Hum se Ismail Bin Abdullah ne bayan kiya ‘ kaha ke mujh se Imam Malik Rahimahullah ne bayan kiya ‘ in se Zaid Bin Aslam ne ‘ in se in ke walid ne bayan kiya ke mein Umar Bin Khattab Radi Allahu Anhu ke sath bazar gaya. Umar Radi Allahu Anhu se ek naujawan aurat ne mulaqat ki aur arz kiya ke Ameer-ul-Momineen! Mere shohar ki wafat ho gayi hai aur chand chhoti chhoti bachiyan chor gaye hain. Allah ki qasam ke ab na in ke pas bakri ke paye hain ke in ko paka lein, na kheti hai ‘ na doodh ke janwar hain. Mujhe darr hai ke wo faqr-o-faqa se halak na ho jayein. Mein Khufaf Bin Ayma Ghifari Radi Allahu Anhu ki beti hoon. Mere walid Nabi Kareem Sallallahu Alaihi Wasallam ke sath Ghazwa Hudaibiya mein shareek thay. Ye sun kar Umar Radi Allahu Anhu in ke pas thori der ke liye kharay ho gaye ‘ aage nahi barhe. Phir farmaya ‘ marhaba ‘ tumhara khandani talluq to bahut qareebi hai. Phir Aap ek bahut qawi oont ki taraf more jo ghar mein bandha hua tha aur is par do boray ghalle se bhare hue rakh diye. In dono boron ke darmiyan rupiya aur dusri zarurat ki cheez dain aur kapre rakh diye aur is ki nakeel in ke hath mein thama kar farmaya ke ise le ja ‘ ye khatam na hoga is se pehle hi Allah Ta'ala tujhe is se behtar de ga. Ek sahib ne is par kaha ‘ Ai Ameer-ul-Momineen! Aap ne ise bahut de diya. Umar Radi Allahu Anhu ne kaha ‘ teri maa tujhe roye ‘ Allah ki qasam! Is aurat ke walid aur is ke bhai jaise ab bhi meri nazron ke samne hain ke ek muddat tak ek qila ke muhasare mein wo shareek rahe ‘ aakhir ise fatah kar liya. Phir hum subah ko in dono ka hissa maal-e-ghanimat se wasool kar rahe thay
.

Mujh se Muhammad Bin Rafi ne bayan kiya ‘ kaha hum se Abu Amr Shababa Bin Sawar Fazari ne bayan kiya ‘ in se Shuba ne bayan kiya ‘ in se Qatada ne ‘ in se Saeed Bin Musayyab ne aur in se in ke walid (Musayyab Bin Hazn Radi Allahu Anhu) ne bayan kiya ke mein ne wo darakht dekha tha lekin phir baad mein jab aaya to mein ise nahi pehchan saka. Mahmood ne bayan kiya ke phir baad mein wo darakht mujhe yaad nahi raha tha
.

Hum se Mahmood Bin Ghailan ne bayan kiya ‘ kaha hum se Ubaidullah Bin Abdullah ne bayan kiya ‘ in se Israil ne ‘ in se Tariq Bin Abdur Rahman ne bayan kiya ke hajj ke irade se jate hue mein kuch aise logon ke pas se guzra jo namaz parh rahe thay. Mein ne poocha ke ye kaun si masjid hai? Unhon ne bataya ke ye wahi darakht hai jahan Rasul Allah Sallallahu Alaihi Wasallam ne Baiat-e-Rizwan li thi. Phir mein Saeed Bin Musayyab ke pas aaya aur mein ne unhein is ki khabar di ‘ unhon ne kaha mujh se mere walid Musayyab Bin Hazn ne bayan kiya ‘ wo in logon mein thay jinhon ne Nabi Kareem Sallallahu Alaihi Wasallam se is darakht ke tale baiat ki thi. Kehte thay jab mein dusre saal wahan gaya to is darakht ki jagah ko bhool gaya. Saeed ne kaha Nabi Kareem Sallallahu Alaihi Wasallam ke ashab to is darakht ko pehchan na sake. Tum logon ne kaise pehchan liya (is ke tale masjid bana li) tum in se zyada ilm wale thahre
.

Hum se Musa Bin Ismail ne bayan kiya ‘ kaha hum se Abu Awana ne ‘ kaha hum se Tariq Bin Abdur Rahman ne ‘ in se Saeed Bin Musayyab ne aur in se in ke walid ne ke unhon ne bhi Rasul Allah Sallallahu Alaihi Wasallam se is darakht ke tale baiat ki thi. Kehte thay ke jab hum dusre saal udhar gaye to humein pata nahi chala ke wo kaun sa darakht tha
.

Hum se Qabisa Bin Uqba ne bayan kiya ‘ kaha hum se Sufyan Sawri ne bayan kiya ‘ in se Tariq Bin Abdur Rahman ne bayan kiya ke Saeed Bin Musayyab ki majlis mein «Al-Shajarah» ka zikr hua to wo hanse aur kaha ke mere walid ne mujhe bataya ke wo bhi is darakht ke tale baiat mein shareek thay
.

Hum se Adam Bin Abi Iyas ne bayan kiya ‘ kaha hum se Shuba ne bayan kiya ‘ in se Amr Bin Murrah ne ‘ unhon ne kaha ke mein ne Abdullah Bin Abi Aufa Radi Allahu Anhu se suna ‘ wo Baiat-e-Rizwan mein shareek thay. Unhon ne bayan kiya ke Nabi Kareem Sallallahu Alaihi Wasallam ki khidmat mein jab koi sadqa le kar hazir hota to Aap dua karte ke Ai Allah! Is par apni rahmat nazil farma. Chunancha mere walid bhi apna sadqa le kar hazir hue to Aap Sallallahu Alaihi Wasallam ne dua ki ke Ai Allah! Aal-e-Abi Aufa Radi Allahu Anhu par apni rahmat nazil farma
.

Hum se Ismail Bin Abi Uwais ne bayan kiya ‘ in se in ke bhai Abdul Hamid ne ‘ in se Sulaiman Bin Bilal ne ‘ in se Amr Bin Yahya ne aur in se Abbad Bin Tamim ne bayan kiya ke Harra ki larayi mein log Abdullah Bin Hanzala Radi Allahu Anhu ke hath par baiat kar rahe thay. Abdullah Bin Zaid ne poocha ke Ibn Hanzala se kis baat par baiat ki ja rahi hai? To logon ne bataya ke maut par. Ibn Zaid ne kaha ke Rasul Allah Sallallahu Alaihi Wasallam ke baad ab mein kisi se bhi maut par baiat nahi karunga. Wo Aap Sallallahu Alaihi Wasallam ke sath Ghazwa Hudaibiya mein shareek thay
.

Hum se Yahya Bin Ya'la Muharibi ne bayan kiya ‘ kaha mujh se mere walid ne bayan kiya ‘ in se Iyas Bin Salama Bin Akwa ne bayan kiya ‘ kaha ke mujh se mere walid ne bayan kiya ‘ wo Ashab-e-Shajarah mein se thay ‘ unhon ne bayan kiya ke hum Rasul Allah Sallallahu Alaihi Wasallam ke sath jumma ki namaz parh kar wapas hue to deewaron ka saya abhi itna nahi hua tha ke hum is mein aram kar sakein
.

Hum se Qutaiba Bin Saeed ne bayan kiya ke hum se Hatim Bin Ismail ne bayan kiya ‘ in se Yazid Bin Abi Ubaid ne bayan kiya ke mein ne Salama Bin Akwa Radi Allahu Anhu se poocha ke sulh-e-Hudaibiya ke mauqe par Aap logon ne Rasul Allah Sallallahu Alaihi Wasallam se kis cheez par baiat ki thi? Unhon ne batlaya ke maut par
.

Mujh se Ahmad Bin Ishkab ne bayan kiya ‘ kaha hum se Muhammad Bin Fuzail ne bayan kiya ‘ in se Ala Bin Musayyab ne ‘ in se in ke walid ne bayan kiya ke mein Bara Bin Azib Radi Allahu Anhu ki khidmat mein hazir hua aur arz kiya ‘ mubarak ho! Aap ko Nabi Kareem Sallallahu Alaihi Wasallam ki khidmat naseeb hui aur Nabi Kareem Sallallahu Alaihi Wasallam se Aap ne shajar (darakht) ke neeche baiat ki. Unhon ne kaha bete! Tumhein maloom nahi ke hum ne Nabi Kareem Sallallahu Alaihi Wasallam ke baad kya kya kaam kiye hain
.