Ke musalmanon par namaz waqt muqarrara mein farz hai , yani Allah ne un ke liye namazon ke auqat muqarrar kar diye hain .

Hum se Abdullah bin Maslama ne bayan kiya , unhon ne kaha ke mein ne Imam Malik rahimahullah alaihi ko parh kar sunaya Ibn Shihab ki riwayat se ke Umar bin Abdul Aziz rahimahullah alaihi ne ek din asr ki namaz mein der ki , pas Urwah bin Zubair raziyallahu anhu ke pas tashreef le gaye , aur unhon ne bataya ke isi tarah Mughira bin Shoba raziyallahu anhu ne ek din Iraq ke mulk mein namaz mein der ki thi jab woh Iraq mein hakim thay . Pas Abu Masood Ansari Uqba bin Amr un ki khidmat mein gaye . Aur farmaya , Mughira raziyallahu anhu! aakhir yeh kya baat hai , kya aap ko maloom nahi ke jab Jibreel alaihis salam tashreef laye to unhon ne namaz parhi aur Rasool Allah salla Allahu alaihi wa sallam ne bhi namaz parhi , phir Jibreel alaihis salam ne namaz parhi to Nabi Karim salla Allahu alaihi wa sallam ne bhi namaz parhi , phir Jibreel alaihis salam ne namaz parhi to Nabi Karim salla Allahu alaihi wa sallam ne bhi namaz parhi , phir Jibreel alaihis salam ne kaha ke mein isi tarah hukm diya gaya hun . Is par Umar bin Abdul Aziz rahimahullah ne Urwah se kaha , maloom bhi hai aap kya bayan kar rahe hain ? kya Jibreel alaihis salam ne Nabi Karim salla Allahu alaihi wa sallam ko namaz ke auqat amal kar ke batlaye thay . Urwah ne kaha , ke haan isi tarah Bashir bin Abi Masood raziyallahu anhu apne walid ke wastay se bayan karte thay .

Urwah rahimahullah alaihi ne kaha ke mujh se Aisha raziyallahu anha ne bayan kiya ke Rasool Allah salla Allahu alaihi wa sallam asr ki namaz is waqt parh lete thay jab abhi dhoop un ke hijra mein mojood hoti thi is se bhi pehle ke woh deewar par charhe .

Hum se Qutaiba bin Saeed ne bayan kiya , kaha hum se Abbad bin Abbad Basri ne , aur yeh Abbad ke larke hain , Abu Jamra Nasr bin Imran ke zariye se , unhon ne Ibn Abbas raziyallahu anhuma se , unhon ne kaha ke Abdul Qais ka wafd Rasool Allah salla Allahu alaihi wa sallam ki khidmat mein aaya aur kaha ke hum is Rabia qabeela se hain aur hum aap salla Allahu alaihi wa sallam ki khidmat mein sirf hurmat wale mahinon hi mein hazir ho sakte hain , is liye aap salla Allahu alaihi wa sallam kisi aisi baat ka humein hukm dijiye , jisay hum aap salla Allahu alaihi wa sallam se seekh len aur apne peechay rehne wale doosre logon ko bhi is ki dawat de saken , aap salla Allahu alaihi wa sallam ne farmaya ke mein tumhein char cheezon ka hukm deta hun aur char cheezon se rokta hun , pehle Allah par iman lane ka , phir aap salla Allahu alaihi wa sallam ne is ki tafseel bayan farmayi ke is baat ki shahadat dena ke Allah ke siwa koi mabood nahi aur yeh ke mein Allah ka Rasool hun , aur doosre namaz qaim karne ka , teesre zakat dene ka , aur chothe jo maal tumhein ghanimat mein mile , is mein se panchwan hissa ada karne ka aur tumhein mein tunbari hantam , qasar aur naqir ke istimal se rokta hun . Note: yeh tamam bartan sharab banane ke liye istimal hote thay .

Hum se Muhammad bin Musanna ne bayan kiya , unhon ne kaha ke hum se Yahya bin Saeed Qattan ne kaha ke hum se Ismail bin Abi Khalid ne bayan kiya , unhon ne kaha ke hum se Qais bin Abi Hazim ne Jarir bin Abdullah raziyallahu anhu ki riwayat se bayan kiya ke Jarir bin Abdullah Bajli raziyallahu anhu ne farmaya ke mein ne Rasool Allah salla Allahu alaihi wa sallam ke dast mubarak par namaz qaim karne , zakat dene , aur har muslim ke sath khair khwahi karne par bayat ki .

Hum se Musaddad bin Musarhad ne bayan kiya , unhon ne kaha hum se Yahya bin Saeed Qattan ne Amash ki riwayat se bayan kiya , Amash Sulaiman bin Mihran ne kaha ke mujh se Shaqiq bin Muslima ne bayan kiya , Shaqiq ne kaha ke mein ne Hudhaifa bin Yaman raziyallahu anhu se suna . Hudhaifa raziyallahu anhu ne farmaya ke hum Umar raziyallahu anhu ki khidmat mein baithe hue thay ke aap ne poocha ke fitna se mutalliq Rasool Allah salla Allahu alaihi wa sallam ki koi hadees tum mein se kisi ko yaad hai ? mein bola , mein ne isay isi tarah yaad rakha hai jaisay Nabi Karim salla Allahu alaihi wa sallam ne is hadees ko bayan farmaya tha . Umar raziyallahu anhu bole , ke tum Rasool Allah salla Allahu alaihi wa sallam se fitna ko maloom karne mein bohot bebak thay . Mein ne kaha ke insaan ke ghar wale , maal aulad aur parosi sab fitna ki cheez hain . Aur namaz , roza , sadaqa , achhi baat ke liye logon ko hukm karna aur buri baton se rokna un fitnon ka kaffara hain . Umar raziyallahu anhu ne farmaya ke mein tum se is ke mutalliq nahi poochta , mujhe tum is fitna ke baray mein batlao jo samandar ki mauj ki tarah thathen marta hua barhe ga . Is par mein ne kaha ke ya Amir al-Momineen! aap is se khauf na khayen . Aap ke aur fitna ke darmiyan ek band darwaza hai . Poocha kya woh darwaza tor diya jaye ga ya sirf khola jaye ga . Mein ne kaha ke tor diya jaye ga . Umar raziyallahu anhu bol uthe , ke phir to woh kabhi band nahi ho sake ga . Shaqiq ne kaha ke hum ne Hudhaifa raziyallahu anhu se poocha , kya Umar raziyallahu anhu is darwaze ke mutalliq kuch ilm rakhte thay to unhon ne kaha ke haan! bilkul isi tarah jaisay din ke baad raat ke aane ka . Mein ne tum se ek aisi hadees bayan ki hai jo qatan ghalat nahi hai . Humein is ke mutalliq Hudhaifa raziyallahu anhu se poochne mein dar hota tha ke darwaza se kya murad hai is liye hum ne Masrooq se kaha ke woh poochhen unhon ne darayaf kiya to aap ne bataya ke woh darwaza khud Umar raziyallahu anhu hi thay .

Hum se Qutaiba ne bayan kiya , kaha ke hum se Yazid bin Zurai ne bayan kiya , Sulaiman Taimi ke wastay se , unhon ne Abu Usman Nahdi se , unhon ne Ibn Masood raziyallahu anhu se ke ek shakhs ne kisi ghair aurat ka bosa le liya . Aur phir Nabi Karim salla Allahu alaihi wa sallam ki khidmat mein aaya aur aap ko is harkat ki khabar de di . Is par Allah Taala ne yeh ayat nazil farmayi , ke namaz din ke dono hisson mein qaim karo aur kuch raat gaye bhi , aur bilashubha nekiyan buraiyon ko mita deti hain . Is shakhs ne kaha ke ya Rasool Allah! kya yeh sirf mere liye hai . To aap salla Allahu alaihi wa sallam ne farmaya ke nahi balkay meri tamam ummat ke liye yahi hukm hai .

Hum se Abul Waleed Hisham bin Abdul Malik ne bayan kiya , kaha hum se Shoba ne , unhon ne kaha ke mujhe Waleed bin Aizar Kufi ne khabar di , kaha ke mein ne Abu Amr wa Shaibani se suna , woh kehte thay ke mein ne is ghar ke malik se suna , aap Abdullah bin Masood raziyallahu anhu ke ghar ki taraf ishara kar rahe thay unhon ne farmaya ke mein ne Nabi Karim salla Allahu alaihi wa sallam se poocha ke Allah Taala ki bargah mein kon sa amal zyada mahboob hai ? Aap salla Allahu alaihi wa sallam ne farmaya ke apne waqt par namaz parhna , phir poocha , is ke baad , farmaya walidain ke sath neik muamla rakhna . Poocha is ke baad , aap salla Allahu alaihi wa sallam ne farmaya ke Allah ki raah mein jihad karna . Ibn Masood raziyallahu anhu ne farmaya ke Nabi Karim salla Allahu alaihi wa sallam ne mujhe yeh tafseel batayi aur agar mein aur sawalat karta to aap salla Allahu alaihi wa sallam aur zyada bhi batlate . Lekin mein ne butor adab khamoshi ikhtiyar ki .

Hum se Ibrahim bin Hamza ne bayan kiya , kaha hum se Abdul Aziz bin Abi Hazim aur Abdul Aziz bin Muhammad Darawardi ne Yazid bin Abdullah ki riwayat se , unhon ne Muhammad bin Ibrahim Taimi se , unhon ne Abu Salama bin Abdur Rahman bin Awf raziyallahu anhu se , unhon ne Abu Hurairah raziyallahu anhu se ke unhon ne Rasool Allah salla Allahu alaihi wa sallam se suna aap salla Allahu alaihi wa sallam farmate thay ke agar kisi shakhs ke darwaze par nahr jari ho aur woh rozana is mein paanch paanch dafa nahaye to tumhara kya guman hai . Kya is ke badan par kuch bhi mail baqi reh sakta hai ? Sahaba ne arz ki ke nahi ya Rasool Allah! hargiz nahi . Aap salla Allahu alaihi wa sallam ne farmaya ke yahi haal pancho waqt ki namazon ka hai ke Allah pak un ke zariye se gunahon ko mita deta hai .

Hum se Moosa bin Ismail ne bayan kiya , kaha hum se Mahdi bin Maimoon ne Ghilan bin Jarir ke wastay se , unhon ne Anas raziyallahu anhu se , aap ne farmaya ke Nabi Karim salla Allahu alaihi wa sallam ke ehd ki koi baat is zamane mein nahi pata . Logon ne kaha , namaz to hai . Farmaya is ke andar bhi tum ne kar rakha hai jo kar rakha hai .