Hum se Abu Naeem ne byaan kiya , kaha hum se Sufyan bin Uyaynah ne byaan kiya , un se Abdullah bin Zhakwan ne byaan kiya , un se Abdur Rahman Aaraj ne aur un se Abu Hurairah razi Allahu anhu ne byaan kiya ke Tufayl bin Amr razi Allahu anhu Nabi Karim salla Allahu alaihi wasallam ki khidmat mein hazir huay aur arz kiya ke qabila Daws to tabah hua . Is ne nafarmani aur inkar kiya (Islam qabool nahi kiya) Aap Allah se un ke liye dua kijiye . Nabi Karim salla Allahu alaihi wasallam ne farmaya ”Ae Allah! Qabila Daws ko hidayat de aur unhein mere yahan le aa .“

Mujh se Muhammad bin Alaa ne byaan kiya , kaha hum se Abu Usamah ne byaan kiya , kaha hum se Ismail bin Abi Khalid ne byaan kiya , un se Qays ne aur un se Abu Hurairah razi Allahu anhu ne byaan kiya ke jab main apne watan se Nabi Karim salla Allahu alaihi wasallam ki khidmat mein hazir hone ke liye chala to raste mein , main ne yeh sher parha (tarjuma) ”Kaisi hai takleef ki lambi yeh raat , khair is ne kufr se di hai najat“ aur mera ghulam raste mein bhaag gaya tha , phir main Nabi Karim salla Allahu alaihi wasallam ki khidmat mein hazir hua aur Aap se bai'at ki , abhi Aap ke paas main baitha hi hua tha ke woh ghulam dikhayi diya , Aap salla Allahu alaihi wasallam ne mujh se farmaya: Abu Hurairah! Yeh hai tumhara ghulam! Main ne kaha Allah ke liye main ne is ko ab aazad kar diya .

Hum se Musa bin Ismail ne byaan kiya , kaha hum se Abu Awanah ne byaan kiya , kaha hum se Abdul Malik bin Umayr ne byaan kiya , un se Amr bin Hurays ne aur un se Adi bin Hatim razi Allahu anhu ne byaan kiya ke hum Umar razi Allahu anhu ki khidmat mein (un ki daur e khilafat mein) ek wafd ki shakal mein aaye . Woh ek ek shakhs ko naam le le kar bulate jate thay) main ne un se kaha kya Aap mujhe pehchante nahi ? Ae Ameer al-Momineen! Farmaya kya tumhein bhi nahi pehchanoon ga , tum is waqt Islam laye jab yeh sab kufr par qaim thay . Tum ne is waqt tawajjo ki jab yeh sab munh morr rahe thay . Tum ne is waqt wafa ki jab yeh sab be-wafayi kar rahe thay aur is waqt pehchana jab in sab ne inkar kiya tha . Adi razi Allahu anhu ne kaha bas ab mujhe koi parwah nahi .

Hum se Ismail bin Abdullah ne byaan kiya , kaha hum se Imam Malik ne byaan kiya , un se Ibn Shihab ne , un se Urwah bin Zubayr ne aur un se Aisha razi Allahu anha ne byaan kiya ke Hajjat al-Wida ke mauqa par hum Rasool Allah salla Allahu alaihi wasallam ke saath rawana huay . Hum ne umrah ka ihram bandha tha phir Aap salla Allahu alaihi wasallam ne farmaya ke jis ke saath hadi ho woh umrah ke saath hajj ka bhi ihram bandh le aur jab tak donon ke arkan na ada kar le ihram na khole . Phir main Aap salla Allahu alaihi wasallam ke saath jab Makkah aayi to mujh ko haiz aa gaya . Is liye na Bayt Allah ka tawaf kar saki aur na Safa aur Marwah ki sayi kar saki . Main ne is ki shikayat Aap salla Allahu alaihi wasallam se ki to Aap salla Allahu alaihi wasallam ne farmaya ke sar khol le aur kangha kar le . Is ke baad hajj ka ihram bandh lo aur umrah chhor do . Main ne aisa hi kiya . Phir jab hum hajj ada kar chuke to Nabi Karim salla Allahu alaihi wasallam ne mujhe (mere bhai) Abdur Rahman bin Abi Bakr razi Allahu anhuma ke saath Taneem se (umrah ki) niyat karne ke liye bheja aur main ne umrah kiya . Nabi Karim salla Allahu alaihi wasallam ne farmaya ke yeh tumhare is chhoti huay umrah ki qaza hai . Aisha razi Allahu anha ne byaan kiya ke jin logon ne sirf umrah ka ihram bandha tha . Unhon ne Bayt Allah ke tawaf aur Safa aur Marwah ki sayi ke baad ihram khol diya . Phir Mina se wapsi ke baad unhon ne doosra tawaf (hajj ka) kiya , lekin jin logon ne hajj aur umrah donon ka ihram ek saath bandha tha , unhon ne ek hi tawaf kiya .

Mujh se Amr bin Ali Fallas ne byaan kiya , kaha hum se Yahya bin Saeed Qattan ne byaan kiya , kaha hum se Ibn Jurayj ne byaan kiya , kaha mujh se Ata bin Abi Rabah ne byaan kiya aur un se Ibn Abbas razi Allahu anhuma ne ke (umrah karne wala) sirf Bayt Allah ke tawaf se halal ho sakta hai . (Ibn Jurayj ne kaha) Main ne Ata se poocha ke Ibn Abbas razi Allahu anhuma ne yeh masla kahan se nikala ? Unhon ne bataya ke Allah Ta'ala ke irshad «summa mahilluha ilal Baytil Ateeq» (Surah al-Hajj) se aur Nabi Karim salla Allahu alaihi wasallam ke is hukm ki wajah se jo Aap ne apne as-haab ko Hajjat al-Wida mein ihram khol dene ke liye diya tha main ne kaha ke yeh hukm to Arafat mein theharne ke baad ke liye hai . Unhon ne kaha lekin Ibn Abbas razi Allahu anhuma ka yeh mazhab tha ke Arafat mein theharne se pehle aur baad har haal mein jab tawaf kar le to ihram khol daalna durust hai .

Mujh se Bayan bin Amr ne byaan kiya , kaha hum se Nadr bin Shumayl ne byaan kiya , unhein Shubah ne khabar di , un se Qays bin Muslim ne byaan kiya , unhon ne Tariq bin Shihab se suna aur un se Abu Musa Ash'ari razi Allahu anhu ne byaan kiya ke main Rasool Allah salla Allahu alaihi wasallam ki khidmat mein hazir hua . Is waqt Aap salla Allahu alaihi wasallam Wadi e Bathaa (sang-rezi zameen) mein qiyam kiye huay thay . Aap ne poocha tum ne hajj ka ihram bandh liya ? Main ne arz kiya ke ji haan . Daryaft farmaya , ihram kis tarah bandha hai ? Arz kiya (is tarah) ke main bhi isi tarah ihram bandhta hoon jis tarah Nabi Karim salla Allahu alaihi wasallam ne bandha hai . Aap salla Allahu alaihi wasallam ne farmaya ke pehle (umrah karne ke liye) Bayt Allah ka tawaf kar , phir Safa aur Marwah ki sayi kar , phir halal ho ja . Chunanche main Bayt Allah ka tawaf aur Safa aur Marwah ki sayi kar ke qabila Qays ki ek aurat ke ghar aaya aur unhon ne mere sar se juein nikalein .

Mujh se Ibrahim bin al-Munzhir ne byaan kiya , kaha hum ko Anas bin Ayadh ne khabar di , kaha hum se Musa bin Uqbah ne byaan kiya , un se Nafi ne unhein Abdullah bin Umar razi Allahu anhuma ne khabar di ke Nabi Karim salla Allahu alaihi wasallam ki zauja mutahhara Hafsa razi Allahu anha ne unhein khabar di ke Nabi Karim salla Allahu alaihi wasallam ne Hajjat al-Wida ke mauqa par apni biwiyon ko hukm diya ke (umrah karne ke baad) halal ho jayein (yani ihram khol dein) Hafsa razi Allahu anha ne arz kiya (ya Rasool Allah!) phir Aap kyun nahi halal hote ? Aap salla Allahu alaihi wasallam ne farmaya ke main ne to apne baalon ko jama liya hai aur apni qurbani ko haar pehna diya hai , is liye main jab tak qurbani na kar loon is waqt tak ihram nahi khol sakta .

Hum se Abu al-Yaman ne byaan kiya , kaha ke mujh se Shuayb ne byaan kiya , un se Zuhri ne , (doosri sanad) (aur Imam Bukhari rahmahullah alaihi ne kaha) aur mujh se Muhammad bin Yusuf Faryabi ne byaan kiya , kaha hum se Imam Awzai ne byaan kiya , kaha ke mujhe Ibn Shihab ne khabar di , unhein Sulayman bin Yasar ne aur unhein Ibn Abbas razi Allahu anhuma ne ke qabila Khash'am ki ek aurat ne Hajjat al-Wida ke mauqa par Rasool Allah salla Allahu alaihi wasallam se ek masla poocha , Fadl bin Abbas razi Allahu anhuma Nabi Karim salla Allahu alaihi wasallam hi ki sawari par Aap ke peeche baithe huay thay . Unhon ne poocha ke ya Rasool Allah! Allah ka jo fareeza is ke bandon par hai (yani hajj) mere walid par bhi farz ho chuka hai lekin burhapay ki wajah se un ki halat yeh hai ke woh sawari par nahi baith sakte . To kya main un ki taraf se hajj ada kar sakti hoon ? Aap salla Allahu alaihi wasallam ne farmaya ke haan! Kar sakti ho .

Mujh se Muhammad bin Rafi ne byaan kiya , kaha hum se Surayj bin Numan ne byaan kiya , un se Falih bin Sulayman ne byaan kiya un se Nafi ne aur un se Abdullah bin Umar razi Allahu anhuma ne byaan kiya ke Fatah Makkah ke din Nabi Karim salla Allahu alaihi wasallam tashreef laye , Aap salla Allahu alaihi wasallam ki Qaswa oontni par peeche Usamah razi Allahu anhu baithe huay thay aur Aap ke saath Bilal aur Usman bin Talha razi Allahu anhuma bhi thay Aap ne Kaaba ke paas apni oontni bitha di aur Usman razi Allahu anhu se farmaya ke Kaaba ki kunji lao , woh kunji laye aur darwaza khola . Aap andar dakhil huay to Aap salla Allahu alaihi wasallam ke saath Usamah , Bilal aur Usman razi Allahu anhum bhi andar gaye , phir darwaza andar se band kar liya aur der tak andar (namaz aur duaon mein mashghool) rahe . Jab Aap salla Allahu alaihi wasallam bahar tashreef laye to log andar jane ke liye ek doosre se aage barhne lage aur main sab se aage barh gaya . Main ne dekha ke Bilal razi Allahu anhu darwaze ke peeche kharay huay hain . Main ne un se poocha ke Nabi Karim salla Allahu alaihi wasallam ne namaz kahan parhi thi ? Unhon ne bataya ke Khana Kaaba mein chhay satoon thay . Do qataron mein aur Aap salla Allahu alaihi wasallam ne aage ki qatar ke do satoonon ke darmiyan namaz parhi thi . Kaaba ka darwaza Aap salla Allahu alaihi wasallam ki peeth ki taraf tha aur chehra mubarak is taraf tha , jidhar darwaze se andar jate huay chehra karna parta hai . Aap ke aur diwar ke darmiyan (teen hath ka fasla tha) . Ibn Umar razi Allahu anhuma ne byaan kiya ke yeh poochna main bhool gaya ke Nabi Karim salla Allahu alaihi wasallam ne kitni rakat namaz parhi thi . Jis jagah Aap ne namaz parhi thi wahan surkh sang e marmar bichha hua tha .

Hum se Abu al-Yaman Hakam bin Nafi ne byaan kiya ke hum ko Shuayb ne khabar di , unhein Zuhri ne , kaha mujh se Urwah bin Zubayr aur Abu Salamah bin Abdur Rahman ne byaan kiya aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke Nabi Karim salla Allahu alaihi wasallam ki zauja Safiya razi Allahu anha Hajjat al-Wida ke mauqa par haiza ho gayi thien . Aap salla Allahu alaihi wasallam ne daryaft farmaya ke kya abhi hamain un ki wajah se rukna pare ga ? Main ne arz kiya: ya Rasool Allah! Yeh to Makkah laut kar tawaf e ziyarat kar chuki hain . Aap salla Allahu alaihi wasallam ne farmaya ke phir usay chalna chahiye (tawaf e wida ki zaroorat nahi) .