Mujh se Muhammad Bin Musanna ne bayan kiya, kaha hum se Abu Awana ke damad Fazl Bin Musawir ne bayan kiya, kaha hum se Amash ne, un se Abu Sufyan ne aur un se Jabir Radi Allahu Anhu ne bayan kiya ke mein ne Rasul Allah Sallallahu Alaihi Wasallam se suna, Aap Sallallahu Alaihi Wasallam ne farmaya ke Saad Bin Muaz Radi Allahu Anhu ki maut par Arsh hil gaya aur Amash se riwayat hai, un se Abu Salih ne bayan kiya aur un se Jabir Radi Allahu Anhu ne Nabi Kareem Sallallahu Alaihi Wasallam se isi tarah riwayat kiya, ek sahab ne Jabir Radi Allahu Anhu se kaha ke Bara Radi Allahu Anhu to is tarah bayan karte hain ke charpai jis par Muaz Radi Allahu Anhu ki naash rakkhi hui thi, hil gayi thi, Jabir Radi Allahu Anhu ne kaha in dono qabilon (Aus aur Khazraj) ke darmiyan (zamana-e-jahiliyat mein) dushmani thi, mein ne khud Nabi Kareem Sallallahu Alaihi Wasallam ko ye farmate suna hai ke Saad Bin Muaz Radi Allahu Anhu ki maut par Arsh-e-Rahman hil gaya tha
.

Hum se Muhammad Bin Ar'arah ne bayan kiya, kaha hum se Shuba ne bayan kiya, un se Saad Bin Ibrahim ne, un se Abu Umama Bin Sahl Bin Hunaif ne aur un se Abu Saeed Khudri Radi Allahu Anhu ne bayan kiya ke ek qaum (Yahud Bani Quraizah) ne Saad Bin Muaz Radi Allahu Anhu ko salis maan kar hathyar daal diye to unhein bulane ke liye aadmi bheja gaya aur wo gadhe par sawar ho kar aaye. Jab is jagah ke qareeb pahunche jise (Nabi Kareem Sallallahu Alaihi Wasallam ne ayyam-e-jang mein) namaz parhne ke liye muntakhab kiya hua tha to Nabi Kareem Sallallahu Alaihi Wasallam ne Sahaba se farmaya ke apne sab se behtar shakhs ke liye ya (Aap Sallallahu Alaihi Wasallam ne ye farmaya) apne sardar ko lene ke liye kharay ho jao. Phir Aap Sallallahu Alaihi Wasallam ne farmaya: Ay Saad! Unhon ne tum ko salis maan kar hathyar daal diye hain. Saad Radi Allahu Anhu ne kaha phir mera faisla ye hai ke in ke jo log jang karne wale hain unhein qatl kar diya jaye aur in ki aurton, bacchon ko jangi qaidi bana liya jaye. Nabi Kareem Sallallahu Alaihi Wasallam ne farmaya tum ne Allah ke faisle ke mutabiq faisla kiya ya (Aap Sallallahu Alaihi Wasallam ne ye farmaya ke) farishte ke hukm ke mutabiq faisla kiya hai
.

Hum se Ali Bin Muslim ne bayan kiya, kaha hum se Habban ne bayan kiya, kaha hum se Hammam ne bayan kiya, unhein Qatadah ne khabar di aur unhein Anas Radi Allahu Anhu ne ke Nabi Kareem Sallallahu Alaihi Wasallam ki majlis se uth kar do Sahabi ek tareek raat mein (apne ghar ki taraf) jaane lage to ek ghaibi noor un ke aage aage chal raha tha, phir jab wo juda hue to un ke sath sath wo noor bhi alag alag ho gaya aur Ma'mar ne Sabit se bayan kiya aur un se Anas Radi Allahu Anhu ne ke Usaid Bin Hudair Radi Allahu Anhu aur ek doosre Ansari Sahabi (ke sath ye karamat pesh aayi thi) aur Hammad ne bayan kiya, unhein Sabit ne khabar di aur unhein Anas Radi Allahu Anhu ne ke Usaid Bin Hudair aur Abbad Bin Bishr Radi Allahu Anhuma ke sath ye karamat pesh aayi thi. Ye Nabi Kareem Sallallahu Alaihi Wasallam ke hawala se naqal kiya hai
.

Mujh se Muhammad Bin Bashar ne bayan kiya, unhon ne kaha hum se Ghundar ne bayan kiya, kaha hum se Shuba ne bayan kiya, un se Amr ne, un se Ibrahim ne, un se Masruq ne aur un se Abdullah Bin Amr Radi Allahu Anhuma ne bayan kiya ke mein ne Nabi Kareem Sallallahu Alaihi Wasallam se suna Aap Sallallahu Alaihi Wasallam ne farmaya " Quran char (Sahaba) Abdullah Bin Masood, Abu Huzaifah ke ghulam Salim aur Ubayy Bin Kab aur Muaz Bin Jabal (Radi Allahu Anhum) se seekho. "
.

Aisha Radi Allahu Anha ne kaha ke wo (waqia-e-ifk se) se pehle hi mard-e-salih thay
.

Hum se Ishaq ne bayan kiya, unhon ne kaha hum se Abdus Samad ne bayan kiya, unhon ne kaha hum se Shuba ne bayan kiya ke hum se Qatadah ne bayan kiya, unhon ne kaha mein ne Anas Bin Malik Radi Allahu Anhu se suna ke Abu Usaid Radi Allahu Anhu ne bayan kiya ke Nabi Kareem Sallallahu Alaihi Wasallam ne farmaya " Ansar ka behtareen gharana Banu Najjar ka gharana hai, phir Banu Abdul Ashhal ka, phir Banu Abdul Haris ka, phir Banu Saidah ka aur khair Ansar ke tamam gharanon mein hai. Saad Bin Ubadah Radi Allahu Anhu ne kaha aur wo Islam qabool karne mein bari qadamat rakhte thay ke mera khayal hai, Nabi Kareem Sallallahu Alaihi Wasallam ne hum par doosron ko fazilat de di hai, un se kaha gaya ke Nabi Kareem Sallallahu Alaihi Wasallam ne tum ko bhi to bahut se logon par fazilat di hai (itiraz ki kya baat hai)
.

Hum se Abu-ul-Walid ne bayan kiya, kaha hum se Shuba ne bayan kiya, un se Amr Bin Murrah ne, un se Ibrahim ne, un se Masruq ne bayan kiya ke Abdullah Bin Amr Radi Allahu Anhuma ki majlis mein Abdullah Bin Masood Radi Allahu Anhu ka zikr aaya to unhon ne kaha ke is waqt se in ki mohabbat mere dil mein baith gayi jab se mein ne Rasul Allah Sallallahu Alaihi Wasallam ko ye farmate suna ke Quran char aadmiyon se seekho, Abdullah Bin Masood se, Nabi Kareem Sallallahu Alaihi Wasallam ne unhein ke naam se ibtida ki, aur Abu Huzaifah ke ghulam Salim se, Muaz Bin Jabal se aur Ubayy Bin Kab se
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha ke mein ne Shuba se suna, unhon ne Qatadah se suna aur un se Anas Bin Malik Radi Allahu Anhu ne bayan kiya ke Nabi Kareem Sallallahu Alaihi Wasallam ne Ubayy Bin Kab se farmaya ke Allah Ta'ala ne mujhe hukm diya hai ke mein tum ko Surah «Lam yakunillazeena kafaru» sunaoon. Ubayy Bin Kab Radi Allahu Anhu bole kya Allah Ta'ala ne mera naam liya hai? Nabi Kareem Sallallahu Alaihi Wasallam ne farmaya ke haan, is par Ubayy Bin Kab Radi Allahu Anhu fart-e-musarrat se rone lage
.

Mujh se Muhammad Bin Bashar ne bayan kiya, kaha hum se Yahya ne bayan kiya, kaha hum se Shuba ne bayan kiya, un se Qatadah ne aur un se Anas Bin Malik Radi Allahu Anhu ne ke Nabi Kareem Sallallahu Alaihi Wasallam ke zamane mein char aadmi jin sab ka talluq qabila Ansar se tha, Quran Majeed jama karne wale thay. Ubayy Bin Kab, Muaz Bin Jabal, Abu Zaid aur Zaid Bin Sabit Radi Allahu Anhum mein ne poocha: Abu Zaid kaun hain? Unhon ne farmaya ke wo mere ek chacha hain
.

Hum se Abu Ma'mar ne bayan kiya, kaha hum se Abdul Waris ne bayan kiya, kaha hum se Abdul Aziz Bin Suhaib ne bayan kiya aur un se Anas Radi Allahu Anhu ne bayan kiya ke Uhud ki larai ke mauqa par jab Sahaba Nabi Kareem Sallallahu Alaihi Wasallam ke qareeb se idhar udhar chalne lage to Abu Talha Radi Allahu Anhu is waqt apni ek dhaal se Nabi Kareem Sallallahu Alaihi Wasallam ki hifazat kar rahe thay. Abu Talha bare teer andaz thay aur khoob kheench kar teer chalaya karte thay chunanche is din do ya teen kamanon unhon ne tor di theen. Is waqt agar koi musalman tarkash liye hue guzarta to Nabi Kareem Sallallahu Alaihi Wasallam farmate ke is ke teer Abu Talha ko de do. Nabi Kareem Sallallahu Alaihi Wasallam halat maloom karne ke liye uchak kar dekhne lagte to Abu Talha Radi Allahu Anhu arz karte: Ya Nabi Allah! Aap par mere maan baap qurban hon, uchak kar mulahiza na farmayein, kahin koi teer Aap ko na lag jaye. Mera seena Nabi Kareem Sallallahu Alaihi Wasallam ke seene ki dhaal bana raha aur mein ne Aisha Bint Abi Bakr Radi Allahu Anha aur Umm Sulaim Radi Allahu Anha (Abu Talha ki biwi) ko dekha ke apna izar uthaye hue (ghaziyon ki madad mein) bari tezi ke sath mashghool theen. (Is khidmat mein un ke inhimak o istighraq ki wajah se unhein kapron tak ka hosh na tha yahan tak ke) mein un ki pindliyon ke zewar dekh sakta tha. Intehai jaldi ke sath mashkeeze apni peethon par liye jati theen aur musalmanon ko pila kar wapas aati theen aur phir unhein bhar kar le jatein aur un ka pani musalmanon ko pilatein aur Abu Talha Radi Allahu Anhu ke hath se is din do ya teen martaba talwar choot kar gir pari thi
.