Hum se Sadaqah bin Fadl ne byaan kiya , kaha ke hum ko Waleed bin Muslim ne Imam Awzai se khabar di , kaha ke mujh ko Umair bin Hani ne byaan kiya , kaha ke mujh se Junadah bin Abi Umayyah ne byaan kiya , kaha ke mujh se Ubadah bin Samit ne byaan kiya ke Nabi Karim salla Allahu alaihi wasallam ne farmaya jo shakhs raat ko bedaar ho kar yeh dua parhe «la ilaha illallahu wahdahu la sharika lahu , lahul mulku , wa lahul hamdu , wa huwa ala kulli shayin qadeer . alhamdu lillahi , wa subhanallahi , wa la ilaha illallahu , wallahu akbar , wa la hawla wa la quwwata illa billah» (tarjuma) ”Allah ke siwa koi mabood nahin woh akela hai us ka koi shareek nahin mulk isi ke liye hai aur tamam tareefein bhi isi ke liye hain , aur woh har cheez par qadir hai . Tamam tareefein Allah hi ke liye hain , Allah ki zaat paak hai , Allah Ta'ala ke siwa koi mabood nahin aur Allah sab se bara hai , Allah ki madad ke baghair na kisi ko gunahon se bachne ki taqat hai na neki karne ki himmat“ phir yeh parhe «allahummaghfirli» (tarjuma) ae Allah! meri maghfirat farma“ . Ya (yeh kaha ke) koi dua kare to us ki dua qabool hoti hai . Phir agar us ne wuzu kiya (aur namaaz parhi) to namaaz bhi maqbool hoti hai .

Hum se Yahya bin Bukayr ne byaan kiya , kaha ke hum se Layth bin Saad ne byaan kiya , un se Yunus ne , un se Ibn Shihab ne , unhon ne kaha ke mujh ko Haytham bin Abi Sinan ne khabar di ke unhon ne Abu Hurairah razi Allahu anhu se suna , Aap apne waaz mein Rasool Allah salla Allahu alaihi wasallam ka zikr kar rahe thay . Phir Aap ne farmaya ke tumhare bhai ne (apne naatiya ashaar mein) yeh koi ghalat baat nahin kahi . Aap ki murad Abdullah bin Rawahah razi Allahu anhu aur un ke ashaar se thi jin ka tarjuma yeh hai: ”Hum mein Allah ke Rasool maujood hain , jo us ki kitab is waqt humein sunate hain jab Fajr tulu hoti hai . Hum to andhe thay Aap salla Allahu alaihi wasallam ne humein gumrahi se nikal kar sahih rasta dikhaya . Un ki baatein isi qadar yaqeeni hain jo hamare dilon ke andar ja kar baith jaati hain aur jo kuch Aap ne farmaya woh zaroor waqia ho ga . Aap salla Allahu alaihi wasallam raat bistar se apne ko alag kar ke guzarte hain jabke mushrikon se un ke bistar bojhal ho rahe hote hain“ . Yunus ki tarah is hadees ko Aqeel ne bhi Zuhri se riwayat kiya aur Zubaydi ne yoon kaha Saeed bin Musayyib aur Aaraj se , unhon ne Abu Hurairah razi Allahu anhu se .

Hum se Abu al-Numan ne byaan kiya , kaha ke hum se Hammad bin Zayd ne byaan kiya , un se Ayub Sakhtiyani ne , un se Nafi ne , un se Abdullah bin Umar razi Allahu anhuma ne ke mein ne Nabi Karim salla Allahu alaihi wasallam ke zamane mein yeh khwab dekha ke goya ek gaarhay reshmi kapre ka ek tukra mere haath hai . Jaise mein Jannat mein jis jagah ka bhi irada karta hoon to yeh idhar ura ke mujh ko le jata hai aur mein ne dekha ke jaise do farishte mere paas aaye aur unhon ne mujhe Dozakh ki taraf le jaane ka irada kiya hi tha ke ek farishta un se aa kar mila aur (mujh se) kaha ke daro nahin (aur un se kaha ke) ise chhor do .

Meri behen (Umm al-Mumineen) Hafsa razi Allahu anha ne Rasool Allah salla Allahu alaihi wasallam se mera ek khwab byaan kiya to Nabi Karim salla Allahu alaihi wasallam ne farmaya ke Abdullah bara hi achha aadmi hai kaash raat ko bhi namaaz parha karta . Abdullah razi Allahu anhu is ke baad hamesha raat ko namaaz parha karte thay .

Bohat se sahaba rizwanullahi alaihim ajmaeen ne Nabi Karim salla Allahu alaihi wasallam se apne khwab byaan kiye ke Shab-e-Qadr (Ramazan ki) sattaisveen raat hai . Is par Nabi Karim salla Allahu alaihi wasallam ne farmaya ke main dekh raha hoon ke tum sab ke khwab Ramazan ke aakhri ashray mein (Shab-e-Qadr ke hone par) muttafiq ho gaye hain . Is liye jise Shab-e-Qadr ki talash ho woh Ramazan ke aakhri ashray mein dhoonday .

Hum se Abdullah bin Yazid ne byaan kiya , kaha ke hum se Saeed bin Abi Ayub ne byaan kiya , kaha ke mujh se Jafar bin Rabeeah ne byaan kiya , un se Irak bin Malik ne , un se Abu Salamah ne , un se Aisha Siddiqa razi Allahu anha ne ke Nabi Karim salla Allahu alaihi wasallam ne Isha ki namaaz parhi phir raat ko uth kar Aap salla Allahu alaihi wasallam ne tahajjud ki aath rakatain parhein aur do rakatain subah ki azaan o iqamat ke darmiyan parhein jin ko Aap salla Allahu alaihi wasallam kabhi nahin chhorhte thay (Fajr ki sunnaton par madawamat sabit hui) .

Hum se Abdullah bin Yazid ne byaan kiya , unhon ne kaha ke hum se Saeed bin Abi Ayub ne byaan kiya , unhon ne kaha ke mujh se Abul Aswad Muhammad bin Abdur Rahman ne byaan kiya , un se Urwah bin Zubayr razi Allahu anhu ne aur un se Aisha Siddiqa razi Allahu anha ne , unhon ne farmaya ke Nabi Karim salla Allahu alaihi wasallam Fajr ki do sunnat rakatain parhne ke baad dayein karwat par lait jaate .

Hum se Bishr bin Hakam ne byaan kiya , unhon ne kaha ke hum se Sufyan ne byaan kiya , unhon ne kaha ke mujh se Salim Abun Nadar ne Abu Salamah bin Abdur Rahman se byaan kiya aur un se Aisha razi Allahu anha ne ke Nabi Karim salla Allahu alaihi wasallam jab Fajr ki sunnatain parh chukte to agar mein jaagti hoti to Aap salla Allahu alaihi wasallam mujh se baatein karte warna lait jaate jab tak namaaz ki azaan hoti .

Imam Bukhari rahimahullah ne farmaya aur Ammar aur Abu Zar aur Yunus razi Allahu anhum sahabiyon se byaan kiya , aur Jabir bin Zayd , Ikrimah aur Zuhri rahimahullah alaihim tabiyon se aisa hi manqool hai aur Yahya bin Saeed Ansari (tabi) ne kaha ke mein ne apne mulk (Madina Tayyaba) ke aalimon ko yehi dekha ke woh nawafil mein (din ko) har do rakat ke baad salam phera karte thay .

Hum se Qutaybah ne byaan kiya , kaha ke hum se Abdur Rahman bin Abil Muwal ne byaan kiya , un se Muhammad bin Munkadir ne aur un se Jabir bin Abdullah razi Allahu anhuma ne byaan kiya ke Rasool Allah salla Allahu alaihi wasallam humein apne tamam muamalat mein istikhara karne ki isi tarah taleem dete thay jis tarah Quran ki koi surat sikhlate . Aap salla Allahu alaihi wasallam farmate ke jab koi aham muamala tumhare saamne ho to farz ke alawa do rakat nafl parhne ke baad yeh dua parhe «allahumma inni astakhiruka bi'ilmika wa astaqdiruka biqudratika , wa asaluka min fadlikal azeem , fainnaka taqdiru wala aqdiru wa talamu wala alamu wa anta allamul ghuyoob , allahumma in kunta talamu anna hazal amra khayrun li fi deeni wa ma'ashi wa aqibati amri (aw qala) ajili amri wa ajilihi faqdirhu li wa yassirhu li thumma barik li feehi , wa in kunta talamu anna hazal amra sharrun li fi deeni wa ma'ashi wa aqibati amri aw qala fi ajili amri wa ajilihi fasrifhu anni wasrifni anhu , waqdir liyal khayr» (tarjuma) ”Ae mere Allah! main tujh se tere ilm ki badolat khayr talab karta hoon aur teri qudrat ki badolat tujh se taqat mangta hoon aur tere fazl-e-azeem ka talabgar hoon ke qudrat tu hi rakhta hai aur mujhe koi qudrat nahin . Ilm tujh hi ko hai aur main kuch nahin jaanta aur tu tamam posheeda baaton ko janne wala hai . Ae mere Allah! agar tu jaanta hai ke yeh kaam jis ke liye istikhara kiya ja raha hai mere deen dunya aur mere kaam ke anjam ke itibar se mere liye behtar hai ya (Aap ne yeh farmaya ke) mere liye waqti taur par aur anjam ke itibar se yeh (khayr hai) to ise mere liye naseeb kar aur is ka husool mere liye aasan kar aur phir is mein mujhe barkat ata kar aur agar tu jaanta hai ke yeh kaam mere deen , dunya aur mere kaam ke anjam ke itibar se bura hai . Ya (Aap salla Allahu alaihi wasallam ne yeh kaha ke) mere muamale mein waqti taur par aur anjam ke itibar se (bura hai) to ise mujh se hata de aur mujhe bhi is se hata de . Phir mere liye khayr muqaddar farma de , jahan bhi woh ho aur is se mere dil ko mutmain bhi kar de“ . Aap salla Allahu alaihi wasallam ne farmaya ke is kaam ki jagah is kaam ka naam le .