Main ne Nabi Karim salla Allahu alaihi wasallam se shikayat ki ke main ghore par jum kar nahi baith paata to Nabi Karim salla Allahu alaihi wasallam ne apna hath mere seene par maara aur dua ki «allahumma sabit-hu waj-alhu haadiyam-mahdiy-yan» ”Ae Allah! Isay sabat farma, isay hidayat karne wala aur khud hidayat paya hua bana.“

Hum se Muhammad bin Musanna ne bayan kiya, kaha hum se Yahya Qattan ne bayan kiya, in se Hisham bin Urwah ne bayan kiya, unhein in ke walid ne khabar di, unhein Zaynub bint Umm Salamah razi Allahu anhuma ne, unhein Umm Salamah razi Allahu anha ne ke Umm Sulaym razi Allahu anha ne arz kiya: ya Rasool Allah! Allah haq se nahi sharmata, kya aurat ko jab ihtilam ho to is par ghusl wajib hai? Nabi Karim salla Allahu alaihi wasallam ne farmaya ke haan jab aurat pani dekhe (to is par ghusl wajib hai) is par Umm Salamah razi Allahu anha hansien aur arz kiya, kya aurat ko bhi ihtilam hota hai? Nabi Karim salla Allahu alaihi wasallam ne farmaya ke phir bacha ki surat maan se kyun milti hai.

Hum se Yahya bin Sulayman ne bayan kiya, unhon ne kaha ke mujh se Ibn Wahb ne bayan kiya, unhon ne kaha hum ko Amr ne khabar di, in se Abu al-Nadr ne bayan kiya, in se Sulayman bin Yasar ne aur in se Aisha razi Allahu anha ne bayan kiya ke Nabi Karim salla Allahu alaihi wasallam ko is tarah khul kar kabhi hanste nahi dekha ke Aap ke halaq ka kauwa nazar aane lagta ho, Aap salla Allahu alaihi wasallam sirf muskurate thay.

Hum se Muhammad bin Mahboob ne bayan kiya, kaha hum se Abu Awanah ne bayan kiya, in se Qatadah ne aur in se Anas razi Allahu anhu ne (doosri sanad) aur mujh se Khaleefa ne bayan kiya, kaha hum ko Yazid bin Zuray ne bayan kiya, in se Saeed ne bayan kiya, in se Qatadah ne aur in se Anas razi Allahu anhu ne ke ek sahab Jumu'ah ke din Nabi Karim salla Allahu alaihi wasallam ke paas aaye Nabi Karim salla Allahu alaihi wasallam is waqt Madinah mein Jumu'ah ka khutba de rahe thay, unhon ne arz kiya baarish ka qahet par gaya hai, Aap apne Rabb se baarish ki dua kijiye. Nabi Karim salla Allahu alaihi wasallam ne aasman ki taraf dekha kahin hamain baadal nazar nahi aa raha tha. Phir Aap ne baarish ki dua ki, itne mein baadal utha aur baaz tukray baaz ki taraf barhe aur baarish hone lagi, yahan tak ke Madinah ke naale behne lage. Agle Jumu'ah tak isi tarah baarish hoti rahi silsila toot-ta hi na tha chunanche wahi sahab ya koi doosre (agle Jumu'ah ko) khare huay, Nabi Karim salla Allahu alaihi wasallam khutba de rahe thay aur unhon ne arz kiya: hum doob gaye, apne Rabb se dua karein ke ab baarish band kar de. Nabi Karim salla Allahu alaihi wasallam ne farmaya, Ae Allah! Hamare charon taraf baarish ho, hum par na ho. Do ya teen martaba Aap salla Allahu alaihi wasallam ne yeh farmaya, chunanche Madinah Munawwarah se baadal chhatne lage, bayein aur dayein, hamare charon taraf doosre maqamat par baarish hone lagi aur hamare yahan baarish yak-dum band ho gayi. Yeh Allah ne logon ko Nabi Karim salla Allahu alaihi wasallam ka mo-jiza aur apne Paighambar salla Allahu alaihi wasallam ki karamat aur dua ki qabooliyat batlayi.

Hum se Usman bin Abi Shaybah ne bayan kiya, unhon ne kaha hum se Jareer ne bayan kiya, in se Mansoor ne bayan kiya, in se Abu Wail ne bayan kiya aur in se Abdullah bin Masood razi Allahu anhu ne bayan kiya ke Nabi Karim salla Allahu alaihi wasallam ne farmaya ”bilashubha sach aadmi ko naiki ki taraf bulata hai aur naiki jannat ki taraf le jati hai aur ek shakhs sach bolta rehta hai yahan tak ke woh Siddiq ka laqab aur martaba haasil kar leta hai aur bilashubha jhoot burayi ki taraf le jata hai aur burayi jahannum ki taraf aur ek shakhs jhoot bolta rehta hai, yahan tak ke woh Allah ke yahan bahut jhoota likh diya jata hai.“

Hum se Muhammad bin Salam ne bayan kiya, kaha hum se Ismail bin Jafar ne bayan kiya, in se Abi Suhayl Nafi bin Malik bin Abi Aamir ne, in se un ke walid Malik bin Abi Aamir ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”munafiq ki teen nishaniyaan hain, jab bolta hai jhoot bolta hai, jab wada karta hai khilaf karta hai aur jab usay ameen banaya jata hai to khiyanat karta hai.“

Hum se Musa bin Ismail ne bayan kiya, unhon ne kaha hum se Jareer ne bayan kiya, unhon ne kaha hum se Abu Rajaa ne bayan kiya, in se Samura bin Jundub razi Allahu anhu ne bayan kiya ke Nabi Karim salla Allahu alaihi wasallam ne farmaya ”mere paas guzashta raat khwab mein do aadmi aaye unhon ne kaha ke jise Aap ne dekha ke is ka jabra cheera ja raha tha woh bara hi jhoota tha, jo ek baat ko leta aur saari duniya mein phaila deta tha, Qayamat tak is ko yahi saza milti rahe gi.“

Hum se Ishaq bin Ibrahim Rahwayh ne bayan kiya, kaha ke main ne Abu Usamah se poochha kya tum se Aamash ne yeh bayan kiya ke main ne Shaqeeq se suna, kaha main ne Huzayfah razi Allahu anhu se suna, woh bayan karte thay ke bilashubha sab logon se apni chaal-dhaal aur waza aur seerat mein Rasool Allah salla Allahu alaihi wasallam se sab se zyada mushaba Abdullah bin Masood razi Allahu anhu hain. Jab woh apne ghar se bahar nikalte aur is ke baad dobara apne ghar wapas aane tak in ka yahi haal rehta hai lekin jab woh akele ghar mein rehte to maloom nahi kya karte rehte hain.

Hum se Abu al-Waleed ne bayan kiya, kaha hum se Shubah ne bayan kiya, in se Mukhariq ne, unhon ne kaha main ne Tariq se suna, kaha ke Abdullah bin Masood razi Allahu anhu ne kaha bilashubha sab se achha kalam Allah ki kitab hai aur sab se achha tariqa (chaal-chalan) Muhammad salla Allahu alaihi wasallam ka tariqa hai.

Aur Allah Ta'ala ne (Surah al-Ra'd mein) farmaya «innamaa yuwaf-fas-saabiroona ajrahum bi-ghairi hisaabin» ”bilashubha sabr karne wale be-hadd apna sawab payein ge.“