Hum se Yahya bin Salih ne bayan kiya, kaha hum se Falih bin Sulayman ne bayan kiya, in se Saeed bin Haris ne aur in se Jabir bin Abdullah Ansari razi Allahu anhuma ne ke Nabi Karim salla Allahu alaihi wasallam qabila Ansar ke ek sahabi ke yahan tashreef le gaye. Nabi Karim salla Allahu alaihi wasallam ke saath Aap ke ek rafeeq bhi thay. Nabi Karim salla Allahu alaihi wasallam aur Aap ke rafeeq ne unhein salam kiya aur unhon ne salam ka jawab diya. Phir arz kiya ke ya Rasool Allah! Mere maan baap Aap par nisaar hon yeh bari garmi ka waqt hai woh apne bagh mein pani de rahe thay. Nabi Karim salla Allahu alaihi wasallam ne farmaya ke agar tumhare paas mashk mein raat ka rakkha hua pani hai (to woh pila do) warna hum munh laga kar pee lein ge. Woh sahab is waqt bhi bagh mein pani de rahe thay. Unhon ne arz kiya: ya Rasool Allah! Mere paas mashk mein raat ka rakkha hua basi pani hai phir woh chhappar mein gaye aur ek piyale mein basi pani liya phir apni ek doodh dene wali bakri ka doodh is mein nikala. Nabi Karim salla Allahu alaihi wasallam ne usay piya phir woh dobara laaye aur is martaba Nabi Karim salla Allahu alaihi wasallam ke rafeeq Abu Bakr razi Allahu anhu ne piya.

Hum se Musaddad ne bayan kiya, kaha hum se Mutamir ne, in se un ke walid ne, ke main ne Anas razi Allahu anhu se suna, unhon ne bayan kiya ke main khara hua apne qabila mein apne chachaon ko khajoor ki sharab pila raha tha. Main in mein se sab se chhota tha, itne mein kisi ne kaha ke sharab haram kar di gayi (Abu Talha razi Allahu anhu ne) kaha ke sharab phenk do. Chunanche hum ne phenk di. Sulayman ne kaha ke main ne Anas razi Allahu anhu se poochha is waqt log kis cheez ki sharab peete thay kaha ke paki aur kachi khajoor ki. Abu Bakr bin Anas ne kaha ke yahi in ki sharab hoti thi Anas razi Allahu anhu ne is ka inkar nahi kiya, Bakr bin Abdullah Muzni ya Qatadah ne kaha aur mujh se baaz logon ne bayan kiya ke unhon ne Anas razi Allahu anhu se suna, unhon ne bayan kiya ke ”in ki in dinon yahi (fadheeh) in ki sharab thi.“

Hum se Ishaq bin Mansoor ne bayan kiya, unhon ne kaha hum ko Rauh bin Ubadah ne khabar di, unhon ne kaha hum ko Ibn Jurayj ne khabar di, unhon ne kaha ke mujhe Ata ne khabar di, unhon ne Jabir bin Abdullah razi Allahu anhuma se suna, unhon ne bayan kiya ke Rasool Allah salla Allahu alaihi wasallam ne farmaya ke raat ki jab ibtida ho ya (Aap salla Allahu alaihi wasallam ne farmaya) jab shaam ho to apne bachon ko rok lo (aur ghar se bahar na nikalne do) kyunke is waqt shaytan phail jaate hain phir jab raat ki ek ghari guzar jaye to unhein chhorr do aur darwaze band kar lo aur is waqt Allah ka naam lo kyunke shaytan band darwaze ko nahi kholta aur Allah ka naam le kar apne mashkeezoon ka munh baandh do. Allah ka naam le kar apne bartanon ko dhak do, khwah kisi cheez ko chorayi mein rakh kar hi dhak sako aur apne charagh (sone se pehle) bujha diya karo.

Hum se Musa bin Ismail ne bayan kiya, kaha hum se Humam bin Yahya ne bayan kiya, in se Ata bin Abi Rabah ne aur in se Jabir bin Abdullah Ansari razi Allahu anhuma ne ke Rasool Allah salla Allahu alaihi wasallam ne farmaya ke tum jab sone lago to charagh bujha do. Darwaze band kar do, mashkon ke munh baandh do aur khane peene ke bartanon ko dhaanp do. Jabir razi Allahu anhu ne kaha ke mera khayal hai ke yeh bhi kaha khwah lakri hi ke zariye se dhak sako jo is ki chorayi mein Bismillah keh kar rakh di jaye.

Hum se Adam ne bayan kiya, kaha hum se Ibn Abi Zib ne bayan kiya, in se Zuhri ne, in se Ubaidullah bin Abdullah bin Utbah ne aur in se Abu Saeed Khudri razi Allahu anhu ne bayan kiya ke Nabi kareem salla Allahu alaihi wasallam ne mashkon mein «ikhtinaas» se mana farmaya mashk ka munh khol kar is mein munh laga kar pani peene se roka.

Hum se Muhammad bin Muqatil ne bayan kiya, kaha hum ko Abdullah bin Mubarak ne khabar di, kaha hum ko Yunus ne khabar di, in se Zuhri ne bayan kiya ke mujh se Ubaidullah bin Abdullah ne bayan kiya, unhon ne Abu Saeed Khudri razi Allahu anhu se suna, kaha ke main ne Rasool Allah salla Allahu alaihi wasallam se suna ke Aap ne mashkon mein «ikhtinaas» se mana farmaya hai. Abdullah ne bayan kiya ke Mamar ne bayan kiya ya in ke ghair ne ke «ikhtinaas» mashk se munh laga kar pani peene ko kehte hain.

Hum se Ali bin Abdullah ne bayan kiya, kaha hum se Sufyan ne bayan kiya, kaha hum se Ayub ne bayan kiya ke hum se Ikrimah ne kaha, tumhein main chand chhoti chhoti baatein na bata doon jinhein hamase Abu Hurairah razi Allahu anhu ne bayan kiya tha ke Rasool Allah salla Allahu alaihi wasallam ne mashk ke munh se munh laga kar pani peene ki mamanat ki thi aur (is se bhi Aap salla Allahu alaihi wasallam ne mana farmaya tha ke) koi shakhs apne paros ko apni diwar mein khounti waghaira gaarne se roke.

Hum se Musaddad ne bayan kiya, kaha hum se Ismail ne bayan kiya, kaha hum ko Ayub ne khabar di, unhein Ikrimah ne aur unhein Abu Hurairah razi Allahu anhu ne ke Nabi kareem salla Allahu alaihi wasallam ne mashk ke munh se pani peene ki mamanat farma di thi.

Hum se Musaddad ne bayan kiya, kaha hum se Yazid bin Zuray ne bayan kiya, kaha hum se Khalid Hazza ne bayan kiya, in se Ikrimah ne aur in se Ibn Abbas razi Allahu anhuma ne bayan kiya ke Nabi kareem salla Allahu alaihi wasallam ne mashk ke munh se pani peene ko mana farmaya tha.

Hum se Abu Nuaym ne bayan kiya, kaha hum se Shayban ne bayan kiya, in se Yahya bin Abi Kaseer ne, in se Abdullah bin Abi Qatadah ne, in se un ke walid ne bayan kiya ke Rasool Allah salla Allahu alaihi wasallam ne farmaya ke jab tum mein se koi shakhs pani piye to (peene ke) bartan mein (pani peete huay) saans na le aur jab tum mein se koi shakhs peshab kare to dahne hath ko zakar par na phere aur jab istinja kare to dahne hath se na kare.