Allah ne farmaya " Jo log pehle hi ek ghar mein (yani Madinah mein) jam gaye iman ko bhi jama diya jo musalman un ke paas hijrat kar ke jaate hain is se mohabbat karte hain aur Muhajireen ko (mal-e-ghanimat mein se) jo hath aaye is se un ka dil nahi karrhta balkay aur khush hote hain. "
.

Hum se Musa Bin Ismail ne bayan kiya kaha hum se Mahdi Bin Maimoon ne, kaha hum se Ghailan Bin Jarir ne bayan kiya mein ne Anas Radi Allahu Anhu se poocha batlaiye (Ansar) apna naam aap logon ne khud rakh liya tha ya aap logon ka ye naam Allah Ta'ala ne rakha? Unhon ne kaha nahi balkay hamara ye naam Allah Ta'ala ne rakha hai. Ghailan ki riwayat hai ke hum Anas Radi Allahu Anhu ki khidmat mein hazir hote to aap hum se Ansar ki fazilatein aur ghazwat mein un ke mujahidana waqiaat bayan kiya karte phir meri taraf ya qabila Azd ke ek shakhs ki taraf mutawajje ho kar kehte: Tumhari qaum (Ansar) ne falan din falan din falan falan kaam anjam diye
.

Mujh se Ubaid Bin Ismail ne bayan kiya, kaha hum se Abu Usama ne, un se Hisham ne, un se un ke walid ne aur un se Aisha Radi Allahu Anha ne bayan kiya ke Buas ki jang ko (jo Islam se pehle Aus aur Khazraj mein hui thi) Allah Ta'ala ne apne Rasul Sallallahu Alaihi Wasallam ke mufad mein pehle hi muqaddam kar rakha tha chunanche jab aap Madinah mein tashreef laye to ye qabail aapas ki phoot ka shikar thay aur un ke sardar kuch qatl kiye ja chuke thay, kuch zakhmi thay, to Allah Ta'ala ne is jang ko aap se pehle is liye muqaddam kiya tha taake wo aap ke tashreef laate hi musalman ho jayein
.

Hum se Abu-ul-Walid ne bayan kiya, kaha hum se Shuba ne bayan kiya, un se Abu-at-Tayyah ne, unhon ne Anas Bin Malik Radi Allahu Anhu se suna, unhon ne bayan kiya ke fatah Makkah ke din jab Nabi Kareem Sallallahu Alaihi Wasallam ne Quraish ko (ghazwa Hunain ki) ghanimat ka sara mal de diya to baaz naujawan Ansariyon ne kaha (Allah ki qasam!) ye to ajeeb baat hai abhi hamari talwaron se Quraish ka khoon tapak raha hai aur hamara hasil kiya hua mal-e-ghanimat sirf unhein diya ja raha hai, is ki khabar jab aap Sallallahu Alaihi Wasallam ko mili to aap ne Ansar ko bulaya. Anas Radi Allahu Anhu ne kaha ke aap Sallallahu Alaihi Wasallam ne farmaya jo khabar mujhe mili hai kya wo sahih hai? Ansar log jhoot nahi bolte thay unhon ne arz kar diya ke aap ko sahih ittila mili hai. Is par aap Sallallahu Alaihi Wasallam ne farmaya kya tum is se khush aur razi nahi ho ke jab sab log ghanimat ka mal le kar apne gharon ko wapas hon aur tum log Rasul Allah Sallallahu Alaihi Wasallam ko sath liye apne gharon ko jao ge? Ansar jis naale ya ghaati mein chalein ge to mein bhi isi naale ya ghaati mein chaloon ga
.

Ye qaul Abdullah Bin Zaid Bin Ka'b Bin Asim ne Nabi Kareem Sallallahu Alaihi Wasallam se naqal kiya hai
.

Mujh se Muhammad Bin Bashar ne bayan kiya, kaha hum se Ghundar ne bayan kiya, hum se Shuba ne bayan kiya, un se Muhammad Bin Ziyad ne, un se Abu Hurairah Radi Allahu Anhu ne ke Nabi Kareem Sallallahu Alaihi Wasallam ne ya (yun bayan kiya ke) Abu-ul-Qasim Sallallahu Alaihi Wasallam ne farmaya ke Ansar jis waadi ya ghaati mein jayein to mein bhi unhein ki waadi mein jaoon ga. Aur agar mein hijrat na karta to mein Ansar ka ek fard hona pasand karta. Abu Hurairah Radi Allahu Anhu ne kaha aap par mere maan baap qurban hon aap ne ye koi zulm wali baat nahi farmai aap ko Ansar ne apne yahan theheraya aur aap ki madad ki thi ya Abu Hurairah Radi Allahu Anhu ne (is ke hum maani) aur koi doosra kalma kaha
.

Hum se Ismail Bin Abdullah ne bayan kiya, kaha ke mujh se Ibrahim Bin Saad ne bayan kiya, un se un ke walid ne, un se un ke dada ne ke jab Muhajir log Madinah mein aaye to Rasul Allah Sallallahu Alaihi Wasallam ne Abdur Rahman Bin Auf aur Saad Bin Rabee ke darmiyan bhai chara kara diya. Saad Radi Allahu Anhu ne Abdur Rahman Bin Auf Radi Allahu Anhu se kaha ke mein Ansar mein sab se zyada doulat mand hoon is liye aap mera aadha mal le lein aur meri do biwiyan hain aap unhein dekh lein jo aap ko pasand ho is ke mutaliq mujhe batayein mein ise talaq de doon ga. Iddat guzarne ke baad aap is se nikah kar lein. Is par Abdur Rahman Bin Auf Radi Allahu Anhu ne kaha: Allah tumhare ahl aur mal mein barkat ata farmaye tumhara bazaar kidhar hai? Chunanche mein ne Bani Qainuqa ka bazaar unhein bata diya, jab wahan se kuch tijarat kar ke laute to un ke sath kuch paneer aur ghee tha phir wo isi tarah rozana subah sawere bazaar mein chale jaate aur tijarat karte aakhir ek din khidmat-e-Nabwi mein aaye to un ke jism par (khushbu ki) zardi ka nishan tha aap Sallallahu Alaihi Wasallam ne farmaya ye kya hai unhon ne bataya ke mein ne shadi kar li hai. Aap Sallallahu Alaihi Wasallam ne farmaya: Mahr kitna ada kiya hai? Arz kiya ke sone ki ek guthli ya (ye kaha ke) ek guthli ke wazan barabar sona ada kiya hai, ye shak Ibrahim rawi ko hua
.

Hum se Qutaibah ne bayan kiya, kaha hum se Ismail Bin Jafar ne bayan kiya, un se Humaid ne aur un se Anas Bin Malik Radi Allahu Anhu ne ke jab Abdur Rahman Bin Auf Radi Allahu Anhu (Makkah se hijrat kar ke Madinah aaye to) Rasul Allah Sallallahu Alaihi Wasallam ne un ke aur Saad Bin Rabee Radi Allahu Anhu ke darmiyan bhai chara kara diya. Saad Radi Allahu Anhu bahut doulat mand thay, unhon ne Abdur Rahman Bin Auf Radi Allahu Anhu se kaha: Ansar ko maloom hai ke mein un mein sab se zyada maldar hoon is liye mein apna aadha aadha mal apne aur aap ke darmiyan baant dena chahta hoon aur mere ghar mein do biwiyan hain jo aap ko pasand ho mein ise talaq de doon ga is ki iddat guzar jaane par aap is se nikah kar lein. Abdur Rahman Bin Auf Radi Allahu Anhu ne kaha Allah tumhare ahl o mal mein barkat ata farmaye, (mujh ko apna bazaar dikhla do) phir wo bazaar se is waqt tak wapas nahi aaye jab tak kuch ghee aur paneer bator nafa bacha nahi liya. Thore hi dinon ke baad jab Rasul Allah Sallallahu Alaihi Wasallam ki khidmat mein wo hazir hue to jism par zardi ka nishan tha. Aap Sallallahu Alaihi Wasallam ne poocha ye kya hai? Bole ke mein ne ek Ansari khatoon se shadi kar li hai. Aap Sallallahu Alaihi Wasallam ne poocha mahr kya diya hai? Bole ek guthli ke barabar sona ya (ye kaha ke) sone ki ek guthli di hai, is ke baad aap Sallallahu Alaihi Wasallam ne farmaya accha ab walima karo khwah ek bakri hi se ho
.

Hum se Abu Hammam Salt Bin Muhammad ne bayan kiya kaha mein ne Mugheerah Bin Abdur Rahman se suna, kaha hum se Abu-az-Zinad ne bayan kiya, un se Aeraj ne aur un se Abu Hurairah Radi Allahu Anhu ne ke Ansar ne kaha: Ya Rasul Allah! Khajoor ke baghat hamare aur Muhajireen ke darmiyan taqseem farma dein, aap Sallallahu Alaihi Wasallam ne farmaya ke mein aisa nahi karoon ga is par Ansar ne (Muhajireen se) kaha phir aap aisa kar lein ke kaam hamari taraf se aap anjam diya karein aur khajooron mein aap hamare sathi ho jayein. Muhajireen ne kaha hum ne aap logon ki ye baat suni aur hum aisa hi karein ge
.

Hum se Hajjaj Bin Minhal ne bayan kiya, kaha hum se Shuba ne bayan kiya, mujhe Adi Bin Sabit ne khabar di, kaha ke mein ne Bara Radi Allahu Anhu se suna wo kehte thay ke mein ne Nabi Kareem Sallallahu Alaihi Wasallam se suna ya yun bayan kiya ke Nabi Kareem Sallallahu Alaihi Wasallam ne farmaya Ansar se sirf momin hi mohabbat rakhe ga aur un se sirf munafiq hi bughz rakhe ga. Pas jo shakhs un se mohabbat kare us se Allah mohabbat kare ga aur jo un se bughz rakhe ga us se Allah Ta'ala us se bughz rakhe ga (maloom hua ke Ansar ki mohabbat nishan-e-iman hai aur un se dushmani rakhna be iman logon ka kaam hai)
.