Aur khula mein talaq kyunkar pare gi ? Aur Allah Ta'ala ne Surah al-Baqarah mein farmaya «wa la yahillu lakum an ta'khuzhoo mimma aataytumoohunna shay'an» ke ”aur tumhare liye (shoharon ke liye) jaiz nahi ke jo (mahr) tum unhein (apni biwiyon ko) de chuke ho , is mein se kuch bhi wapas lo , siwa is surat ke jabke zaujain is ka khauf mehsoos karein ke woh (ek saath reh kar) Allah ke hudood ko qaim nahi rakh sakte .“ Umar razi Allahu anhu ne khula jaiz rakkha hai . Is mein baadshah ya qazi ke hukm ki zaroorat nahi hai aur Usman razi Allahu anhu ne kaha ke agar joru apne saare maal के badla mein khula kare sirf jora baandhne ka dhaga rehne de tab bhi khula karana durust hai . Taoos ne kaha ke «illa ay-yakhaafa alla yuqeema hudoodallahi» ka yeh matlab hai ke jab joru aur khawand apne apne faraiz ko jo husn e muashrat aur sohbat se mutalliq hain ada na kar sakein (is waqt khula karana durust hai) . Taoos ne in be-waqoof-on ki tarah yeh nahi kaha ke khula isi waqt durust hai jab aurat kahe ke main janabat ya haiz se ghusal hi nahi karoon gi .

Hum se Azhar bin Jameel ne byaan kiya , kaha hum se Abdul Wahhab Saqafi ne byaan kiya , kaha hum se Khalid ne byaan kiya , in se Ikrimah ne aur un se Ibn Abbas razi Allahu anhuma ne ke Sabit bin Qays razi Allahu anhu ki biwi Nabi Karim salla Allahu alaihi wasallam ki khidmat mein hazir hui aur arz kiya ke ya Rasool Allah! Mujhe in ke akhlaq aur deen ki wajah se in se koi shikayat nahi hai . Albatta main Islam mein kufr ko pasand nahi karti . (kyunke in ke saath reh kar in ke huqooq e zaujiyat ko nahi ada kar sakti) . Is par Nabi Karim salla Allahu alaihi wasallam ne in se farmaya ke kiya tum in ka bagh (jo unhon ne mahr mein diya tha) wapas kar sakti ho ? Unhon ne kaha ke ji haan . Nabi Karim salla Allahu alaihi wasallam ne (Sabit razi Allahu anhu se) farmaya ke bagh qabool kar lo aur unhein talaq de do .

Hum se Ishaq Wasiti ne byaan kiya , kaha hum se Khalid Tahhan ne byaan kiya , in se Khalid Hazza ne , un se Ikrimah ne ke Abdullah bin Ubayy (munafiq) ki behen Jameelah razi Allahu anha (jo Ubayy ki beti thi) ne yeh byaan kiya aur Rasool Allah salla Allahu alaihi wasallam ne in se daryaft farmaya tha ke kiya tum in (Sabit razi Allahu anhu) ka bagh wapas kar do gi ? Unhon ne arz kiya haan kar doon gi . Chunanche unhon ne bagh wapas kar diya aur unhon ne in ke shohar ko hukm diya ke unhein talaq de dein . Aur Ibrahim bin Tahman ne byaan kiya ke in se Khalid ne , in se Ikrimah ne Nabi Karim salla Allahu alaihi wasallam se aur (is riwayat mein byaan kiya ke) in ke shohar (Sabit razi Allahu anhu) ne unhein talaq de di .

Aur Ibn Abi Tameema se riwayat hai , in se Ikrimah ne , in se Ibn Abbas razi Allahu anhuma ne , unhon ne byaan kiya ke Sabit bin Qays razi Allahu anhu ki biwi Rasool Allah salla Allahu alaihi wasallam ki khidmat mein hazir huien aur arz kiya: ya Rasool Allah! Mujhe Sabit ke deen aur in ke akhlaq ki wajah se koi shikayat nahi hai lekin main in ke saath guzara nahi kar sakti . Nabi Karim salla Allahu alaihi wasallam ne is par farmaya ke phir kya tum in ka bagh wapas kar sakti ho ? Unhon ne arz kiya ji haan .

Hum se Muhammad bin Abdullah bin Mubarak Makhri ne kaha , kaha hum se Qurad Abu Nooh ne byaan kiya , kaha hum se Jareer bin Hazim ne byaan kiya , in se Ayub Sakhtiyani ne , in se Ikrimah ne aur in se Ibn Abbas razi Allahu anhuma ne byaan kiya ke Sabit bin Qays bin Shamas razi Allahu anhu ki biwi Nabi Karim salla Allahu alaihi wasallam ke paas aayin aur arz kiya: ya Rasool Allah! Sabit ke deen aur in ke akhlaq se mujhe koi shikayat nahi lekin mujhe khatra hai (ke main Sabit razi Allahu anhu ki na-shukri mein na phans jaon) . Nabi Karim salla Allahu alaihi wasallam ne is par in se daryaft farmaya ke kya tum in ka bagh (jo unhon ne mahr mein diya tha) wapas kar sakti ho ? Unhon ne arz kiya ji haan . Chunanche unhon ne woh bagh wapas kar diya aur Nabi Karim salla Allahu alaihi wasallam ke hukm se Sabit razi Allahu anhu ne unhein apne se juda kar diya .

Hum se Sulayman bin Harb ne byaan kiya , in se Hammad bin Yazid ne byaan kiya , in se Ayub Sakhtiyani ne in se Ikrimah ne yahi qissa (mursalan) naqal kiya aur is mein khatoon ka naam Jameelah aaya hai .

Aur Allah ne (Surah Nisa mein) farmaya «wa in khiftum shiqaqa baynihima fab-asoo hakamam min ahlihi wa hakamam min ahliha» ”agar tum miyan biwi ki na-ittifaqi se daro to ek panch mard walon mein se bhejo aur ek panch aurat ki taraf se muqarrar karo .“ (aakhir aayat tak) .

Hum se Abu al-Waleed ne byaan kiya , kaha hum se Layth bin Saad ne byaan kiya , in se Ibn Abi Mulaykah ne aur in se Miswar bin Makhramah razi Allahu anhu ne byaan kiya ke main ne Nabi Karim salla Allahu alaihi wasallam se suna , Aap salla Allahu alaihi wasallam farma rahe thay ke Bani Mugheerah ne is ki ijazat maangi hai ke Ali razi Allahu anhu se woh apni beti ka nikah kar lein lekin main unhein is ki ijazat nahi doon ga .

Hum se Ismail bin Abdullah Owaysi ne byaan kiya , kaha ke mujh se Imam Malik ne , in se Rabia bin Abi Abdur Rahman ne , in se Qasim bin Muhammad ne aur in se Nabi Karim salla Allahu alaihi wasallam ki zauja mutahhara Aisha razi Allahu anha ne byaan kiya ke Barira razi Allahu anha se deen ke teen masle maloom ho gaye . Awwal yeh ke unhein aazad kiya gaya aur phir un ke shohar ke baare mein ikhtiyar diya gaya (ke chahein un ke nikah mein rahein warna alag ho jayein) aur Rasool Allah salla Allahu alaihi wasallam ne (unhein ke baare mein) farmaya ke walaa' isi se qaim hoti hai jo aazad kare aur ek martaba Nabi Karim salla Allahu alaihi wasallam ghar mein tashreef laye to ek haandi mein gosht pakaya ja raha tha , phir khane ke liye Nabi Karim salla Allahu alaihi wasallam ke samne roti aur ghar ka salan pesh kiya gaya . Nabi Karim salla Allahu alaihi wasallam ne farmaya ke main ne to dekha ke haandi mein gosht bhi pak raha hai ? Arz kiya gaya ke ji haan lekin woh gosht Barira ko sadqa mein mila hai aur Nabi Karim salla Allahu alaihi wasallam sadqa nahi khate . Nabi Karim salla Allahu alaihi wasallam ne farmaya ke woh un ke liye sadqa hai aur hamare liye Barira ki taraf se tuhfa hai .

Hum se Abu al-Waleed ne byaan kiya , kaha hum se Shubah aur Hammam ne byaan kiya , in se Qatadah ne , in se Ikrimah ne aur in se Ibn Abbas razi Allahu anhuma ne ke main ne unhein ghalam dekha tha . Aap ki murad Barira razi Allahu anha ke shohar (Mugheeth) se thi .