Hum se Qays bin Hafs ne bayan kiya , unhon ne kaha hum se Abd-ul-Wahid ne bayan kiya , kaha hum se Aamash ne bayan kiya , unhon ne kaha ke mujh se Abu al-Duha ne bayan kiya , unhon ne kaha ke mujh se Masrooq ne bayan kiya , unhon ne kaha ke mujh se Mugheera bin Shubah razi Allahu anhu ne bayan kiya ke Nabi Karim salla Allahu alaihi wasallam qaza e hajat ke liye bahar tashreef le gaye phir wapas aaye to main pani le kar hazir tha . Aap ne wuzu kiya Aap Shami jubba pehne huay thay , Aap ne kulli ki aur naak mein pani dala aur apna chehra dhoya phir apni aastinein charhane lage lekin woh tang thi is liye Aap ne apne hath jubbe ke neeche se nikale aur unhein dhoya aur sar par aur mozon par masah kiya .

Hum se Abu Nuaym ne bayan kiya , kaha hum se Zakariya ne bayan kiya , in se Aamir ne , in se Urwah bin Mugheera ne aur in se un ke walid Mugheera razi Allahu anhu ne bayan kiya ke main ek raat safar mein Nabi Karim salla Allahu alaihi wasallam ke saath tha Aap ne daryaft farmaya tumhare paas pani hai ? Main ne arz kiya ke ji haan . Nabi Karim salla Allahu alaihi wasallam apni sawari se utre aur chalte rahe yahan tak ke raat ki tareeki mein Aap chhup gaye phir wapas tashreef laaye to main ne bartan ka pani Aap ko istemal karaya Nabi Karim salla Allahu alaihi wasallam ne apna chehra dhoya , hath dhoye Aap oon ka jubba pehne huay thay jis ki aastin charhani Aap ke liye dushwar thi chunanche Aap ne apne hath jubbe ke neeche se nikale aur baazuon ko (kohniyon tak) dhoya . Phir sar par masah kiya phir main barha ke Nabi Karim salla Allahu alaihi wasallam ke mozay utar doon lekin Aap salla Allahu alaihi wasallam ne farmaya ke rehne do main ne taharat ke baad unhein pehna tha chunanche Aap ne in par masah kiya .

«farauj» bhi «qaba» hi ko kehte hain . Baaz ne kaha ke «farauj» is «qaba» ko kehte hain jis mein peeche chaak hota hai .

Hum se Qutaybah bin Saeed ne bayan kiya , kaha hum se Layth bin Saad ne bayan kiya , in se Ibn Abi Mulaykah ne aur in se Miswar bin Makhrama razi Allahu anhu ne bayan kiya ke Rasool Allah salla Allahu alaihi wasallam ne chand qabayein taqseem kiein aur Makhrama razi Allahu anhu ko kuch nahi diya to Makhrama razi Allahu anhu ne kaha bete hamain Rasool Allah salla Allahu alaihi wasallam ke paas le chalo chunanche main apne walid ko saath le kar chala , unhon ne mujh se kaha ke andar jao aur Nabi Karim salla Allahu alaihi wasallam se mera zikr kar do . Main ne Nabi Karim salla Allahu alaihi wasallam se Makhrama razi Allahu anhu ka zikr kiya to Aap bahar tashreef laaye . Nabi Karim salla Allahu alaihi wasallam unhein qabaon mein se ek qaba liye huay thay . Aap salla Allahu alaihi wasallam ne farmaya ke yeh main ne tumhare hi liye rakh chhorri thi . Miswar ne bayan kiya ke Makhrama razi Allahu anhu ne Nabi Karim salla Allahu alaihi wasallam ki taraf dekha to Nabi Karim salla Allahu alaihi wasallam ne farmaya ke Makhrama khush ho gaye .

Hum se Qutaybah bin Saeed ne bayan kiya , kaha hum se Layth bin Saad ne bayan kiya , in se Yazid bin Abi Habeeb ne , in se Abu al-Khair ne aur in se Uqbah bin Aamir razi Allahu anhu ne ke Rasool Allah salla Allahu alaihi wasallam ko resham ki farauj (qaba) hadiya mein di gayi . Nabi Karim salla Allahu alaihi wasallam ne usay pehna (resham ka mardon ke liye hurmat ke hukm se pehle) aur isi ko pehne huay namaz parhi . Phir Aap salla Allahu alaihi wasallam ne usay bari teizi ke saath utar dala jaise Aap is se nagowari mehsoos karte hon phir farmaya ke yeh muttaqiyon ke liye munasib nahi hai . Is riwayat ki mutabia-t Abdullah bin Yusuf ne ki in se Layth ne aur Abdullah bin Yusuf ke alawa doosron ne kaha ke «farauj e hareer» .

Aur kaha mujh se Musaddad ne aur kaha hum se Mutamir ne ke main ne apne baap se suna , kaha unhon ne ke main ne Anas razi Allahu anhu par reshmi zard topi ko dekha .

Hum se Ismail ne bayan kiya , unhon ne kaha ke mujh se Imam Malik ne bayan kiya , in se Nafi ne bayan kiya , in se Abdullah bin Umar razi Allahu anhuma ne bayan kiya ke ek shakhs ne arz kiya: ya Rasool Allah! Muhram kis tarah ka kapra pehne ? Nabi Karim salla Allahu alaihi wasallam ne farmaya (muhram ke liye) ke qamees na pehno , na amamay , na pajamay , na burnus aur na mozay albatta agar kisi ko chappal na mile to woh (chamre ke) mozon ko takhna se neeche tak kaat kar unhein pehan sakta hai aur na koi aisa kapra pehno jis mein zafran ya wars lagaya gaya ho .

Hum se Abu Nuaym ne bayan kiya , kaha hum se Sufyan Sawri ne bayan kiya , in se Amr ne , in se Jabir bin Zayd ne aur in se Abdullah bin Abbas razi Allahu anhuma ne bayan kiya ke Nabi Karim salla Allahu alaihi wasallam ne (muhram ke baare mein) farmaya ”jise tehmat na mile woh pajama pehne aur jise chappal na milein woh mozay pehnein .“

Hum se Musa bin Ismail ne bayan kiya , unhon ne kaha hum se Juwayriyah ne bayan kiya , in se Nafi ne aur in se Abdullah ne bayan kiya ke ek sahab ne khare ho kar arz kiya: ya Rasool Allah! Ihram baandhne ke baad hamain kis cheez ke pehnne ka hukm hai ? Farmaya ke qamees na pehno , na pajamay , na amamay , na burnus aur na mozay pehno . Albatta agar kisi ke paas chappal na hon to woh chamre ke aise mozay pehne jo takhnon se neeche hon aur koi aisa kapra na pehno jis mein zafran aur wars laga hua ho .

Hum se Ali bin Abdullah Madini ne bayan kiya , unhon ne kaha hum se Sufyan Sawri ne bayan kiya , unhon ne kaha ke main ne Zuhri se suna , unhon ne kaha ke mujhe Salim ne khabar di , unhein in ke walid (Abdullah bin Umar razi Allahu anhuma) ne khabar di ke Nabi Karim salla Allahu alaihi wasallam ne farmaya ke muhram qamees na pehne , na amama pehne , na pajama , na burnus aur na koi aisa kapra pehne jis mein zafran aur wars laga ho aur na mozay pehne albatta agar kisi ko chappal na milein to mozon ko takhnon ke neeche tak kaat de (phir pehne) .