Hum se Abdan ne bayan kiya, kaha hum ko Abdullah Bin Mubarak ne khabar di, kaha hum ko Abu Hayyan Taimi (Yahya Bin Saeed) ne, unhein Shabi ne, aur un se Numan Bin Bashir (Radi Allahu Anhuma) ne bayan kiya ke meri maan ne mere baap se mujhe ek cheez hiba dene ke liye kaha (pehle to unhon ne inkar kiya kyunke doosri biwi ke bhi aulad thi) phir razi ho gaye aur mujhe wo cheez hiba kar di. Lekin maan ne kaha ke jab tak aap Nabi Kareem (Sallallahu Alaihi Wasallam) ko is mamla mein gawah na banayein mein is par razi na hoon gi. Chunanchay walid mera hath pakar kar Nabi Kareem (Sallallahu Alaihi Wasallam) ki khidmat mein hazir hue. Mein abhi nau-umar tha. Unhon ne arz kiya ke is larke ki maan Amrah Bint Rawaha (Radi Allahu Anha) mujh se ek cheez ise hiba karne ke liye keh rahi hain. Aap (Sallallahu Alaihi Wasallam) ne daryaft farmaya is ke alawa aur bhi tumhare larke hain? Unhon ne kaha han, hain. Numan (Radi Allahu Anhu)! ne bayan kiya, mera khayal hai ke Aap (Sallallahu Alaihi Wasallam) ne is par farmaya "To mujh ko zulm ki baat par gawah na bana." Aur Abu Haraiz ne Shabi se ye naqal kiya ke Aap (Sallallahu Alaihi Wasallam) ne farmaya "Mein zulm ki baat par gawah nahi banta."
.

Hum se Adam ne bayan kiya, kaha hum se Shuba ne bayan kiya, kaha hum se Abu Hamza ne bayan kiya ke mein ne Zahdam Bin Mudrib (Radi Allahu Anhu) se suna ke mein ne Imran Bin Husain (Radi Allahu Anhuma) se suna aur unhon ne bayan kiya ke Rasul Allah (Sallallahu Alaihi Wasallam) ne farmaya "Tum mein sab se behtar mere zamana ke log (Sahaba) hain. Phir wo log jo in ke baad aayein ge (Tabieen) phir wo log jo is ke bhi baad aayein ge. (Tabah Tabieen) Imran ne bayan kiya ke mein nahi janta Aap (Sallallahu Alaihi Wasallam) ne do zamanon ka (apne baad) zikar farmaya ya teen ka phir Aap (Sallallahu Alaihi Wasallam) ne farmaya ke tumhare baad aise log paida hon ge jo chor hon ge, jin mein diyant ka naam na ho ga. Un se gawahi dene ke liye nahi kaha jaye ga. Lekin wo gawahiyan dete phirein ge. Nazrein manein ge lekin poori nahi karein ge. Mutapa un mein aam ho ga."
.

Hum se Muhammad Bin Kaseer ne bayan kiya, kaha hum ko Sufyan ne khabar di Mansoor se, unhon ne Ibrahim Nakh'i se, unhein Ubaida ne aur un se Abdullah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Sab se behtar mere zamana ke log hain, phir wo log jo is ke baad hon ge, phir wo log jo is ke baad hon ge aur is ke baad aise logon ka zamana aaye ga jo qasam se pehle gawahi dein ge aur gawahi se pehle qasam khayein ge." Ibrahim Nakh'i (Rahimahullah) ne bayan kiya ke hamare bare buzurg shahadat aur ahad ka lafz zaban se nikalne par hamein marte thay
.

Allah Ta'ala ne (Surah Al-Furqan mein) farmaya "Wallazina la yash-hadunaz-zoora" "Behisht ka bala-khana un ko mile ga jo log jhooti gawahi nahi dete." Isi tarah gawahi ko chhupana bhi gunah hai. (Allah Ta'ala ne Surah Al-Baqarah mein farmaya ke) "Wala taktumush-shahadata wa man yaktumha fa-innahu aasimum qalbuhu wallahu bima tamaloona aleem" "Gawahi ko na chhupao, aur jis shaks ne gawahi ko chhupaya to is ke dil mein khot hai aur Allah Ta'ala sab kuch janta hai jo tum karte ho." (Aur Allah Ta'ala ka farman Surah Nisa mein ke) "Taloowa" "Agar tum peich-dar banao ge apni zabanon ko (jhooti) gawahi de kar."
.

Hum se Abdullah Bin Muneer ne bayan kiya, kaha hum ne Wahb Bin Jarir aur Abdul Malik Bin Ibrahim se suna, unhon ne bayan kiya ke hum se Shuba ne bayan kiya, un se Abdullah Bin Abi Bakr Bin Anas ne aur un se Anas (Radi Allahu Anhu) ne bayan kiya ke Rasul Allah (Sallallahu Alaihi Wasallam) se kabira gunahon ke mutalliq poocha gaya to Aap (Sallallahu Alaihi Wasallam) ne farmaya "Allah ke sath kisi ko shareek thehrana, maan baap ki nafarmani karna, kisi ki jaan lena aur jhooti gawahi dena." Is Riwayat ki mutabiat Ghundar, Abu Aamir, Bahz aur Abdus Samad ne Shuba se ki hai
.

Hum se Musaddad ne bayan kiya, kaha hum se Bishr Bin Mufazzal ne bayan kiya, kaha hum se Jariri ne bayan kiya un se Abdur Rahman Bin Abi Bakra ne aur un se un ke baap ne bayan kiya ke Rasul Allah (Sallallahu Alaihi Wasallam) ne farmaya ke mein tum logon ko sab se bare gunah na bataoon? Teen baar Aap (Sallallahu Alaihi Wasallam) ne isi tarah farmaya. Sahaba ne arz kiya, han ya Rasul! Aap (Sallallahu Alaihi Wasallam) ne farmaya, Allah ka kisi ko shareek thehrana, maan baap ki nafarmani karna, Aap (Sallallahu Alaihi Wasallam) is waqt tak teik lagaye hue thay lekin ab Aap (Sallallahu Alaihi Wasallam) seedhe baith gaye aur farmaya, han aur jhooti gawahi bhi. Unhon ne bayan kiya ke Aap (Sallallahu Alaihi Wasallam) ne is jumle ko itni martaba dohraya ke hum kehne lage kash! Aap (Sallallahu Alaihi Wasallam) khamosh ho jate. Ismail Bin Ibrahim ne bayan kiya, un se Jariri ne bayan kiya, aur un se Abdur Rahman ne bayan kiya
.

Qasim, Hasan Basri, Ibn Sirin, Zuhri aur Ata ne bhi andhe ki gawahi jaiz rakkhi hai. Imam Shabi ne kaha ke agar wo zaheen aur samajhdar hai to is ki gawahi jaiz hai. Hakam ne kaha ke bahut si cheezon mein is ki gawahi jaiz ho sakti hai. Zuhri ne kaha accha batao agar Ibn Abbas (Radi Allahu Anhuma) kisi mamle mein gawahi dein to tum ise radd kar sakte ho? Aur Ibn Abbas (Radi Allahu Anhuma) (jab nabina ho gaye thay to) sooraj ghuroob hone ke waqt ek shaks ko bhejte (taake abadi se bahar ja kar dekh aayein ke sooraj poori tarah ghuroob ho gaya ya nahi aur jab wo aa kar ghuroob hone ki khabar dete to) aap iftar karte thay. Isi tarah aap tuloo-e-fajr ke mutalliq poochte aur jab aap se kaha jata ke han fajr tuloo ho gayi to dor rakat (sunnat-e-fajr) namaz parhte. Suleman Bin Yasar (Rahimahullah) ne kaha ke Aisha (Radi Allahu Anha) ki khidmat mein haziri ke liye mein ne un se ijazat chahi to unhon ne meri aawaz pehchan li aur kaha Suleman andar aa jao. Kyunke tum ghalam ho. Jab tak tum par (mal-e-kitabat mein se) kuch bhi baqi reh jaye ga. Samura Bin Jundub (Radi Allahu Anhu) ne naqab-posh aurat ki gawahi jaiz qarar di thi
.

Hum se Muhammad Bin Ubaid Bin Maimoon ne bayan kiya, kaha hum ko Isa Bin Yunus ne khabar di, unhein Hisham ne, unhein un ke baap ne, aur un se Aisha (Radi Allahu Anha) ne bayan kiya ke Nabi Kareem (Sallallahu Alaihi Wasallam) ne ek shaks ko masjid mein Quran parhte suna to farmaya ke in par Allah Ta'ala raham farmaye mujhe unhon ne is waqt falan aur falan aayitein yaad dila dein jinhein mein falan falan suraton mein se bhool gaya tha. Abbad Bin Abdullah (Radi Allahu Anhuma) ne apni Riwayat mein Aisha (Radi Allahu Anha) se ye alfaz zyada bayan kiye hain ke Nabi Kareem (Sallallahu Alaihi Wasallam) ne mere ghar mein tahajjud ki namaz parhi. Is waqt Aap (Sallallahu Alaihi Wasallam) ne Abbad (Radi Allahu Anhu) ki aawaz suni ke wo masjid mein namaz parh rahe hain. Aap ne poocha Aisha! kya ye Abbad ki aawaz hai? Mein ne kaha ji han! Aap ne farmaya, Ae Allah! Abbad par raham farma
.

Hum se Malik Bin Ismail ne bayan kiya, kaha hum se Abdul Aziz Bin Abi Salama ne bayan kiya, kaha hum ko Ibn Shihab ne khabar di Salim Bin Abdullah se aur un se Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne farmaya "Bilal (Radi Allahu Anhu) raat mein azan dete hain. Is liye tum log seheri kha pee sakte ho yahan tak ke (fajr ke liye) doosri azan pukari jaye." Ya (ye farmaya) yahan tak ke "Abdullah Ibn Umm-e-Maktum (Radi Allahu Anhu) ki azan sun lo." Abdullah Ibn Umm-e-Maktum (Radi Allahu Anhu) nabina thay aur jab tak un se kaha na jata subah ho gayi hai, wo azan nahi dete thay
.

Hum se Ziyad Bin Yahya ne bayan kiya, kaha hum se Hatim Bin Wardan ne bayan kiya, kaha hum se Ayub ne bayan kiya, Abdullah Bin Abi Mulaika se aur un se Miswar Bin Makhrama (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ke haan chand qabaein aaein to mujh se mere baap Makhrama (Radi Allahu Anhu) ne kaha ke mere sath Rasul Allah (Sallallahu Alaihi Wasallam) ki khidmat mein chalo. Mumkin hai Aap (Sallallahu Alaihi Wasallam) in mein se koi mujhe bhi inayat farmayein. Mere walid (Nabi Kareem Sallallahu Alaihi Wasallam ke ghar pahunch kar) darwaze par kharay ho gaye aur batein karne lage. Aap (Sallallahu Alaihi Wasallam) ne un ki aawaz pehchan li aur bahar tashreef laye, Aap (Sallallahu Alaihi Wasallam) ke paas ek qaba bhi thi, Aap (Sallallahu Alaihi Wasallam) is ki khubiyan bayan karne lage, aur farmaya "Mein ne ye tumhare hi liye alag kar rakkhi thi, mein ne ye tumhare hi liye alag kar rakkhi thi."
.