Hum se Musaddad ne bayan kiya, kaha hum se Yahya Qattan ne bayan kiya, in se Sufyan Sawri ne, in se Saad bin Ibrahim ne, in se Abdullah bin Shaddad ne aur in se Ali razi Allahu anhu ne bayan kiya ke main ne Rasool Allah salla Allahu alaihi wasallam ko kisi ke liye apne Aap ko qurban karne ka lafz kehte nahi suna, siwa Saad bin Abi Waqqas ke. Main ne Nabi Karim salla Allahu alaihi wasallam se suna, Aap salla Allahu alaihi wasallam farma rahe thay. Teer maar, Ae Saad! Mere maan baap tum par qurban hon, mera khayal hai ke yeh Ghazwa e Uhud ke mauqa par farmaya.

Aur Abu Bakr razi Allahu anhu ne Nabi Karim salla Allahu alaihi wasallam se kaha hum ne Aap par apne baapon aur maaon ko qurban kiya.

Hum se Ali bin Abdullah Madini ne bayan kiya, kaha hum se Bishr bin Mufaddal ne bayan kiya, kaha hum se Yahya bin Abi Ishaq ne bayan kiya aur in se Anas bin Malik razi Allahu anhu ne ke woh aur Abu Talha Nabi Karim salla Allahu alaihi wasallam ke saath (Madinah Munawwarah ke liye) rawana huay. Umm al-Momineen Safiyyah razi Allahu anha Nabi Karim salla Allahu alaihi wasallam ki sawari par Aap ke peeche thien, rasta mein kisi jagah oontni ka paon phisal gaya aur Nabi Karim salla Allahu alaihi wasallam aur Umm al-Momineen gir gaye. Anas razi Allahu anhu ne bayan kiya ke mera khayal hai Abu Talha ne apni sawari se fauran apne ko gira diya aur Nabi Karim salla Allahu alaihi wasallam ki khidmat mein pahunch gaye aur arz kiya: ya Nabiy-yallah! Allah Aap par mujhe qurban kare kya Aap ko koi chot aayi? Nabi Karim salla Allahu alaihi wasallam ne farmaya ke nahi, albatta aurat ko dekho. Chunanche Abu Talha razi Allahu anhu ne kapra apne chehre par daal liya, phir Umm al-Momineen ki taraf barhe aur apna kapra in ke oopar daal diya. Is ke baad woh khari ho gayiein aur Nabi Karim salla Allahu alaihi wasallam aur Umm al-Momineen ke liye Abu Talha ne palan mazboot baandha. Ab Aap ne sawar ho kar phir safar shuru kiya, jab Madinah Munawwarah ke qareeb pahunche (ya yun kaha ke Madinah dikhayi dene laga) to Nabi Karim salla Allahu alaihi wasallam ne farmaya «aayiboona taa-iboona, aabidoona lirabbina haamidoona» ”hum lautne wale hain tauba karte huay apne Rabb ki ibadat karte huay aur is ki hamd bayan karte huay.“ Nabi Karim salla Allahu alaihi wasallam usay barabar kehte rahe yahan tak ke Madinah mein dakhil ho gaye.

Hum se Sadaqah bin Fadl ne bayan kiya, kaha hum ko Sufyan bin Uyaynah ne khabar di, in se Ibn al-Munkadir ne bayan kiya aur in se Jabir razi Allahu anhu ne bayan kiya ke hum mein se ek sahab ke yahan bacha paida hua to unhon ne is ka naam Qasim rakkha. Hum ne in se kaha ke hum tum ko Abu al-Qasim keh kar nahi pukarein ge (kyunke Abu al-Qasim Nabi Karim salla Allahu alaihi wasallam ki kuniyat thi) aur na hum tumhari izzat ke liye aisa karein ge. In sahab ne is ki khabar Nabi Karim salla Allahu alaihi wasallam ko di, to Nabi Karim salla Allahu alaihi wasallam ne farmaya ke apne bete ka naam Abd-ur-Rahman rakh le.

Yeh Anas razi Allahu anhu ne Nabi Karim salla Allahu alaihi wasallam se riwayat kiya hai.

Hum se Musaddad ne bayan kiya, kaha hum se Khalid ne bayan kiya, kaha hum se Haseen ne bayan kiya, in se Salim ne aur in se Jabir razi Allahu anhu ne bayan kiya ke hum mein se ek shakhs ke yahan bacha paida hua to unhon ne is ka naam Qasim rakkha. Sahabah ne in se kaha ke jab tak hum Nabi Karim salla Allahu alaihi wasallam se na pooch lein. Hum is naam par tumhari kuniyat nahi hone dein ge. Phir Nabi Karim salla Allahu alaihi wasallam ne farmaya ke mere naam par naam rakkho lekin meri kuniyat na ikhtiyar karo.

Hum se Ali bin Abdullah ne bayan kiya, unhon ne kaha hum se Sufyan bin Uyaynah ne bayan kiya, in se Ayub Sakhtiyani ne, in se Muhammad bin Sireen ne aur unhon ne Abu Hurairah razi Allahu anhu se suna ke Abu al-Qasim salla Allahu alaihi wasallam ne farmaya ”mere naam par naam rakkho lekin meri kuniyat na rakkho.“

Hum se Abdullah bin Muhammad Musandi ne bayan kiya, kaha hum se Sufyan ne bayan kiya, kaha ke main ne Muhammad bin al-Munkadir se suna ke kaha ke main ne Jabir bin Abdullah Ansari razi Allahu anhuma se suna ke hum mein se ek aadmi ke yahan bacha paida hua to unhon ne is ka naam Qasim rakkha. Sahabah ne kaha ke hum tumhari kuniyat Abu al-Qasim nahi rakhein ge aur na teri aankh is kuniyat se pukar kar thandi karein ge. Woh shakhs Nabi Karim salla Allahu alaihi wasallam ki khidmat mein hazir hua aur Aap se is ka zikr kiya. Aap salla Allahu alaihi wasallam ne farmaya ke apne larke ka naam Abd-ur-Rahman rakh lo.

Hum se Ishaq bin Nadr ne bayan kiya, unhon ne kaha hum se Abd-ul-Razzaq ne bayan kiya, unhon ne kaha hum ko Mamar ne khabar di, unhein Zuhri ne, unhein Saeed bin al-Musayyab ne aur unhein in ke walid Musayyab razi Allahu anhu ne ke in ke walid (Hazn bin Abi Wahb) Nabi Karim salla Allahu alaihi wasallam ki khidmat mein hazir huay to Nabi Karim salla Allahu alaihi wasallam ne daryaft farmaya ke tumhara naam kya hai? Unhon ne bataya ke «hazn» (bamaani sakhti). Nabi Karim salla Allahu alaihi wasallam ne farmaya ke tum «sahl» (bamaani narmi) ho, phir unhon ne kaha ke mera naam mere walid rakh gaye hain usay main nahi badoon ga. Ibn Musayyab rahmahullah bayan karte thay ke chunanche hamare khandan mein baad tak hamesha sakhti aur museebat ka daur raha.

Hum se Saeed bin Abi Maryam ne bayan kiya, kaha hum se Abu Ghassan ne bayan kiya, kaha ke mujh se Abu Hazim ne bayan kiya aur in se Sahl razi Allahu anhu ne bayan kiya ke Munzhir bin Abi Usayd razi Allahu anhu ki wiladat hui to unhein Nabi Karim salla Allahu alaihi wasallam ke paas laya gaya. Nabi Karim salla Allahu alaihi wasallam ne bacha ko apni raan par rakh liya. Abu Usayd razi Allahu anhu baithe huay thay. Nabi Karim salla Allahu alaihi wasallam kisi cheez mein jo samne thi masroof ho gaye (aur bacha ki taraf tawaj-jo hat gayi). Abu Usayd razi Allahu anhu ne bacha ke mutalliq hukm diya aur Nabi Karim salla Allahu alaihi wasallam ki raan se utha liya gaya. Phir jab Nabi Karim salla Allahu alaihi wasallam mutawaj-jo huay to farmaya ke bacha kahan hai? Abu Usayd razi Allahu anhu ne arz kiya: ya Rasool Allah! Hum ne usay ghar bhej diya. Nabi Karim salla Allahu alaihi wasallam ne poochha: is ka naam kya hai? Arz kiya ke falan. Nabi Karim salla Allahu alaihi wasallam ne farmaya, balkay is ka naam Munzhir hai. Chunanche isi din Nabi Karim salla Allahu alaihi wasallam ne in ka yahi naam Munzhir rakkha.