Hum se Abu-al-Yaman ne bayan kiya, kaha ke hum ko Shuaib ne khabar di, unhein Zuhri ne, kaha ke mujhe Saeed Bin Musayyab aur Abu Salma Bin Abdur Rahman ne khabar di ke Abdullah Bin Amr (Radi Allahu Anhuma) ne kaha ke Rasul Allah (Sallallahu Alaihi Wasallam) tak meri ye baat pohancha gayi ke ”Allah ki qasam! zindagi bhar mein din mein to roze rakhoon ga. aur sari raat ibadat karoon ga“ mein ne Rasul Allah (Sallallahu Alaihi Wasallam) se arz ki, mere maan baap Aap (Sallallahu Alaihi Wasallam) par fida hon, han mein ne ye kaha hai, aap (Sallallahu Alaihi Wasallam) ne farmaya lekin tere andar is ki taqat nahi, is liye roza bhi rakh aur be-roza bhi reh. Ibadat bhi kar lekin so-uo bhi aur mahine mein teen din ke roze rakkha kar. Naikiyon ka badla das guna milta hai, is tarah ye sari umr ka roza ho jaye ga, mein ne kaha ke mein is se bhi zyada ki taqat rakhta hoon, aap (Sallallahu Alaihi Wasallam) ne farmaya ke phir ek din roza rakkha kar aur do din ke liye roze chor diya kar. Mein ne phir kaha ke mein is se bhi zyada ki taqat rakhta hoon. Aap (Sallallahu Alaihi Wasallam) ne farmaya ke accha ek din roza rakh aur ek din be-roza ke reh ke Daud (Alaihis Salam) ka roza aisa hi tha. Aur roza ka ye sab se afzal tareeqa hai. Mein ne ab bhi wahi kaha ke mujhe is se bhi zyada ki taqat hai lekin is martaba aap (Sallallahu Alaihi Wasallam) ne farmaya ke is se afzal koi roza nahi hai
.