Hum se Ismail ne bayan kiya, kaha mujh se mere bhai ne bayan kiya, un se Sulaiman ne, un se Yahya Bin Saeed ne, un se Abdur Rahman Bin Qasim ne, un se Qasim Bin Muhammad ne aur un se Aisha Radi Allahu Anha ne bayan kiya ke Abu Bakr Radi Allahu Anhu ka ek ghulam tha jo rozana unhein kuch kamayi diya karta tha aur Abu Bakr Radi Allahu Anhu ise apni zaroorat mein istemal kiya karte thay. Ek din wo ghulam koi cheez laya aur Abu Bakr Radi Allahu Anhu ne bhi is mein se kha liya. Phir ghulam ne kaha aap ko maloom hai? Ye kaisi kamayi se hai? Aap ne daryaft farmaya kaisi hai? Us ne kaha mein ne zamana-e-jahiliyat mein ek shakhs ke liye kahanat ki thi halankay mujhe kahanat nahi aati thi, mein ne ise sirf dhoka diya tha lekin ittifaq se wo mujhe mil gaya aur is ne is ki ujrat mein mujh ko ye cheez di thi, aap kha bhi chuke hain. Abu Bakr Radi Allahu Anhu ne ye sunte hi apna hath munh mein dala aur pait ki tamam cheezein qay kar ke nikal dalein
.

Hum se Musaddad ne bayan kiya, kaha hum se Yahya ne bayan kiya, un se Ubaidullah ne kaha, mujh ko Nafi ne khabar di aur un se Abdullah Bin Umar Radi Allahu Anhuma ne bayan kiya ke zamana-e-jahiliyat ke log «Habl-ul-Habalah» tak qeemat ki adayigi ke waada par, oont ka gosht udhaar becha karte thay. Abdullah Radi Allahu Anhu ne bayan kiya ke «Habl-ul-Habalah» ka matlab ye hai ke koi hamila oontni apna baccha jane phir wo nauzaida baccha (barh kar) hamila ho, Nabi Kareem Sallallahu Alaihi Wasallam ne is tarah ki khareed o farokht mamnu qarar de di thi
.

Hum se Abu-ul-Numan ne bayan kiya, unhon ne kaha hum se Mahdi ne bayan kiya unhon ne kaha ke Ghailan Bin Jarir ne bayan kiya ke hum Anas Bin Malik Radi Allahu Anhu ki khidmat mein hazir hote thay. Wo hum se Ansar ke mutaliq bayan farmaya karte thay aur mujh se farmate ke tumhari qaum ne falan mauqa par ye karname anjam diye, falan mauqa par ye karname anjam diye
.

Hum se Abu Ma'mar ne bayan kiya, kaha hum se Abdul Waris ne bayan kiya, kaha hum se Qatan Abu-ul-Haisam ne kaha, hum se Abu Yazid Madani ne, un se Ikrimah ne aur un se Ibn Abbas Radi Allahu Anhuma ne bayan kiya jahiliyat mein sab se pehla Qasamah hamare hi qabila Banu Hashim mein hua tha, Banu Hashim ke ek shakhs Amr Bin Alqamah ko Quraish ke kisi doosre khandan ke ek shakhs (Khadash Bin Abdullah Aamiri) ne naukri par rakkha, ab ye Hashimi naukar apne sahib ke sath is ke oont le kar Sham ki taraf chala wahan kahin is naukar ke paas se ek doosre Hashimi shakhs guzra, is ki bori ka bandhan toot gaya tha. Us ne apne naukar bhai se iltija ki meri madad kar oont bandhne ki mujhe ek rassi dede, mein is se apna theila bandhoon agar rassi na ho gi to wo bhag thore jaye ga. Us ne ek rassi ise de di aur is ne apni bori ka munh is se bandh liya (aur chala gaya). Phir jab is naukar aur sahib ne ek manzil par parao kiya to tamam oont bandhe gaye lekin ek oont khula raha. Jis sahib ne Hashimi ko naukri par apne sath rakkha tha is ne poocha sab oont to bandhe, ye oont kyun nahi bandha gaya kya baat hai? Naukar ne kaha is ki rassi mojood nahi hai. Sahib ne poocha kya hua is ki rassi? Aur gusse mein aa kar ek lakri is par phenk maari is ki maut aa pahunchi. Is ke (marne se pehle) wahan se ek Yamani shakhs guzar raha tha. Hashimi naukar ne poocha kya hajj ke liye har saal tum Makkah jaate ho? Us ne kaha abhi to irada nahi hai lekin mein kabhi jata rehta hoon. Is naukar ne kaha jab bhi tum Makkah pahuncho kya mera ek paigham pahuncha do ge? Us ne kaha haan pahuncha doon ga. Is naukar ne kaha ke jab bhi tum hajj ke liye jao to pukarna: Ay Quraish ke logo! Jab wo tumhare paas jama ho jayein to pukarna: Ay Bani Hashim! Jab wo tumhare paas aa jayein to un se Abu Talib poochna aur unhein batlana ke falan shakhs ne mujhe ek rassi ke liye qatl kar diya. Is wasiyat ke baad wo naukar mar gaya, phir jab is ka sahib Makkah aaya to Abu Talib ke yahan bhi gaya. Janab Abu Talib ne daryaft kiya hamare qabila ke jis shakhs ko tum apne sath naukri ke liye le gaye thay is ka kya hua? Us ne kaha ke wo bimar ho gaya tha mein ne khidmat karne mein koi kasar nahi utha rakkhi (lekin wo mar gaya to) mein ne ise dafan kar diya. Abu Talib ne kaha ke is ke liye tumhari taraf se yahi hona chahiye tha. Ek muddat ke baad wahi Yamani shakhs jise Hashimi naukar ne paigham pahunchane ki wasiyat ki thi, mausam-e-hajj mein aaya aur aawaz di: Ay Quraish ke logo! Logon ne bata diya ke yahan hain Quraish is ne aawaz di, ay Banu Hashim! Logon ne bataya ke Banu Hashim ye hain is ne poocha Abu Talib kahan hain? Logon ne bataya to is ne kaha ke falan shakhs ne mujhe ek paigham pahunchane ke liye kaha tha ke falan shakhs ne ise ek rassi ki wajah se qatl kar diya hai. Ab Janab Abu Talib is sahib ke yahan aaye aur kaha ke in teen cheezon mein se koi cheez pasand kar lo agar tum chaho to sau oont deet mein de do kyunke tum ne hamare qabila ke aadmi ko qatl kiya hai aur agar chaho to tumhari qaum ke pacchas aadmi is ki qasam kha lein ke tum ne ise qatl nahi kiya. Agar tum is par tayyar nahi to hum tumhein is ke badle mein qatl kar dein ge. Wo shakhs apni qaum ke paas aaya to wo is ke liye tayyar ho gaye ke hum qasam kha lein ge. Phir Banu Hashim ki ek aurat Abu Talib ke paas aayi jo isi qabila ke ek shakhs se biyahi hui thi aur apne is shohar se is ka baccha bhi tha. Us ne kaha: Ay Abu Talib! Aap meherbani karein aur mere is larke ko in pacchas aadmiyon mein maaf kar dein aur jahan qasmein li jati hain (yani Rukn aur Maqam-e-Ibrahim ke darmiyan) is se wahan qasam na lein. Abu Talib ne ise maaf kar diya. Is ke baad un mein ka ek aur shakhs aaya aur kaha: Ay Abu Talib! Aap ne sau oonton ki jagah pacchas aadmiyon se qasam talab ki hai, is tarah har shakhs par do do oont parte hain. Ye do oont meri taraf se aap qabool kar lein aur mujhe is maqam par qasam khane ke liye majboor na karein jahan qasam li jati hai. Abu Talib ne ise bhi manzoor kar liya. Is ke baad baqiya jo artalees aadmi aaye aur unhon ne qasam khayi. Ibn Abbas Radi Allahu Anhuma ne kaha: Is zaat ki qasam! Jis ke hath mein meri jaan hai abhi is waqia ko poora saal bhi nahi guzra tha ke in artalees aadmiyon mein se ek bhi aisa nahi raha jo aankh hilata
.

Mujh se Ubaid Bin Ismail ne bayan kiya, kaha hum se Abu Usama ne bayan kiya, un se Hisham ne, un se un ke walid ne aur un se Aisha Radi Allahu Anha ne bayan kiya ke Buas ki larai Allah Ta'ala ne (maslahat ki wajah se) Rasul Allah Sallallahu Alaihi Wasallam se pehle barpa kara di thi. Nabi Kareem Sallallahu Alaihi Wasallam jab Madinah tashreef laye to yahan Ansar ki jamaat mein phoot pari hui thi. Un ke sardar maare ja chuke thay ya zakhmi ho chuke thay, Allah Ta'ala ne is larai ko is liye pehle barpa kiya tha ke Ansar Islam mein dakhil ho jayein
.

Aur Abdullah Bin Wahab ne bayan kiya, unhein Amr ne khabar di, unhein Bukair Bin Ashaj ne aur Abdullah Bin Abbas Radi Allahu Anhuma ke Maula Kuraib ne un se bayan kiya ke Abdullah Bin Abbas Radi Allahu Anhuma ne bataya Safa aur Marwah ke darmiyan naale ke andar zor se daurna sunnat nahi hai yahan jahiliyat ke daur mein log tezi ke sath daura karte thay aur kehte thay ke hum to is pathreeli jagah se daur hi kar paar hon ge
.

Hum se Abdullah Bin Muhammad Jafi ne bayan kiya, unhon ne kaha hum se Sufyan ne bayan kiya, unhon ne kaha hum ko Mutarrif ne khabar di, kaha mein ne Abu-al-Safar se suna, wo bayan karte thay ke mein ne Abdullah Bin Abbas Radi Allahu Anhuma se suna unhon ne kaha: Ay logo! Meri batein suno ke mein tum se bayan karta hoon aur (jo kuch tum ne samjha hai) wo mujhe sunao. Aisa na ho ke tum log yahan se uth kar (baghair samjhe) chale jao aur phir kehne lago ke Ibn Abbas Radi Allahu Anhuma ne yun kaha aur Ibn Abbas Radi Allahu Anhuma ne yun kaha. Jo shakhs bhi Baitullah ka tawaf kare to wo Hateem ke peeche se tawaf kare aur Hijr ko Hateem na kaha karo ye jahiliyat ka naam hai is waqt logon mein jab koi kisi baat ki qasam khata to apna kora, joota ya kaman wahan phenk deta
.

Hum se Nuaim Bin Hammad ne bayan kiya, kaha hum se Hisham ne bayan kiya, un se Husain ne, un se Amr Bin Maimoon ne bayan kiya ke mein ne zamana-e-jahiliyat mein ek bandariya dekhi is ke charon taraf bahut se bandar jama ho gaye thay is bandariya ne zina karaya tha is liye sabhon ne mil kar ise rajm kiya aur in ke sath mein bhi patthar marne mein shareek hua
.

Hum se Ali Bin Abdullah ne bayan kiya, kaha hum se Sufyan ne bayan kiya, un se Ubaidullah ne aur unhon ne Abdullah Bin Abbas Radi Allahu Anhuma se suna, unhon ne kaha ke jahiliyat ki aadaton mein se ye aadatein hain. Nasab ke mamla mein tana maarna, mayyat par noha karna, teesri aadat ke mutaliq (Ubaidullah rawi) bhool gaye thay aur Sufyan ne bayan kiya ke log kehte hain ke wo teesri baat sitaron ko barish ki illat samajhna hai
.

Aap Sallallahu Alaihi Wasallam ka nasab mubarak Muhammad Bin Abdullah Bin Abdul Muttalib Bin Hashim Bin Abdul Manaf Bin Qusayy Bin Kilab Bin Murrah Bin Ka'b Bin Luayyy Bin Ghalib Bin Fihr Bin Malik Bin Nazr Bin Kinanah Bin Khuzaimah Bin Mudrikah Bin Ilyas Bin Muzar Bin Nizar Bin Ma'ad Bin Adnan hai
.