Hum se Muhammad ne bayan kiya kaha hum ko Abdullah ne khabar di unhein Ma'mar ne un se Zuhri ne bayan kiya kaha mujh ko Salim Bin Abdullah ne khabar di aur unhein in ke walid (Abdullah Radi Allahu Anhu) ne ke Nabi Kareem (Sallallahu Alaihi Wasallam) jab maqam-e-Hijr se guzre to farmaya "In logon ki basti mein jinhon ne zhulm kiya tha na dakhil ho lekin is surat mein ke tum rote hue ho. Kahin aisa na ho ke tum par wahi azab aa jaye jo in par aaya tha." Phir Aap (Sallallahu Alaihi Wasallam) ne apni chadar chehra-e-mubarak par daal li. Aap (Sallallahu Alaihi Wasallam) is waqt kajawe par tashreef rakhte thay
.

Mujh se Abdullah ne bayan kiya kaha hum se Wahb ne bayan kiya un se in ke walid ne bayan kiya unhon ne Yunus se suna unhon ne Zuhri se unhon ne Salim se aur un se Ibn Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Jab tumhein in logon ki basti se guzarna pade jinhon ne apni janon par zhulm kiya tha to rote hue guzro. Kahin tumhein bhi wo azab aa na pakde jis mein ye zhulim log giraftar kiye gaye thay."
.

Hum se Ishaq Bin Mansoor ne bayan kiya kaha hum ko Abd-ul-Samad ne khabar di kaha hum se Abd-ul-Rahman Bin Abdullah ne bayan kiya un se in ke walid ne aur un se Abdullah Bin Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Shareef Bin shareef Bin shareef Bin shareef Yusuf Bin Yaqub Bin Ishaq Bin Ibrahim Alaihis Salam thay."
.

Mujh se Ubaid Bin Ismail ne bayan kiya kaha hum se Abu Usama ne bayan kiya un se Ubaidullah ne bayan kiya unhein Said Bin Abi Said ne khabar di aur unhein Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) se pucha gaya ke sab se zyada shareef aadmi kaun hai? Aap (Sallallahu Alaihi Wasallam) ne farmaya "Jo Allah ka khauf zyada rakhta ho." Sahaba ne arz kiya ke hamare sawal ka maqsad ye nahi hai. Aap (Sallallahu Alaihi Wasallam) ne farmaya ke phir sab se zyada shareef Allah ke nabi Yusuf Bin nabi-ullah Bin nabi-ullah Bin khaleel-ullah hain. Sahaba ne arz kiya ke hamare sawal ka maqsad ye bhi nahi hai. Aap (Sallallahu Alaihi Wasallam) ne farmaya ke tum log Arab ke khanwadon ke bare mein poochna chahte ho. Dekho! Logon ki misal kano ki si hai (kisi kaan mein se accha mal nikalta hai kisi mein se bura) jo log tum mein se zamana-e-jahiliyat mein shareef aur behtar akhlaq ke thay wahi Islam ke baad bhi acche aur shareef hain bashart-e-ke wo deen ki samajh hasil karein
.

Hum se Muhammad Bin Salam Baikandi ne bayan kiya kaha hum ko Abdah ne khabar di unhein Ubaidullah ne unhein Said ne unhein Abu Hurairah (Radi Allahu Anhu) ne aur unhon ne Nabi Kareem (Sallallahu Alaihi Wasallam) se yahi hadees riwayat ki
.

Hum se Badal Bin Muhabbir ne bayan kiya kaha hum ko Shuba ne khabar di un se Saad Bin Ibrahim ne bayan kiya unhon ne Urwah Bin Zubair se suna aur unhon ne Aisha (Radi Allahu Anha) se ke Nabi Kareem (Sallallahu Alaihi Wasallam) ne (maradh-ul-maut mein) in se farmaya "Abu Bakr se kaho ke logon ko namaz parhayein" Aisha (Radi Allahu Anha) ne arz kiya ke wo bahut narm dil hain Aap ki jagah jab khade honge to in par riqqat tari ho jaye gi. Nabi Kareem (Sallallahu Alaihi Wasallam) ne unhein dobara yahi hukm diya. Lekin unhon ne bhi dobara yahi uzr bayan kiya Shuba ne bayan kiya ke Nabi Kareem (Sallallahu Alaihi Wasallam) ne teesri ya chauthi martaba farmaya ke tum to Yusuf Alaihis Salam ki sath waliya ho. (Zahir mein kuch batin mein kuch) Abu Bakr (Radi Allahu Anhu) se kaho namaz parhayein
.

Hum se Rabi Bin Yahya Basri ne bayan kiya kaha hum se Za'ida ne bayan kiya un se Abd-ul-Malik Bin Umair ne un se Abu Burda Bin Abi Musa ne aur un se in ke walid ne bayan kiya ke Nabi Kareem (Sallallahu Alaihi Wasallam) jab bimar pade to Aap (Sallallahu Alaihi Wasallam) ne farmaya ke Abu Bakr se kaho ke logon ko namaz parhayein. Aisha (Radi Allahu Anha) ne arz kiya ke Abu Bakr (Radi Allahu Anhu) nihayat narm dil insan hain lekin Nabi Kareem (Sallallahu Alaihi Wasallam) ne dobara yahi hukm farmaya aur unhon ne bhi wahi uzr dohraya. Aakhir Nabi Kareem (Sallallahu Alaihi Wasallam) ne farmaya ke in se kaho namaz parhayein. Tum to Yusuf ki sath waliya ho. (zahir kuch batin kuch) chunanche Abu Bakr (Radi Allahu Anhu) ne Nabi Kareem (Sallallahu Alaihi Wasallam) ki zindagi mein imamat ki aur Husain Bin Ali Jafi ne Za'ida se "rajulun raqeequn" ke alfaz naql kiye ke Abu Bakr narm dil aadmi hain
.

Hum se Abu-ul-Yaman ne bayan kiya unhon ne kaha hum ko Shuaib ne khabar di unhon ne kaha hum se Abu-ul-Zinad ne bayan kiya un se Aaraj ne bayan kiya aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne dua farmayi 'Allahumma anji Ay-yāsha bna Abī Rabī'ata, Allahumma anji Salamata bna Hishāmin, Allahumma anji-l-Walīda bna-l-Walīdi, Allahumma anji-l-mustadh'afīna mina-l-mu'minīna, Allahumma-shdud wat'ataka ala Mudhara, Allahumma-j'alhā sinīna ka-sinī Yūsufa' "Ae Allah! Ayash Bin Abi Rabia ko najat de Ae Allah! Salama Bin Hisham ko najat de Ae Allah! Waleed Bin Waleed ko najat de Ae Allah tamam dhaeef aur kamzor musalmanon ko najat de. Ae Allah! Qabile Muzar ko sakht giraft mein pakad le. Ae Allah! Yusuf Alaihis Salam ke zamane ki si qaht-sali in (zhulimon) par nazil farma."
.

Hum se Abdullah Bin Muhammad Bin Asma Ibn Akhi Juwayriya ne bayan kiya unhon ne kaha hum se Juwayriya Bin Asma ne bayan kiya un se Maalik ne bayan kiya un se Zuhri ne bayan kiya un ko Said Bin Musayyab aur Abu Ubaida ne khabar di aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Allah Ta'ala Loot Alaihis Salam par reham farmaye ke wo zabardast rukun (yaani Allah Ta'ala) ki panah lete thay aur agar mein itni muddat tak qaid rehta jitni Yusuf Alaihis Salam rahe thay aur phir mere paas (badshah ka aadmi) bulane ke liye aata to mein fauran is ke sath chala jata."
.

Hum se Muhammad Bin Salam ne bayan kiya kaha hum ko Muhammad Bin Fudail ne khabar di kaha hum se Husain ne bayan kiya un se Sufyan ne un se Masrooq ne bayan kiya ke mein ne Aisha (Radi Allahu Anha) ki walida Umm-e-Rooman (Radi Allahu Anha) se Aisha (Radi Allahu Anha) ke bare mein jo bohtan-tarashi gaya tha is ke mutalliq pucha to unhon ne kaha ke Aisha (Radi Allahu Anha) ke sath baithi hui thi ke ek ansariya aurat hamare yahan aayi aur kaha ke Allah falan (Mustah Bin Asasa) ko tabah kar de aur wo ise tabah kar bhi chuka unhon ne bayan kiya ke mein ne kaha aap ye kya keh rahi hain unhon ne bataya ke isi ne to ye jhoot mashhoor kiya hai. Phir ansariya aurat ne (Aisha Radi Allahu Anha par tohmat ka sara) waqiya bayan kiya. Aisha (Radi Allahu Anha) ne (apni walida se) pucha ke kaun sa waqiya? To in ki walida ne unhein waqiya ki tafseel batayi. Aisha ne pucha ke kya ye qissa Abu Bakr (Radi Allahu Anhu) aur Rasul Allah (Sallallahu Alaihi Wasallam) ko bhi maloom ho gaya hai? In ki walida ne bataya ke haan. Ye sunte hi Aisha (Radi Allahu Anha) behosh ho kar gir padeein aur jab hosh aaya to jade ke sath bukhaar chadha hua tha. Phir Nabi Kareem (Sallallahu Alaihi Wasallam) tashreef laye aur daryaft farmaya ke unhein kya hua? Mein ne kaha ke ek baat in se aisi kahi gayi thi aur isi ke sadme se in ko bukhaar aa gaya hai. Phir Aisha (Radi Allahu Anha) uth kar baith gayeen aur kaha Allah ki qasam! Agar mein qasam khaoon jab bhi aap log meri baat nahi maan sakte aur agar koi uzr bayan karoon to ise bhi tasleem nahi kar sakte. Bas meri aur aap logon ki misal Yaqub Alaihis Salam aur in ke beton ki si hai (ke unhon ne apne beton ki man-ghadat kahani sun kar farmaya tha ke) 'jo kuch tum keh rahe ho mein is par Allah hi ki madad chahta hoon.' Is ke baad Nabi Kareem (Sallallahu Alaihi Wasallam) wapas tashreef le gaye aur Allah Ta'ala ko jo kuch manzoor tha wo nazil farmaya. Jab Nabi Kareem (Sallallahu Alaihi Wasallam) ne is ki khabar Aisha (Radi Allahu Anha) ko di to unhon ne kaha ke is ke liye mein sirf Allah ka shukr ada karti hoon kisi aur ka nahi
.