Hum se Muhammad bin Muqatil ne bayan kiya , unhon ne kaha humein Abdullah bin Mubarak ne khabar di , unhon ne kaha humein Abu Bakr bin Usman bin Sahl bin Hunaif ne khabar di , unhon ne kaha mein ne Abu Umama Saad bin Sahl se suna , woh kehte thay ke hum ne Umar bin Abdul Aziz rahimahullah alaihi ke sath zuhr ki namaz parhi . Phir hum nikal kar Anas bin Malik raziyallahu anhu ki khidmat mein hazir hue to dekha aap namaz parh rahe hain . Mein ne arz ki ke aye mukarram chacha! yeh kon si namaz aap ne parhi hai . Farmaya ke asr ki aur isi waqt hum Rasool Allah salla Allahu alaihi wa sallam ke sath bhi yeh namaz parhte thay .

Hum se Abul Yaman Hukm bin Nafi ne bayan kiya ke kaha humein Shoaib bin Abi Hamza ne Zuhri se khabar di , unhon ne kaha ke mujh se Anas bin Malik raziyallahu anhu ne bayan kiya , unhon ne farmaya ke Rasool Allah salla Allahu alaihi wa sallam jab asr ki namaz parhte to sooraj buland aur taiz roshan hota tha . Phir ek shakhs Madina ke balai ilaqe ki taraf jata wahan pohanchnay ke baad bhi sooraj buland rehta tha Zuhri ne kaha ke Madina ke balai ilaqe ke baaz maqamat taqreeban char mile par ya kuch aise hi waqay hain .

Hum se Abdullah bin Yusuf ne bayan kiya , kaha humein Imam Malik rahimahullah alaihi ne Ibn Shihab Zuhri ke wastay se khabar di , unhon ne Anas bin Malik raziyallahu anhu se ke aap ne farmaya hum asr ki namaz parhte Nabi Karim salla Allahu alaihi wa sallam ke sath is ke baad koi shakhs Quba jata aur jab wahan pohanch jata to sooraj abhi buland hota tha .

Hum se Abdullah bin Yusuf ne bayan kiya , kaha humein Imam Malik ne Nafi ke zariye se khabar pehnchai , unhon ne Abdullah bin Umar raziyallahu anhuma se ke Rasool Allah salla Allahu alaihi wa sallam ne farmaya , jis ki namaz asr chhoot gayi goya is ka ghar aur maal sab lut gaya . Imam Bukhari rahimahullah ne farmaya ke Surah Muhammad mein jo yatrakum ka lafz aaya hai woh watr se nikala gaya hai . Watr kehte hain kisi shakhs ka koi aadmi maar dalna ya is ka maal chheen lena .

Hum se Muslim bin Ibrahim ne bayan kiya , unhon ne kaha hum se Hisham bin Abdullah Dastawai ne bayan kiya , kaha humein Yahya bin Abi Kathir ne Abu Qalaba Abdullah bin Zaid se khabar di . Unhon ne Abul Malih se , kaha hum Buraida raziyallahu anhu ke sath ek safar jang mein thay . Abr wa barish ka din tha . Aap ne farmaya ke asr ki namaz jaldi parh lo . Kyunke Nabi Karim salla Allahu alaihi wa sallam ne farmaya ke jis ne asr ki namaz chhor di , is ka neik amal zaya ho gaya .

Hum se Abdullah bin Zubair Humaidi ne bayan kiya , kaha hum se Marwan bin Muawiya ne , kaha hum se Ismail bin Abi Khalid ne Qais bin Abi Hazim se . Unhon ne Jarir bin Abdullah Bajli raziyallahu anhu se , unhon ne kaha ke hum Nabi Karim salla Allahu alaihi wa sallam ki khidmat mein mojood thay . Aap salla Allahu alaihi wa sallam ne chand par ek nazar dali phir farmaya ke tum apne Rab ko aakhir mein isi tarah dekhoge jaisay is chand ko ab dekh rahe ho . Is ke dekhne mein tum ko koi zehmat bhi nahi ho gi , pas agar tum aisa kar sakte ho ke sooraj tulu hone se pehle wali namaz fajr aur sooraj ghuroob hone se pehle wali namaz asr se tumhein koi cheez rok na sake to aisa zaroor karo . Phir aap salla Allahu alaihi wa sallam ne yeh ayat tilawat farmayi ke pas apne Malik ki hamd wa tasbeeh kar sooraj tulu hone aur ghuroob hone se pehle . Ismail raawi hadees ne kaha ke asr aur fajr ki namazen tum se chhootne na payen . Un ka hamesha khas tor par dhiyan rakho .

Hum se Abdullah bin Yusuf Tinnisi ne bayan kiya , kaha hum se Imam Malik rahimahullah alaihi ne Abul Zinad Abdullah bin Dhakwan se , unhon ne Abdur Rahman bin Harmuz Araj se , unhon ne Abu Hurairah raziyallahu anhu se ke Rasool Allah salla Allahu alaihi wa sallam ne farmaya ke raat aur din mein farishton ki duty badalti rehti hain . Aur fajr aur asr ki namazon mein duty par aane walon aur rukhsat pane walon ka ijtima hota hai . Phir tumhare pas rehne wale farishtay jab upar charhte hain to Allah Taala poochta hai halanke woh un se bohot zyada apne bandon ke mutalliq janta hai , ke mere bandon ko tum ne kis haal mein chhora . Woh jawab dete hain ke hum ne jab unhein chhora to woh fajr ki namaz parh rahe thay aur jab un ke pas gaye tab bhi woh asr ki namaz parh rahe thay .

Hum se Abu Naeem ne bayan kiya , unhon ne kaha hum se Shaiban ne Yahya bin Abi Kathir se , unhon ne Abu Salama se , unhon ne Abu Hurairah raziyallahu anhu se ke Rasool Allah salla Allahu alaihi wa sallam ne farmaya ke agar asr ki namaz ki ek rakat bhi koi shakhs sooraj ghuroob hone se pehle pa saka to poori namaz parhe is ki namaz ada hui na qaza isi tarah agar sooraj tulu hone se pehle fajr ki namaz ki ek rakat bhi pa sake to poori namaz parhe .

Hum se Abdul Aziz bin Abdullah Uwaisi ne bayan kiya , kaha mujh se Ibrahim bin Saad ne Ibn Shihab se , unhon ne Salim bin Abdullah bin Umar raziyallahu anhuma se , unhon ne apne walid Abdullah bin Umar raziyallahu anhuma se ke unhon ne Rasool Allah salla Allahu alaihi wa sallam se suna aap salla Allahu alaihi wa sallam farma rahe thay ke tum se pehle ki ummaton ke muqable mein tumhari zindagi sirf itni hai jitna asr se sooraj doobne tak ka waqt hota hai . Torah walon ko Torah di gayi . To unhon ne is par subah se amal kiya . Aadhe din tak phir woh aajiz aa gaye , kaam poora na kar sake , un logon ko un ke amal ka badla ek ek qeerat diya gaya . Phir Injeel walon ko Injeel di gayi , unhon ne aadhe din se asr tak is par amal kiya , aur woh bhi aajiz aa gaye . Un ko bhi ek ek qeerat un ke amal ka badla diya gaya . Phir asr ke waqt hum ko Quran mila . Hum ne is par sooraj ke ghuroob hone tak amal kiya aur kaam poora kar diya humein do do qeerat sawab mila . Is par un dono kitab walon ne kaha . Aye hamare Parwardigar! inhein to aap ne do do qeerat diye aur humein sirf ek ek qeerat . Halanke amal hum ne in se zyada kiya . Allah azzawajal ne farmaya , to kya mein ne ajr dene mein tum par kuch zulm kiya . Unhon ne arz ki ke nahi . Allah Taala ne farmaya ke phir yeh zyada ajr dena mera fazl hai jisay mein chahun de sakta hun .

Hum se Abu Kuraib Muhammad bin Alaa ne bayan kiya , kaha hum se Abu Usama ne Buraid bin Abdullah ke wastay se bayan kiya , unhon ne Abu Burda Aamir bin Abdullah se , unhon ne apne walid Abu Moosa Ashari Abdullah bin Qais raziyallahu anhu se . Unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya ke musalmanon aur yahood wa nasara ki misal ek aise shakhs ki si hai ke jis ne kuch logon se mazdoori par raat tak kaam karne ke liye kaha . Unhon ne aadhe din kaam kiya . Phir jawab de diya ke humein tumhari ujrat ki zaroorat nahi , yeh yahood thay phir is shakhs ne doosre mazdoor bulaye aur un se kaha ke din ka jo hissa baqi bach gaya hai yani aadha din isi ko poora kar do . Shart ke mutabiq mazdoori tumhein mile gi . Unhon ne bhi kaam shuru kiya lekin asr tak woh bhi jawab de baithe . Yeh nasara thay pas is teesre giroh ne jo ahl e Islam hain pehle do girohon ke kaam ki poori mazdoori le li .