Hum se Abdan ne bayan kiya, kaha hum se Abdullah bin Mubarak ne khabar di, kaha hum ko Yunus ne khabar di, in se Zuhri ne bayan kiya aur unhein Anas bin Malik razi Allahu anhu ne khabar di ke unhon ne Rasool Allah salla Allahu alaihi wasallam ko doodh peete dekha aur Nabi Karim salla Allahu alaihi wasallam in ke ghar tashreef laye thay (bayan kiya ke) main ne bakri ka doodh nikala aur is mein kunwien ka taza pani mila kar (Nabi Karim salla Allahu alaihi wasallam ko) pesh kiya Aap ne piyala le kar piya. Aap ke bayein taraf Abu Bakr razi Allahu anhu thay aur dayein taraf ek Aarabi tha Aap ne apna baqi doodh Aarabi ko diya aur farmaya ke pehle dayein taraf se, haan dayein taraf wale ka haq hai.

Hum se Abdullah bin Muhammad ne bayan kiya, kaha hum se Abu Aamir ne, kaha hum se Falih bin Sulayman ne bayan kiya, in se Saeed bin Haris ne aur in se Jabir bin Abdullah razi Allahu anhuma ne ke Nabi Karim salla Allahu alaihi wasallam qabila Ansar ke ek sahabi ke yahan tashreef le gaye Nabi Karim salla Allahu alaihi wasallam ke saath Aap ke ek rafeeq (Abu Bakr razi Allahu anhu) bhi thay. In se Aap salla Allahu alaihi wasallam ne farmaya ke agar tumhare yahan isi raat ka basi pani kisi mushkeeza mein rakkha hua ho (to hamain pilao) warna munh laga ke pani pee lein ge. Jabir razi Allahu anhu ne bayan kiya ke woh sahab (jin ke yahan Aap tashreef liye gaye thay) apne bagh mein pani de rahe thay. Bayan kiya ke in sahab ne kaha ke ya Rasool Allah! Mere paas raat ka basi pani maujood hai, Aap chhappar mein tashreef le chalein. Bayan kiya ke phir woh in donon hazrat ko saath le kar gaye phir unhon ne ek piyala mein pani liya aur apni ek doodh dene wali bakri ka is mein doodh nikala. Bayan kiya ke phir Nabi Karim salla Allahu alaihi wasallam ne usay piya, is ke baad Aap ke rafeeq Abu Bakr Siddiq razi Allahu anhu ne piya.

Aur Zuhri ne kaha agar pyas ki shiddat ho aur pani na mile to bhi insan ka peshab peena jaiz nahi kyunke woh najasat hai. Allah Ta-ala ne farmaya hai «uhilla lakum-ut-tayyibaatu» ke ”tumhare liye pakeeza cheezin halal ki gayi hain“ aur Ibn Masood razi Allahu anhu ne nasha laane wali cheezon ke baare mein kaha ke Allah Ta-ala ne tumhare liye haram cheezon mein shifa nahi rakkhi hai.

Hum se Ali bin Abdullah ne bayan kiya, kaha hum se Abu Usamah ne bayan kiya, kaha ke mujhe Hisham ne khabar di, unhein un ke walid ne aur in se Aisha razi Allahu anha ne bayan kiya ke Nabi Karim salla Allahu alaihi wasallam sheerini aur shehad ko dost rakhte thay.

Hum se Abu Nuaym ne bayan kiya, kaha hum se Mis-ar ne bayan kiya, in se Abd-ul-Malik bin Maysarah ne, in se Nazzal ne bayan kiya ke woh Ali razi Allahu anhu ki khidmat mein Masjid e Kufa ke sehan mein hazir huay phir Ali razi Allahu anhu ne khare ho kar piya aur kaha ke kuch log khare ho kar pani peene ko makrooh samajhte hain haalan ke main ne Rasool Allah salla Allahu alaihi wasallam ko is tarah karte dekha hai jis tarah tum ne mujhe is waqt khare ho kar pani peete dekha hai.

Hum se Adam ne bayan kiya, kaha hum se Shubah ne bayan kiya, kaha hum se Abd-ul-Malik bin Maysarah ne bayan kiya, unhon ne Nazzal bin Sabra se suna, woh Ali razi Allahu anhu se bayan karte thay ke unhon ne Zuhr ki namaz parhi phir Masjid e Kufa ke sehan mein logon ki zarooraton ke liye baith gaye. Is arsa mein Asr ki namaz ka waqt aa gaya phir in ke paas pani laya gaya. Unhon ne pani piya aur apna chehra aur hath dhoye, in ke sar aur paon (ke dhone ka bhi) zikr kiya. Phir unhon ne khare ho kar wuzu ka bacha hua pani piya, is ke baad kaha ke kuch log khare ho kar pani peene ko bura samajhte hain haalan ke Nabi Karim salla Allahu alaihi wasallam ne yunhi kiya tha jis tarah main ne kiya, wuzu ka pani khare ho kar piya.

Hum se Abu Nuaym ne bayan kiya, kaha hum se Sufyan ne bayan kiya, in se Aasim Ahwal ne, in se Shabi ne aur in se Abdullah bin Abbas razi Allahu anhuma ne bayan kiya ke Nabi Karim salla Allahu alaihi wasallam ne Zamzam ka pani khare ho kar piya.

Hum se Malik bin Ismail ne bayan kiya, kaha hum se Abdul Aziz bin Abi Salamah ne bayan kiya, kaha hum ko Abu al-Nadr ne khabar di, unhein Ibn Abbas razi Allahu anhuma ke ghulam Umair ne aur unhein Umm al-Fadl bint Haris ne ke unhon ne Nabi Karim salla Allahu alaihi wasallam ke liye doodh ka ek piyala bheja maidan e Arafat mein. Woh Arfa ke din ki shaam ka waqt tha aur Nabi Karim salla Allahu alaihi wasallam (apni sawari par) sawar thay, Aap ne apne hath mein woh piyala liya aur usay pee liya. Malik ne Abu al-Nadr se ”apne oont par“ ke alfaz zyada kiye.

Hum se Ismail ne bayan kiya, kaha ke mujh se Imam Malik ne bayan kiya, in se Ibn Shihab ne aur in se Anas bin Malik razi Allahu anhu ne ke Rasool Allah salla Allahu alaihi wasallam ki khidmat mein pani mila hua doodh pesh kiya gaya Nabi Karim salla Allahu alaihi wasallam ke dahni taraf ek dehati tha aur bayein taraf Abu Bakr razi Allahu anhu. Nabi Karim salla Allahu alaihi wasallam ne pee kar baqi dehati ko diya aur farmaya ke dayein taraf se, pas dayein taraf se.

Hum se Ismail bin Abi Oways ne bayan kiya, kaha ke mujh se Imam Malik ne bayan kiya, in se Abu Hazim bin Dinar ne aur in se Sahl bin Saad razi Allahu anhu ne ke Rasool Allah salla Allahu alaihi wasallam ki khidmat mein ek sharbat laya gaya Nabi Karim salla Allahu alaihi wasallam ne is mein se piya, Aap ke dayein taraf ek larka baitha hua tha aur bayein taraf burhe log (Khalid bin Waleed razi Allahu anhu jaise baithe huay) thay. Nabi Karim salla Allahu alaihi wasallam ne bache se kaha kya tum mujhe ijazat do ge ke main in (shuyookh) ko (pehle) de doon. Larke ne kaha: Allah ki qasam, ya Rasool Allah! Aap ke jhoote mein se milne wale apne hisse ke muamla mein, main kisi par eesaar nahi karoon ga. Rawi ne bayan kiya ke is par Nabi Karim salla Allahu alaihi wasallam ne larke ke hath mein piyala de diya.