Hum se Abu Aasim aur Abu Nuaym ne bayan kiya, unhon ne kaha ke hum se Urwah bin Sabit ne bayan kiya, unhon ne kaha ke mujhe Sumama bin Abdullah ne khabar di, bayan kiya ke Anas razi Allahu anhu do ya teen saanson mein pani peete thay.

Hum se Hafs bin Umar ne bayan kiya, kaha hum se Shubah ne bayan kiya, in se Hakeem bin Abi Layla ne, unhon ne bayan kiya ke Huzayfah bin al-Yaman razi Allahu anhu Madain mein thay. Unhon ne pani maanga to ek dehati ne un ko chaandi ke bartan mein pani la kar diya, unhon ne bartan ko is par phenk maara phir kaha main ne bartan sirf is wajah se phenka hai ke is shakhs ko main is se mana kar chuka tha lekin yeh baaz na aaya aur Rasool Allah salla Allahu alaihi wasallam ne hamain resham wa deeba ke pehnne se aur sone aur chaandi ke bartan mein khane peene se mana kiya tha aur Aap salla Allahu alaihi wasallam ne irshad farmaya tha ke yeh cheezin in kuffar ke liye duniya mein hain aur tumhein aakhirat mein milein ge.

Hum se Muhammad bin Musanna ne bayan kiya, unhon ne kaha hum se Ibn Abi Adi ne bayan kiya, in se Ibn Aun ne bayan kiya, in se Mujahid ne aur in se Ibn Abi Layla ne bayan kiya ke hum Huzayfah razi Allahu anhu ke saath nikle phir unhon ne Nabi kareem salla Allahu alaihi wasallam ka zikr kiya ke Nabi kareem salla Allahu alaihi wasallam ne farmaya tha ke sone aur chaandi ke piyala mein na piya karo aur na resham wa deeba pehna karo kyunke yeh cheezin in ke liye duniya mein hain aur tumhare liye aakhirat mein hain.

Hum se Ismail ne bayan kiya, unhon ne kaha ke mujh se Imam Malik bin Anas ne bayan kiya, in se Nafi ne, in se Zayd bin Abdullah bin Umar ne, in se Abdullah bin Abdur Rahman bin Abi Bakr Siddiq razi Allahu anhu ne bayan kiya aur in se Nabi kareem salla Allahu alaihi wasallam ki zauja mutahhara Umm Salamah razi Allahu anha ne bayan kiya ke Nabi kareem salla Allahu alaihi wasallam ne farmaya ke jo shakhs chaandi ke bartan mein koi cheez peeta hai to woh shakhs apne pait mein dozakh ki aag bhar-ka raha hai.

Hum se Musa bin Ismail ne bayan kiya, kaha hum se Abu Awanah ne bayan kiya, in se Ash-as bin Sulaym ne, in se Muawiyah bin Suwayd bin Muqarrin ne aur in se Bara bin Azib razi Allahu anhu ne bayan kiya ke Rasool Allah salla Allahu alaihi wasallam ne hamain saat cheezon ka hukm diya tha aur saat cheezon se hum ko mana farmaya tha. Nabi kareem salla Allahu alaihi wasallam ne hamain beemar ki iyadat karne, janaze ke peeche chalne, chheinkne wale ke jawab mein «yarhamukallah» kehne, dawat karne wale ki dawat ko qabool karne, salam phailane, mazloom ki madad karne aur qasam khane ke baad kaffara ada karne ka hukm farmaya tha aur Nabi kareem salla Allahu alaihi wasallam ne hamain sone ki angoothiyon se, chaandi mein peene ya (farmaya) chaandi ke bartan mein peene se, maisar (zain ya kajawa ke oopar resham ka gadda) ke istemal karne se aur qasi (atraf e Misr mein tayyar kiya jaane wala ek kapra jis mein resham ke dhagay bhi istemal hote thay) ke istemal karne se aur resham wa deeba aur istabraq pehnne se mana farmaya tha.

Mujh se Amr bin Abbas ne bayan kiya, kaha hum se Abdur Rahman ne bayan kiya, kaha hum se Sufyan ne bayan kiya, in se Salim Abu al-Nadr ne, in se Umm al-Fadl ke ghulam Umair ne aur in se Umm al-Fadl razi Allahu anha ne ke logon ne Arfa ke din Nabi kareem salla Allahu alaihi wasallam ke roze ke mutalliq shubha kiya to Nabi kareem salla Allahu alaihi wasallam ki khidmat mein doodh ka ek katora pesh kiya gaya aur Aap salla Allahu alaihi wasallam ne usay nosh farmaya.

Abu Burdah razi Allahu anhu ne bayan kiya ke mujh se Abdullah bin Salam razi Allahu anhu ne kaha haan main tumhein is piyale mein pilaoon ga jis mein Nabi kareem salla Allahu alaihi wasallam ne piya tha.

Hum se Saeed bin Abi Maryam ne bayan kiya, kaha hum se Abu Ghassan ne bayan kiya, kaha ke mujh se Abu Hazim ne bayan kiya, in se Sahl bin Saad razi Allahu anhu ne bayan kiya ke Nabi Karim salla Allahu alaihi wasallam se ek Arab aurat ka zikr kiya gaya phir Aap ne Usayd Saadi razi Allahu anhu ko in ke paas unhein laane ke liye kisi ko bhejne ka hukm diya chunanche unhon ne bheja aur woh aayin aur Bani Sa'dah ke qila mein utrien aur Nabi Karim salla Allahu alaihi wasallam bhi tashreef laye aur in ke paas gaye. Aap ne dekha ke ek aurat sar jhukaye baithi hai. Nabi Karim salla Allahu alaihi wasallam ne jab in se guftagu ki to woh kehne lagein ke main tum se Allah ki panah maangti hoon. Nabi Karim salla Allahu alaihi wasallam ne is par farmaya ke main ne tujh ko panah di! Logon ne baad mein in se poochha. Tumhein maloom bhi hai yeh kaun thay. Is aurat ne jawab diya ke nahi. Logon ne kaha ke yeh to Rasool Allah salla Allahu alaihi wasallam thay tum se nikah ke liye tashreef laye thay. Is par woh bolien ke phir to main bari bad-bakht hoon (ke Nabi Karim salla Allahu alaihi wasallam ko naraz kar ke wapas kar diya) isi din Nabi Karim salla Allahu alaihi wasallam tashreef laye aur Saqifa Bani Sa'dah mein apne sahabi ke saath baithe phir farmaya ke Sahl! Pani pilao. Main ne in ke liye yeh piyala nikala aur unhein is mein pani pilaya. Sahl razi Allahu anhu hamare liye bhi wahi piyala nikaal kar laaye aur hum ne bhi is mein pani piya. Rawi ne bayan kiya ke phir baad mein Khaleefa Umar bin Abd-ul-Aziz rahmahullah ne in se yeh maang liya tha aur unhon ne yeh in ko hiba kar diya tha.

Hum se Hasan bin Mudrik ne bayan kiya, unhon ne kaha ke mujh se Yahya bin Hammad ne bayan kiya, unhon ne kaha hamain ko Abu Awanah ne khabar di, in se Aasim Ahwal ne bayan kiya ke main ne Nabi Karim salla Allahu alaihi wasallam ka piyala Anas bin Malik razi Allahu anhu ke paas dekha hai woh phat gaya tha to Anas razi Allahu anhu ne usay chaandi se jorr diya. Phir Aasim ne bayan kiya ke woh umdah chaura piyala hai. Chamakdar lakri ka bana hua. Bayan kiya ke Anas razi Allahu anhu ne bataya ke main ne is piyale se Nabi Karim salla Allahu alaihi wasallam ko baar-ha pilaya hai. Rawi ne bayan kiya ke Ibn Sireen ne kaha ke is piyale mein lohe ka ek halqa tha. Anas razi Allahu anhu ne chaha ke is ki jagah chaandi ya sone ka halqa jarrwa dein lekin Abu Talha razi Allahu anhu ne in se kaha ke jise Rasool Allah salla Allahu alaihi wasallam ne banaya hai is mein hargiz koi tabdeeli na karo chunanche unhon ne yeh irada chhorr diya.

Hum se Qutaybah bin Saeed ne bayan kiya, kaha hum se Jareer ne bayan kiya, in se Aamash ne bayan kiya, in se Salim bin Abi al-Jad ne aur in se Jabir bin Abdullah ne bayan kiya ke main Nabi Karim salla Allahu alaihi wasallam ke saath tha aur Asr ki namaz ka waqt ho gaya thode se bache huay pani ke siwa hamare paas aur koi pani nahi tha usay ek bartan mein rakh kar Nabi Karim salla Allahu alaihi wasallam ki khidmat mein laya gaya Nabi Karim salla Allahu alaihi wasallam ne is mein apna hath dala aur apni ungliyaan phaila dein phir farmaya aao wuzu kar lo yeh Allah ki taraf se barkat hai. Main ne dekha ke pani Nabi Karim salla Allahu alaihi wasallam ki ungliyon ke darmiyan se phoot phoot kar nikal raha tha chunanche sab logon ne is se wuzu kiya aur piya bhi. Main ne is ki parwah kiye baghair ke pait mein kitna pani ja raha hai khoob pani piya kyunke mujhe maloom ho gaya tha ke barkat ka pani hai. Main ne Jabir razi Allahu anhu se poochha Aap log is waqt kitni tadaad mein thay? Batlaya ke ek hazar char sau. Is riwayat ki mutabia-t Amr ne Jabir razi Allahu anhu se ki hai aur Husain aur Amr bin Murrah ne Salim se bayan kiya aur in se Jabir razi Allahu anhu ne ke sahabah ki is waqt tadaad pandrah sau ku. Is ki mutabia-t Saeed bin al-Musayyab ne Jabir razi Allahu anhu se ki hai.