Hum se Yahya bin Sulayman ne byaan kiya , kaha ke mujhe Abdullah bin Wahb ne khabar di , kaha ke mujh se Amr bin Muhammad ne byaan kiya , un se un ke walid ne byaan kiya aur un se Abdullah bin Umar razi Allahu anhuma ne byaan kiya ke hum (Hajjat al-Wida) kaha karte thay , jabke Nabi Karim salla Allahu alaihi wasallam maujood thay aur hum nahi samajhte thay ke Hajjat al-Wida ka mafhoom kya hai . Phir Nabi Karim salla Allahu alaihi wasallam ne Allah ki hamd aur us ki sana byaan ki phir Maseeh Dajjal ka zikr tafseel ke saath kiya . Aap salla Allahu alaihi wasallam ne farmaya ke jitne bhi anbiya Allah ne bheje hain , sab ne Dajjal se apni ummat ko daraya hai . Nuh alaihissalam ne apni ummat ko is se daraya aur doosre baad mein aane wale anbiya ne bhi aur woh tum hi mein se nikle ga . Pas yaad rakhna ke tum ko is ke jhoote hone ki aur koi daleel na maloom ho to yahi daleel kafi hai ke woh mardood kaana ho ga aur tumhara Rabb kaana nahi hai us ki aankh aisi maloom ho gi jaise angoor ka dana! .

Khoob sun lo ke Allah Ta'ala ne tum par tumhare aapas ke khoon aur amwaal isi tarah haram kiye hain jaise is din ki hurmat is shehar aur is mahine mein hai . Haan bolo! Kya main ne pahuncha diya ? Sahabah razi Allahu anhum bolay ke Aap ne pahuncha diya . Farmaya: Ae Allah! Tu gawah rahiyo , teen martaba Aap salla Allahu alaihi wasallam ne yeh jumla dohraya . Afsos! (Aap ne «waylakum» farmaya ya «wayhakum» , rawi ko shak hai) Dekho , mere baad kafir na ban jana ke ek doosre (Musalman) ki gardan maarne lag jao .

Hum se Amr bin Khalid ne byaan kiya , kaha hum se Zuhayr bin Muawiyah ne byaan kiya , kaha hum se Abu Ishaq Sabii ne byaan kiya , kaha ke mujh se Zayd bin Arqam razi Allahu anhu ne byaan kiya ke Nabi Karim salla Allahu alaihi wasallam ne unnees ghazwe kiye aur Hijrat ke baad sirf ek Hajj kiya . Is Hajj ke baad phir Aap salla Allahu alaihi wasallam ne koi Hajj nahi kiya . Yeh Hajj , Hajjat al-Wida tha . Abu Ishaq ne byaan kiya ke doosra Hajj Aap salla Allahu alaihi wasallam ne (Hijrat se pehle) Makkah mein kiya tha .

Hum se Hafs bin Umar ne byaan kiya , unhon ne kaha hum se Shubah bin Hajjaj ne byaan kiya , un se Ali bin Mudrik ne byaan kiya , un se Abu Zurah Haram bin Amr bin Jareer ne byaan kiya aur un se Jareer bin Abdullah Bajali razi Allahu anhu ne byaan kiya ke Nabi Karim salla Allahu alaihi wasallam ne Hajjat al-Wida ke mauqa par Jareer razi Allahu anhu se farmaya tha logon ko khamosh kar do , phir farmaya , mere baad kafir na ban jana ke ek doosre ki gardan maarne lago .

Mujh se Muhammad bin Musanna ne byaan kiya , kaha hum se Abdul Wahhab Saqafi ne byaan kiya , kaha hum se Ayub Sakhtiyani ne byaan kiya , un se Muhammad bin Sireen ne , un se Abdur Rahman bin Abu Bakrah razi Allahu anhuma ne aur un se Abu Bakrah razi Allahu anhu ne ke Nabi Karim salla Allahu alaihi wasallam ne farmaya ke zamana apni asal halat par ghoom kar aa gaya hai . Is din ki tarah jab Allah ne zameen o aasman ko paida kiya tha . Dekho! Saal ke barah mahine hote hain . Char in mein se hurmat wale mahine hain . Teen lagatar hain , Zhul Qadah , Zhul Hijjah aur Muharram (aur chautha) Rajab Mudar jo Jumadi al-Ula aur Shaban ke beech mein parta hai . (phir Aap ne daryaft farmaya) yeh kaun sa mahina hai ? Hum ne kaha ke Allah aur un ke Rasool ko behtar ilm hai . Is par Aap salla Allahu alaihi wasallam khamosh ho gaye . Hum ne samjha shayad Aap mashhoor naam ke siwa is ka koi aur naam rakhein ge . Lekin Aap ne farmaya: kya yeh Zhul Hijjah nahi hai ? Hum bolay ke kyun nahi . Phir daryaft farmaya aur yeh shehar kaun sa hai ? Hum bolay ke Allah aur us ke Rasool ko zyada behtar ilm hai . Phir Aap salla Allahu alaihi wasallam khamosh ho gaye . Hum ne samjha shayad is ka koi aur naam Aap salla Allahu alaihi wasallam rakhein ge , jo mashhoor naam ke alawa ho ga . , lekin Aap salla Allahu alaihi wasallam ne farmaya: kya yeh Makkah nahi hai ? Hum bolay kyun nahi (yeh Makkah hi hai) phir Aap salla Allahu alaihi wasallam ne daryaft farmaya aur yeh din kaun sa hai ? Hum bolay ke Allah aur us ke Rasool ko zyada behtar ilm hai , phir Aap salla Allahu alaihi wasallam khamosh ho gaye aur hum ne samjha shayad is ka Aap salla Allahu alaihi wasallam is ke mashhoor naam ke siwa koi aur naam rakhein ge , lekin Aap salla Allahu alaihi wasallam ne farmaya: kya yeh Yaum al-Nahr (qurbani ka din) nahi hai ? Hum bolay ke kyun nahi . Is ke baad Aap salla Allahu alaihi wasallam ne farmaya: pas tumhara khoon aur tumhara maal . Muhammad ne byaan kiya ke mera khayal hai ke Abu Bakrah razi Allahu anhu ne yeh bhi kaha , aur tumhari izzat tum par isi tarah haram hai jis tarah yeh din ka tumhare is shehar aur tumhare is mahine mein aur tum bahut jald apne Rabb se milo ge aur woh tum se tumhare aamal ke baare mein sawal kare ga . Haan , pas mere baad tum gumrah na ho jana ke ek doosre ki gardan maarne lago . Haan aur jo yahan maujood hain woh in logon ko pahuncha dein jo maujood nahi hain , ho sakta hai ke jise woh pahunchayein in mein se koi aisa bhi ho jo yahan baaz sunne walon se zyada is (hadees) ko yaad rakh sakta ho . Muhammad bin Sireen jab is hadees ka zikr karte to farmate ke Muhammad salla Allahu alaihi wasallam ne sach farmaya . Phir Aap salla Allahu alaihi wasallam ne farmaya ke to kya main ne pahuncha diya . Aap salla Allahu alaihi wasallam ne do martaba yeh jumla farmaya .

Hum se Muhammad bin Yusuf Faryabi ne byaan kiya , kaha hum se Sufyan Sawri ne byaan kiya , un se Qays bin Muslim ne , un se Tariq bin Shihab ne ke chand Yahudiyon ne kaha ke agar yeh aayat hamare yahan nazil hui hoti to hum is din eid manaya karte . Umar razi Allahu anhu ne farmaya , kaun si aayat ? Unhon ne kaha «alyawma akmaltu lakum deenakum wa atmamtu alaykum niamati» ”aaj main ne tum par apne deen ko mukammal kiya aur apni ni'mat tum par poori kar di .“ Is par Umar razi Allahu anhu ne farmaya ke mujhe khoob maloom hai ke yeh aayat kahan nazil hui thi . Jab yeh aayat nazil hui to Rasool salla Allahu alaihi wasallam maidan e Arafat mein kharay huay thay (yani Hajjat al-Wida mein) .

Hum se Abdullah bin Maslamah Qanabi ne byaan kiya , un se Imam Malik ne byaan kiya , un se Abu al-Aswad Muhammad bin Abdur Rahman bin Naufal ne , un se Urwah bin Zubayr razi Allahu anhu ne byaan kiya aur un se Umm al-Momineen Aisha Siddiqa razi Allahu anha ne byaan kiya ke hum jab Rasool Allah salla Allahu alaihi wasallam ke saath (Hajj ke liye) niklay to kuch log hum mein se Umrah ka ihram bandhe huay thay , kuch Hajj ka aur kuch Umrah aur Hajj donon ka . Nabi Karim salla Allahu alaihi wasallam ne bhi Hajj ka ihram bandha tha . Jo log Hajj ka ihram bandhe huay thay ya jinon ne Hajj aur Umrah donon ka ihram bandha tha , woh qurbani ke din halal huay thay . Hum se Abdullah bin Yusuf Taneesi ne byaan kiya , kaha hum ko Imam Malik ne khabar di , phir yahi hadees byaan ki . Is mein yun hai ke Rasool Allah salla Allahu alaihi wasallam ke saath Hajjat al-Wida (ke liye hum niklay) hum se Ismail bin Abi Oways ne byaan kiya , hum se Imam Malik ne byaan kiya , isi tarah jo pehle mazkoor hua . Hum se Abdullah bin Yusuf Taneesi ne byaan kiya , kaha hum ko Imam Malik ne khabar di , phir yahi hadees byaan ki . Is mein yun hai ke Rasool Allah salla Allahu alaihi wasallam ke saath Hajjat al-Wida (ke liye hum niklay) hum se Ismail bin Abi Oways ne byaan kiya , hum se Imam Malik ne byaan kiya , isi tarah jo pehle mazkoor hua .

Hum se Ahmad bin Yunus ne byaan kiya , kaha hum se Ibrahim bin Saad ne byaan kiya , kaha hum se Ibn Shihab ne , un se Aamir bin Saad bin Abi Waqqas razi Allahu anhu ne aur un se un ke walid Saad razi Allahu anhu ne byaan kiya ke Hajjat al-Wida ke mauqa par Nabi Karim salla Allahu alaihi wasallam meri iyadat ke liye tashreef laye . Beemari ne mujhe maut ke munh mein la dala tha . Main ne arz kiya: ya Rasool Allah! Jaisa ke Aap ne mulahiza farmaya hai , mera marz is had ko pahunch gaya hai aur mere paas maal hai , jis ki waris khali meri ek larki hai , to kya main apna do tihayi maal khairat kar doon ? Aap salla Allahu alaihi wasallam ne farmaya ke nahi . Main ne arz kiya , aadha kar doon . Farmaya ke nahi . Main ne farmaya kya phir tihayi kar doon . Nabi Karim salla Allahu alaihi wasallam ne farmaya ke tihayi bhi bahut hai . Tum apne warison ko maldar chhor kar jao to yeh is se behtar hai ke unhein muhtaj chhoro aur woh logon ke samne hath phailate phirein aur tum jo kuch bhi kharch karo ge , agar is se Allah ki raza maqsood rahi to tumhein is par sawab mile ga . Hatta ke is luqma par bhi tumhein sawab mile ga jo tum apni biwi ke munh mein rakho ge . Main ne arz kiya: ya Rasool Allah! (beemari ki wajah se) kya main apne sathiyon ke saath (Madinah) nahi ja sakoon ga ? Farmaya agar tum nahi ja sake tab bhi agar tum Allah ki raza joyi ke liye koi amal karo ge to tumhara darja Allah ke yahan aur buland ho ga aur umeed hai ke tum abhi zinda raho ge aur tum se kuch logon (Musalmanon) ko nafa pahunche ga aur kuch logon (Islam ke dushmanon) ko nuqsan pahunche ga . Ae Allah! Mere sathiyon ki Hijrat ko kamil farma aur unhein peeche na hata lekin nuqsan mein to Saad bin Khawlah rahe . Nabi Karim salla Allahu alaihi wasallam ne un ke Makkah mein wafat pa jaane ki wajah se zahir farmaya .

Mujh se Ibrahim bin Munzhir Khuzami ne byaan kiya , unhon ne kaha hum se Abu Zamrah Anas bin Ayadh ne byaan kiya , unhon ne kaha hum se Musa bin Uqbah ne byaan kiya , un se Nafi ne aur unhein Abdullah bin Umar razi Allahu anhuma ne khabar di ke Rasool Allah salla Allahu alaihi wasallam ne Hajjat al-Wida mein apna sar mundwaya tha .

Hum se Ubaydullah bin Saeed ne byaan kiya , kaha hum se Muhammad bin Bakr ne byaan kiya , kaha hum se Ibn Jurayj ne byaan kiya , in se Musa bin Uqbah ne , unhein Nafi ne aur unhein Ibn Umar razi Allahu anhuma ne khabar di ke Nabi Karim salla Allahu alaihi wasallam aur Aap salla Allahu alaihi wasallam ke saath Aap ke baaz as-haab ne Hajjat al-Wida ke mauqa par sar mundwaya tha aur baaz doosre sahabah razi Allahu anhum ne sirf turshwa liya tha .