Humey Muslim Bin Ibrahim ne bayan kiya, kaha hum se Wuhaib ne, un se Ibn Taoos ne, un se un ke walid Taoos ne, un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Allah Paak ne Yaajooj Maajooj ki deewar se itna khool diya hai", phir Aap (Sallallahu Alaihi Wasallam) ne apni ungliyon se nawway ka adad bana kar batlaya
.

Mujh se Ishaq Bin Nasr ne bayan kiya, kaha hum se Abu Usama ne bayan kiya, un se Aamash ne, un se Abu Salih ne aur un se Abu Said Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya ke Allah Ta'ala (qiyamat ke din) farmaye ga, Ae Aadam! Aadam Alaihis Salam arz kareinge mein ita'at ke liye hazir hoon, musta-id hoon, saari bhalaiyaan sirf tere hi hath mein hain. Allah Ta'ala farmaye ga, jahannum mein jane walon ko (logon mein se alag) nikal lo. Aadam Alaihis Salam arz kareinge. Ae Allah! Jahannumiyon ki tadaad kitni hai? Allah Ta'ala farmaye ga ke har ek hazar mein se nau so nannaway. Is waqt (ki houl-naki aur wahshat se) bacche boodhe ho jayeinge aur har hamila aurat apna hamal gira de gi. Is waqt tum (khauf-o-dahshat se) logon ko mad-hoshi ke aalam mein dekhoge, halanke wo behosh na honge. Lekin Allah ka azab bada hi sakht ho ga. Sahaba ne arz kiya: Ya Rasul Allah! Wo ek shakhs hum mein se kaun ho ga? Nabi Kareem (Sallallahu Alaihi Wasallam) ne farmaya ke tumhein bisharat ho, wo ek aadmi tum mein se ho ga aur ek hazar dozakhi Yaajooj Maajooj ki qaum se honge. Phir Nabi Kareem (Sallallahu Alaihi Wasallam) ne farmaya is zaat ki qasam jis ke hath mein meri jaan hai, mujhe umeed hai ke tum (ummat-e-muslima) tamam jannat walon ke ek tihayi hoge. Phir hum ne Allahu Akbar kaha to Aap (Sallallahu Alaihi Wasallam) ne farmaya ke mujhe umeed hai ke tum tamam jannat walon ke aadhe hoge phir hum ne Allahu Akbar kaha, phir Aap (Sallallahu Alaihi Wasallam) ne farmaya ke (mahshar mein) tum log tamam insano ke muqabale mein itne hoge jitne kisi safaid bail ke jism par ek siyah baal, ya jitne kisi siyah bail ke jism par ek safaid baal hota hai
.

Aur Allah Ta'ala ka farman "wa-ttakhaz-allahu ibrahima khalilan" "Aur Allah ne Ibrahim ko khaleel banaya." Aur (Surah Al-Nahl mein) Allah Ta'ala ka farman "inna ibrahima kana ummatan qanitan" "Beshak Ibrahim (tamam khubiyon ka majmua hone ki wajah se khud) ek ummat thay, Allah Ta'ala ke muti-o-farmanbardar, ek taraf hone wale" aur (Surah Al-Tauba mein) Allah Ta'ala ka farman "inna ibrahima la-awwahun haleemun" "Beshak Ibrahim nihayat narm tabiyat aur bade hi bardbar thay." Abu Maisara (Amr Bin Shurahbeel) ne kaha ke "awwahun" Habshi zaban mein "la-raheemun" ke maane mein hai
.

Hum se Muhammad Bin Kaseer ne bayan kiya, kaha hum ko Sufyan Thauri ne khabar di, un se Mugheera Bin Numan ne bayan kiya, kaha ke mujh se Said Bin Jubair ne bayan kiya aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya "Tum log hashar mein nange paon, nange jism aur bin-khatna uthaye jao ge." Phir Aap (Sallallahu Alaihi Wasallam) ne is ayat ki tilawat ki "kama bada-na awwala khalqin nu-iduhu wa-dan alaina inna kunna fa-ileena" "Jaisa ke hum ne paida kiya tha pehli martaba, hum aise hi lautayeinge. Ye hamari taraf se ek waada hai jis ko hum poora kar ke raheinge (Surah Al-Anbiya). Aur anbiya mein sab se pehle Ibrahim Alaihis Salam ko kapda pehnaya jaye ga aur mere ashab mein se baaz ko jahannum ki taraf le jaya jaye ga to mein pukar utthoon ga ke ye to mere ashab hain, mere ashab! Lekin mujhe bataya jaye ga ke Aap ki wafat ke baad in logon ne phir kufr ikhtiyar kar liya tha. Is waqt mein bhi wahi jumla kahoon ga jo naik bande (Isa Alaihis Salam) kaheinge 'wa-kuntu alaihim shahīdan ma dumtu fīhim' 'Jab tak mein un ke sath tha un par nigran tha.' Allah Ta'ala ke irshad 'al-Hakeemu' tak
.

Hum se Ismail Bin Abdullah ne bayan kiya ke mujhe mere bhai Abdul Hameed ne khabar di, unhein Ibn Abi Zi'b ne, unhein Said Maqbari ne aur unhein Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya ke Ibrahim Alaihis Salam apne walid Aazar se qiyamat ke din jab mileinge to un ke (walid ke) chehre par siyahi aur ghubar ho ga. Ibrahim Alaihis Salam kaheinge ke kya mein ne aap se nahi kaha tha ke meri mukhalifat na kijiye. Wo kaheinge ke aaj mein aap ki mukhalifat nahi karta. Ibrahim Alaihis Salam arz kareinge ke Ae Rabb! Tu ne waada farmaya tha ke mujhe qiyamat ke din ruswa nahi karega. Aaj is ruswayi se badh kar aur kaun si ruswayi ho gi ke mere walid teri rehmat se sab se zyada door hain. Allah Ta'ala farmaye ga ke mein ne jannat kafiron par haram qarar di hai. Phir kaha jaye ga ke Ae Ibrahim! Tumhare qadmo ke neeche kya cheez hai? Wo dekheinge to ek zibah kiya hua janwar khoon mein lathda hua wahan pada ho ga aur phir is ke paon pakad kar ise jahannum mein daal diya jaye ga
.

Hum se Yahya Bin Sulaiman ne bayan kiya, kaha ke mujh se Abdullah Bin Wahb ne bayan kiya, kaha ke mujhe Amr Bin Harith ne khabar di, un se Bukair ne bayan kiya, un se Ibn Abbas ke maula Kuraib ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) bait-ullah mein dakhil hue to is mein Ibrahim Alaihis Salam aur Maryam Alaihim-as-Salam ki tasveerain dekhein, Aap (Sallallahu Alaihi Wasallam) ne farmaya ke Quraish ko kya ho gaya? Halanke unhein maloom hai ke farishte kisi aise ghar mein dakhil nahi hote jis mein tasveerain rakkhi hon, ye Ibrahim Alaihis Salam ki tasveer hai aur wo bhi pansa phainkte hue
.

Hum se Ibrahim Bin Musa ne bayan kiya, kaha hum ko Hisham ne khabar di, unhein Ma'mar ne, unhein Ayub ne, unhein Ikrima ne aur unhein Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne jab bait-ullah mein tasveerain dekhein to andar is waqt tak dakhil na hue jab tak wo mita na di gayeen aur Aap (Sallallahu Alaihi Wasallam) ne Ibrahim Alaihis Salam aur Ismail Alaihis Salam ki tasveerain dekhein ke in ke hathon mein teer (panse ke) thay to Aap (Sallallahu Alaihi Wasallam) ne farmaya "Allah un par barbadi laye. Wallah in hazrat ne kabhi teer nahi phainke."
.

Hum se Ali Bin Abdullah ne bayan kiya, kaha hum se Yahya Bin Said ne bayan kiya, kaha hum se Ubaidullah ne bayan kiya, kaha ke mujh se Said Bin Abi Said ne bayan kiya, un se un ke walid ne aur un se Abu Hurairah (Radi Allahu Anhu) ne ke arz kiya gaya: Ya Rasul Allah! Sab se zyada shareef kaun hai? Nabi Kareem (Sallallahu Alaihi Wasallam) ne farmaya "Jo sab se zyada parhezgar ho." Sahaba ne arz kiya ke hum Aap se is ke mutalliq nahi poochte. Nabi Kareem (Sallallahu Alaihi Wasallam) ne farmaya "Phir Allah ke nabi Yusuf Bin nabi-ullah Bin nabi-ullah Bin khaleel-ullah (sab se zyada shareef hain)" sahaba ne kaha ke hum is ke mutalliq bhi nahi poochte. Nabi Kareem (Sallallahu Alaihi Wasallam) ne farmaya "Accha Arab ke khandanon ke mutalliq tum poonchna chahte ho. Suno jo jahiliyat mein shareef thay Islam mein bhi wo shareef hain jab ke deen ki samajh unhein aa jaye." Abu Usama aur Mu'tamir ne Ubaidullah se bayan kiya, un se Said ne aur un se Abu Hurairah (Radi Allahu Anhu) ne aur unhon ne Nabi Kareem (Sallallahu Alaihi Wasallam) se
.

Hum se Momil ne bayan kiya, kaha hum se Ismail ne bayan kiya, kaha hum se Auf ne, kaha hum se Abu Raja ne, kaha hum se Samura (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Aaj ki raat mere paas (khwab mein) do farishte (Jibrail-o-Mikail Alaihim-as-Salam) aaye. Phir ye dono farishte mujhe sath le kar ek lambe qadd ke buzurg ke paas gaye, wo itne lambe thay ke in ka sarr mein nahi dekh pata tha aur ye Ibrahim Alaihis Salam thay."
.

Hum se Bayan Bin Amr ne bayan kiya, kaha hum se Nazar ne bayan kiya, kaha hum ko Ibn Aun ne khabar di, unhein Mujahid ne aur unhon ne Ibn Abbas (Radi Allahu Anhuma) se suna Aap ke samne log Dajjal ka tazkira kar rahe thay ke is ki peshani par likha hua ho ga "Kafir" ya (yun likha hua ho ga) "K F R" Ibn Abbas (Radi Allahu Anhuma) ne kaha ke Nabi Kareem (Sallallahu Alaihi Wasallam) se mein ne ye hadees nahi suni thi. Albatta Aap (Sallallahu Alaihi Wasallam) ne ek martaba ye hadees bayan farmayi ke Ibrahim Alaihis Salam (ki shakal-o-waza maloom karne) ke liye tum apne sahab ko dekh sakte ho aur Musa Alaihis Salam ka badan guttha hua, gandum-goon, ek surkh ont par sawar thay. Jis ki nakeel khajoor ki chaal ki thi. Jaise mein unhein is waqt bhi dekh raha hoon ke wo Allah ki badayi bayan karte hue wadi mein utar rahe hain
.