Hum se Abdullah bin Maslamah Qanabi ne bayan kiya, in se Malik ne bayan kiya, in se Hisham bin Urwah ne, in se Fatima bint Munzhir ne, in se Asma bint Abi Bakr razi Allahu anhu ne bayan kiya ke main Aisha razi Allahu anha ke yahan gayi. Jab sooraj girhan hua tha aur log namaz parh rahe thay Aisha razi Allahu anha bhi khari namaz parh rahi thien. Main ne kaha logon ko kya ho gaya hai (ke be-waqt namaz parh rahe hain) to unhon ne hath se aasman ki taraf isharah kiya aur kaha: Sub-haanallaah! Main ne kaha koi nishani hai? Unhon ne sar se isharah kiya ke haan. Phir jab Rasool Allah salla Allahu alaihi wasallam namaz se farigh huay to Aap salla Allahu alaihi wasallam ne Allah ki hamd o sana ke baad farmaya ”koi cheez aaisi nahi lekin main ne aaj is jagah se usay dekh liya, yahan tak ke jannat wa dozakh bhi aur mujhe wahi ki gayi hai ke tum log qabron mein bhi aazmaye jao ge, Dajjal ke fitne ke qareeb qareeb pas momin ya Muslim mujhe yaqeen nahi ke Asma razi Allahu anha ne in mein se kaun sa lafz kaha tha to woh (qabr mein farishton ke sawal par kahe ga) Muhammad salla Allahu alaihi wasallam hamare paas roshan nishan-aat le kar aaye aur hum ne in ki dawat qabool ki aur iman laaye. Is se kaha jaye ga ke aaram se so raho, hamain maloom tha ke tum momin ho aur munafiq ya shak mein mubtala mujhe yaqeen nahi ke in mein se kaun sa lafz Asma razi Allahu anha ne kaha tha, to woh kahe ga (Nabi Karim salla Allahu alaihi wasallam ke mutalliq sawal par ke) mujhe maloom nahi, main ne logon ko jo kehte suna wahi main ne bhi bak diya.“

Hum se Ismail bin Abi Oways ne bayan kiya, kaha mujh se Imam Malik ne bayan kiya, in se Abu al-Zinad ne, in se Aaraj ne, in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”jab tak main tum se yak-soo rahoon tum bhi mujhe chhorr do (aur sawalat waghaira na karo) kyunke tum se pehle ki ummatein apne (ghair zaroori) sawal aur ambiya ke samne ikhtilaf ki wajah se tabah ho gayiein. Pas jab main tumhein kisi cheez se rokoon to tum bhi is se parhez karo aur jab main tumhein kisi baat ka hukm doon to baja lao jis hadd tak tum mein taqat ho.“

Aur Allah Ta'ala ne farmaya ”isi tarah be-faida sakhti uthana aur woh baatein banana jin mein koi faida nahi“ aur Allah ne (Surah al-Maida mein) farmaya «laa tas-aloo an ash-yaaa-a in tubda lakum tasu'kum» ”Musalmano! aaisi baatein na poochho ke agar bayan ki jayein to tum ko buri lagein.“

Hum se Abdullah bin Yazid al-Muqri ne bayan kiya, kaha hum se Saeed bin Abi Ayub ne bayan kiya, kaha mujh se Aqeel bin Khalid ne bayan kiya, in se Ibn Shihab ne, in se Aamir bin Saad bin Abi Waqqas ne, in se un ke walid ne ke Nabi Karim salla Allahu alaihi wasallam ne farmaya ”sab se bada mujrim woh Musalman hai jis ne kisi aaisi cheez ke mutalliq poochha jo haram nahi thi aur is ke sawal ki wajah se woh haram kar di gayi.“

Hum se Ishaq bin Mansoor ne bayan kiya, unhon ne kaha hamako Affan bin Muslim ne khabar di, unhon ne kaha hum se Wuhaib ne bayan kiya, kaha hum se Musa bin Uqbah ne bayan kiya, kaha main ne Abu al-Nazhr se suna, unhon ne Busr bin Saeed se bayan kiya, in se Zayd bin Sabit razi Allahu anhu ne ke Nabi Karim salla Allahu alaihi wasallam ne Masjid e Nabwi mein chitayi se gher kar ek hujra bana liya aur Ramzan ki raaton mein is ke andar namaz parhne lage phir aur log bhi jama ho gaye to ek raat Nabi Karim salla Allahu alaihi wasallam ki aawaz nahi aayi. Logon ne samjha ke Nabi Karim salla Allahu alaihi wasallam so gaye hain. Is liye in mein se baaz khangharne lage taake Aap bahar tashreef laayein, phir Nabi Karim salla Allahu alaihi wasallam ne farmaya ke main tum logon ke kaam se waqif hoon, yahan tak ke mujhe dar hua ke kahin tum par yeh namaz e Taraveeh farz na kar di jaye aur agar farz kar di jaye to tum usay qaim nahi rakh sako ge. Pas Ae logo! apne gharon mein yeh namaz parho kyunke farz namaz ke siwa insan ki sab se afzhal namaz is ke ghar mein hai.

Hum se Yusuf bin Musa ne bayan kiya, kaha hum se Abu Usamah Hammad bin Usamah ne bayan kiya, in se Burayd bin Abi Burdah ne, in se Abu Burdah ne aur in se Abu Musa Ash'ari razi Allahu anhu ne bayan kiya ke Rasool Allah salla Allahu alaihi wasallam se kuch cheezon ke mutalliq poochha gaya jinhein Aap ne napasand kiya jab logon ne bahut zyada poochhna shuru kar diya to Aap salla Allahu alaihi wasallam naraz huay aur farmaya: poochho! Is par ek sahabi khara hua aur poochha: ya Rasool Allah! mere walid kaun hain? Nabi Karim salla Allahu alaihi wasallam ne farmaya ke tumhare walid Hudhafa hain. Phir doosra sahabi khara hua aur poochha meere walid kaun hain? Farmaya ke tumhare walid Shaiba ke mola Salim hain. Phir jab Umar razi Allahu anhu ne Nabi Karim salla Allahu alaihi wasallam ke chehra par ghussa ke aasaar mahsoos kiye to arz kiya hum Allah Az-za wa Jal ki bargah mein Aap ko ghussa dilaane se tauba karte hain.

Hum se Musa bin Ismail ne bayan kiya, kaha hum se Abu Awanah ne bayan kiya, kaha hamase Abd-ul-Malik bin Umair Kufi ne bayan kiya, in se Mugheera razi Allahu anhu ke kaatib Warrad ne bayan kiya ke Muawiyah razi Allahu anhu ne Mugheera razi Allahu anhu ko likha ke jo tum ne Rasool Allah salla Allahu alaihi wasallam se suna hai woh mujhe likhiye to unhon ne unhein likha ke Nabi Karim salla Allahu alaihi wasallam har namaz ke baad kehte thay «laa ilaaha illallaahu, wah-dahoo laa shareeka lahu, lahul-mulku wa lahul-hamdu, wa huwa alaa kul-li shay-in qadeerun, allaahumma laa maania limaa aataita, wa laa mu-tiya limaa mana-ta, wa laa yanfau zhal-jaddi minkal-jaddu» ”tanha Allah ke siwa koi mabood nahi, is ka koi shareek nahi, mulk isi ka hai aur tamam tareef isi ke liye hain aur woh har cheez par qadir hai! Ae Allah jo tu ata kare usay koi روکne wala nahi aur jise tu roke usay koi dene wala nahi aur kisi naseeba-war ka naseeba tere muqabla mein usay nafa nahi pahuncha sake ga aur unhein yeh bhi likha ke Nabi Karim salla Allahu alaihi wasallam be-faida bahut sawal karne se mana karte thay aur maal zhaya karne se aur Aap maon ki nafarmani karne se mana karte thay aur larkiyon ko zinda dar-gor karne se aur apna haq mahfooz rakhne aur doosron ka haq na dene se aur be-zaroorat maangne se mana farmate thay.

Hum se Sulayman bin Harb ne bayan kiya, kaha hum se Hammad bin Zayd ne bayan kiya, in se Sabit ne aur in se Anas razi Allahu anhu ne ke hum Umar razi Allahu anhu ke paas thay to Aap ne farmaya ke hamain takal-luf ikhtiyar karne se mana kiya gaya hai.

Hum se Abu al-Yaman ne bayan kiya, unhon ne kaha hum se Shuayb ne khabar di, unhein Zuhri ne (Doosri sanad) Imam Bukhari rahmahullah ne kaha aur mujh se Mahmood ne bayan kiya, unhon ne kaha hum se Abd-ul-Razzaq ne bayan kiya, unhon ne kaha hamako Mamar ne khabar di, unhein Zuhri ne, unhon ne kaha mujhko Anas bin Malik razi Allahu anhu ne khabar di ke Nabi Karim salla Allahu alaihi wasallam sooraj dhalne ke baad bahar tashreef laaye aur Zhohar ki namaz parhi, phir salam pherne ke baad Aap mimbar par khare huay aur Qayamat ka zikr kiya aur Aap salla Allahu alaihi wasallam ne zikr kiya ke is se pehle bade bade waqiaat hon ge aur Aap salla Allahu alaihi wasallam ne farmaya ke tum mein se jo shakhs kisi cheez ke mutalliq sawal karna chahe to sawal kare. Aaj mujh se jo sawal bhi karo ge main tumhein is ka jawab doon ga jab tak main apni is jagah par hoon. Anas razi Allahu anhu ne bayan kiya ke is par log bahut zyada rone lage aur Nabi Karim salla Allahu alaihi wasallam baar baar wahi farmate thay ke mujh se poochho. Unhon ne bayan kiya ke phir koi shakhs khara hua aur poochha, meri jagah kahan hai. (jannat ya jahannum mein) ya Rasool Allah! Nabi Karim salla Allahu alaihi wasallam ne bayan kiya ke jahannum mein. Phir Abdullah bin Hudhafa razi Allahu anhu khare huay aur kaha meere walid kaun hain ya Rasool Allah? Farmaya ke tumhare walid Hudhafa hain. Bayan kiya ke phir Aap musalsal kehte rahe ke mujh se poochho, mujh se poochho, aakhir mein Umar razi Allahu anhu ne apne ghutnon ke bal baith kar kaha: hum Allah se Rabb ki haisiyat se, Islam se deen ki haisiyat se, Muhammad salla Allahu alaihi wasallam se Rasool ki haisiyat se raazi o khush hain. Umar razi Allahu anhu ne yeh kalmat kahe to Nabi Karim salla Allahu alaihi wasallam khamosh ho gaye, phir Aap salla Allahu alaihi wasallam ne farmaya ke is zaat ki qasam jis ki hath mein meri jaan hai, abhi mujh par jannat aur dozakh is diwar ki chaurayi mein meere samne ki gayi thien (yani in ki tasveerein) jab main namaz parh raha thu, aaj ki tarah main ne khair o shar ko nahi dekha.

Hum se Muhammad bin Abd-ur-Rahim ne bayan kiya, kaha hamako Rauh bin Ubadah ne khabar di, kaha hum se Shubah ne bayan kiya, kaha mujhko Musa bin Anas ne khabar di ke main ne Anas bin Malik razi Allahu anhu se suna, unhon ne bayan kiya ke ek sahab ne kaha: ya Nabiy-yallaah! meere walid kaun hain? Nabi Karim salla Allahu alaihi wasallam ne farmaya ke tumhare walid falan hain. Aur yeh aayat nazil hui «yaaa ay-yuhal-lazheena aamanoo laa tas-aloo an ash-yaaa-a» ”Ae logo! aaisi cheezin na poochho.“ Al-aaya.