq khabar ho gayi. (ke mein musalsal roze rakhta hoon) Aap (Sallallahu Alaihi Wasallam) mere yahan tashreef laye aur mein ne ek gadda Aap (Sallallahu Alaihi Wasallam) ke liye bicha diya. Jis mein khajoor ki chaal bhari hui thi lekin Nabi Kareem (Sallallahu Alaihi Wasallam) zameen par baith gaye. Aur takiya mere aur Aap (Sallallahu Alaihi Wasallam) ke darmiyan ho gaya. Aap (Sallallahu Alaihi Wasallam) ne farmaya, kya tumhare liye har mahina mein teen din ke roze kafi nahi hain. Unhon ne kaha ke mein ne arz ki, ya Rasul Allah! (kuch aur barha dijiye) aap ne farmaya, accha panch din ke roze (rakh le) mein ne arz ki, ya Rasul Allah kuch aur Aap (Sallallahu Alaihi Wasallam) ne farmaya chalo cheh din, mein ne arz ki ya Rasul Allah! (kuch aur barhaiye, mujh mein is se bhi zyada ki taqat hai) Aap (Sallallahu Alaihi Wasallam) ne farmaya! accha nau din, mein ne arz ki, ya Rasul Allah! kuch aur farmaya, accha gyarah din. Aakhir aap ne farmaya ke Daud (Alaihis Salam) ke roze ke tareeke ke siwa aur koi tareeka (shariat mein) jaiz nahi. Yaani zindagi ke aadhe dinon mein ek din ka roza rakh aur ek din ka roza chor diya kar
.