Hum se Abdullah bin Maslamah al-Qanabi ne byaan kiya , un se Imam Malik rahimahullah ne , un ne Ibn Shihab ne , un se Abu Salamah Abdur Rahman aur Abu Abdullah al-Agharr ne aur un donon hazrat se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke hamara Parvardigar buland barkat wala hai har raat ko is waqt aasman dunya par aata hai jab raat ka aakhri tihayi hissa reh jata hai . Woh kehta hai koi mujh se dua karne wala hai ke main us ki dua qabool karoon , koi mujh se mangne wala hai ke main use doon koi mujh se bakhshish talab karne wala hai ke main us ko bakhsh doon .

Aur Salman Farsi ne Abu Darda (razi Allahu anhuma) se farmaya ke shuru raat mein so ja aur aakhir raat mein ibadat kar . Nabi Karim salla Allahu alaihi wasallam ne yeh sun kar farmaya tha ke Salman ne bilkul sach kaha .

Hum se Abul Waleed ne byaan kiya , kaha ke hum se Shubah ne byaan kiya , (doosri sanad) aur mujh se Sulayman bin Harb ne byaan kiya , unhon ne kaha ke hum se Shubah ne byaan kiya , un se Abu Ishaq Amr bin Abdullah ne , un se Aswad bin Yazid ne , unhon ne batlaya ke mein ne Aisha Siddiqa razi Allahu anha se poocha ke Nabi Karim salla Allahu alaihi wasallam raat mein namaaz kyonkar parhte thay ? Aap ne batlaya ke shuru raat mein so rahte aur aakhir raat mein bedaar ho kar tahajjud ki namaaz parhte . Is ke baad bistar par aa jaate aur jab muazzin azaan deta to jaldi se uth baithte . Agar ghusl ki zaroorat hoti to ghusl karte warna wuzu kar ke bahar tashreef le jaate .

Hum se Abdullah bin Yusuf Tanisi ne byaan kiya , unhon ne kaha ke humein Imam Malik rahimahullah ne khabar di , unhein Saeed bin Abi Saeed Maqburi ne khabar di , unhein Abu Salamah bin Abdur Rahman ne khabar di ke Umm al-Mumineen Aisha Siddiqa razi Allahu anha se unhon ne poocha ke Nabi Karim salla Allahu alaihi wasallam Ramazan mein (raat ko) kitni rakatain parhte thay . Aap ne jawab diya ke Rasool Allah salla Allahu alaihi wasallam (raat mein) gyarah rakaton se zyada nahin parhte thay . Khwah Ramazan ka maheena hota ya koi aur . Pehle Aap salla Allahu alaihi wasallam chaar rakat parhte . Un ki khoobi aur lambayi ka kya poochna . Phir Aap salla Allahu alaihi wasallam chaar rakat aur parhte un ki khoobi aur lambayi ka kya poochna . Phir teen rakatain parhte . Aisha razi Allahu anha ne farmaya ke mein ne arz kiya ya Rasool Allah! Aap witr parhne se pehle hi so jaate hain ? Is par Aap salla Allahu alaihi wasallam ne farmaya ke Aisha! meri aankhein soti hain lekin mera dil nahin sota .

Hum se Muhammad bin Muthanna ne byaan kiya , unhon ne kaha ke hum se Yahya bin Saeed Qattan ne byaan kiya aur unhon ne kaha ke hum se Hisham bin Urwah ne byaan kiya ke mujhe mere baap Urwah ne khabar di ke Aisha Siddiqa razi Allahu anha ne batlaya ke mein ne Nabi Karim salla Allahu alaihi wasallam ko raat ki kisi namaaz mein baith kar Quran parhte nahin dekha . Yahan tak ke Aap salla Allahu alaihi wasallam boorhay ho gaye to baith kar Quran parhte thay lekin jab tees chaalis aayatein reh jaatin to kharay ho jaate phir is ko parh kar ruku karte thay .

Hum se Ishaq bin Nasr ne byaan kiya , unhon ne kaha ke hum se Abu Usamah Hammad bin Asabah ne byaan kiya , un se Abu Hayyan Yahya bin Saeed ne byaan kiya , un se Abu Zurah ne byaan kiya aur un se Abu Hurairah razi Allahu anhu ne ke Nabi Karim salla Allahu alaihi wasallam ne Bilal razi Allahu anhu se Fajr ke waqt poocha ke ae Bilal! mujhe apna sab se zyada umeed wala nek kaam batao jise tum ne Islam laane ke baad kiya hai kyonke mein ne Jannat mein apne aage tumhare jooton ki chaap suni hai . Bilal razi Allahu anhu ne arz kiya mein ne to apne nazdeek is se zyada umeed ka koi kaam nahin kiya ke jab mein ne raat ya din mein kisi waqt bhi wuzu kiya to mein is wuzu se nafl namaaz parhta rehta jitni meri taqdeer likhi gayi thi .

Hum se Abu Mamar Abdullah bin Amr ne byaan kiya , kaha ke hum se Abdul Warith bin Saad ne byaan kiya , kaha ke hum se Abdul Aziz bin Suhayb ne byaan kiya , un se Anas bin Malik razi Allahu anhu ne ke Nabi Karim salla Allahu alaihi wasallam masjid mein tashreef le gaye . Aap salla Allahu alaihi wasallam ki nazar ek rassi par pari jo do sutoonon ke darmiyan tani hui thi . Daryaft farmaya ke yeh rassi kaisi hai ? Logon ne arz ki ke yeh Zaynab razi Allahu anha ne bandhi hai jab woh (namaaz mein khari khari) thak jaati hain to is se latki rahti hain . Nabi Karim salla Allahu alaihi wasallam ne farmaya ke nahin yeh rassi nahin honi chahiye ise khol dalo , tum mein har shakhs ko chahiye jab tak dil lage namaaz parhe , thak jaye to baith jaye .

Aur Imam Bukhari rahimahullah ne farmaya ke hum se Abdullah bin Maslamah al-Qanabi ne byaan kiya , un se Malik rahimahullah ne , un se Hisham bin Urwah ne , un se un ke waalid ne aur un se Aisha razi Allahu anha ne farmaya ke mere paas Banu Asad ki ek aurat baithi thi , Nabi Karim salla Allahu alaihi wasallam tashreef laaye to un ke mutaliq poocha ke yeh kaun hain ? Main ne kaha ke yeh falan khatoon hain jo raat bhar nahin sotin . Un ki namaaz ka Aap salla Allahu alaihi wasallam ke saamne zikr kiya gaya . Lekin Aap salla Allahu alaihi wasallam ne farmaya ke bas tumhein sirf itna hi amal karna chahiye jitne ki tum mein taqat ho . Kyonke Allah Ta'ala to (thawab dene se) thakta hi nahin tum hi amal karte karte thak jao ge .

Hum se Abbas bin Husayn ne byaan kiya , kaha ke hum se Mubashir bin Ismail Halbi ne , Awzai se byaan kiya (doosri sanad) aur mujh se Muhammad bin Muqatil Abul Hasan ne byaan kiya , kaha ke humein Abdullah bin Mubarak ne khabar di , unhein Imam Awzai ne khabar di kaha ke mujh se Yahya bin Abi Kaseer ne byaan kiya , kaha ke mujh se Abu Salamah bin Abdur Rahman ne byaan kiya , kaha ke mujh se Abdullah bin Amr bin Aas razi Allahu anhuma ne byaan kiya , kaha ke Rasool Allah salla Allahu alaihi wasallam ne farmaya ae Abdullah! falan ki tarah na ho jana woh raat mein ibadat kiya karta tha phir chhor di . Aur Hisham bin Ammar ne kaha ke hum se Abdul Hamid bin Abil Ashrin ne byaan kiya , un se Imam Awzai ne byaan kiya , kaha ke mujh se Yahya ne byaan kiya , un se Amr bin Hakam bin Thauban ne byaan kiya , kaha ke mujh se Abu Salamah bin Abdur Rahman ne , isi tarah phir yehi hadees byaan ki , Ibn Abil Ashrin ki tarah Amr bin Abi Salamah ne bhi is ko Imam Awzai se riwayat kiya .

Hum se Ali bin Abdullah Madini ne byaan kiya, kaha ke hum se Sufyan bin Uyaynah ne byaan kiya, un se Amr bin Dinar ne , un se Abu al-Abbas Saib bin Farookh ne kaha mein ne Abdullah bin Amr bin Aas razi Allahu anhuma se suna, unhon ne kaha ke mujh se Nabi Karim salla Allahu alaihi wasallam ne poocha ke kya yeh khabar sahih hai ke tum raat bhar ibadat karte ho aur phir din mein roze rakhte ho? Main ne kaha ke jee han , ya Rasool Allah! mein aisa hi karta hoon . Aap salla Allahu alaihi wasallam ne farmaya ke lekin agar tum aisa karo ge to tumhari aankhein (bedari ki wajah se) baith jayein gi aur teri jaan natawan ho jaye gi . Yeh jaan lo ke tum par tumhare nafs ka bhi haq hai aur biwi bachon ka bhi . Is liye kabhi roza bhi rakho aur kabhi bila roze ke bhi raho , ibadat bhi karo aur so-o bhi .