Hum se Abdullah bin Yusuf Tanisi ne byaan kiya , unhon ne kaha ke hum se Imam Malik ne Ibn Shihab Zuhri se byaan kiya , un se Urwah ne , un se Aisha razi Allahu anha ne farmaya ke Rasool Allah salla Allahu alaihi wasallam ek kaam ko chhor dete aur Aap salla Allahu alaihi wasallam ko us ka karna pasand hota . Is khayal se tark kar dete ke doosre sahaba bhi is par (Aap ko dekh kar) amal shuru kar dein aur is tarah woh kaam un par farz ho jaye . Chunanche Rasool Allah salla Allahu alaihi wasallam ne chasht ki namaaz kabhi nahin parhi lekin main parhti hoon .

Hum se Abdullah bin Yusuf Tanisi ne byaan kiya , unhon ne kaha ke humein Imam Malik rahimahullah ne khabar di , unhein Ibn Shihab Zuhri ne , unhein Urwah bin Zubayr ne , unhein Umm al-Mumineen Aisha razi Allahu anha ne ke Rasool Allah salla Allahu alaihi wasallam ne ek raat masjid mein namaaz parhi . Sahaba ne bhi Aap salla Allahu alaihi wasallam ke saath yeh namaaz parhi . Doosri raat bhi Aap salla Allahu alaihi wasallam ne yeh namaaz parhi to namaziyon ki tadaad bohat barh gayi teesri ya chauthi raat to poora ijtima hi ho gaya tha . Lekin Nabi Karim salla Allahu alaihi wasallam is raat namaaz parhane tashreef nahin laaye . Subah ke waqt Aap salla Allahu alaihi wasallam ne farmaya ke tum log jitni bari tadaad mein jama ho gaye thay . Main ne ise dekha lekin mujhe bahar aane se yeh khayal manay raha ke kahin tum par yeh namaaz farz na ho jaye . Yeh Ramazan ka waqia tha .

Aur Aisha razi Allahu anha ne farmaya ke Aap ke paon phat jaate thay . «futoor» ke maani Arabi zaban mein phatna aur Quran Sharif mein lafz «infatarat» isi se hai yani jab aasman phat jaye .

Hum se Abu Naeem ne byaan kiya , kaha ke hum se Misar ne byaan kiya , un se Ziyad bin Ilaqah ne , unhon ne byaan kiya ke mein ne Mughirah bin Shubah razi Allahu anhu ko yeh kehte suna ke Nabi Karim salla Allahu alaihi wasallam itni der tak kharay ho kar namaaz parhte rahte ke Aap salla Allahu alaihi wasallam ke qadam ya (yeh kaha ke) pindliyon par waram aa jata , jab Aap salla Allahu alaihi wasallam se is ke mutaliq kuch arz kiya jata to farmate ”kya main Allah ka shukr guzar banda na banoon“ .

Hum se Ali bin Abdullah ne byaan kiya , kaha ke hum se Sufyan bin Uyaynah ne byaan kiya , kaha ke hum se Amr bin Dinar ne byaan kiya ke Amr bin Aws ne unhein khabar di aur unhein Abdullah bin Amr bin Al-Aas razi Allahu anhuma ne khabar di ke Rasool Allah salla Allahu alaihi wasallam ne un se farmaya ke sab namazon mein Allah Ta'ala ke nazdeek pasandida namaaz Daud alaihis salam ki namaaz hai aur rozon mein bhi Daud alaihis salam hi ka roza . Aap aadhi raat tak sote , is ke baad tihayi raat namaaz parhne mein guzarte . Phir raat ke chhattay hisse mein bhi so jaate . Isi tarah Aap ek din roza rakhte aur ek din iftar karte thay .

Hum se Abdan ne byaan kiya , kaha ke mujhe mere baap Uthman bin Jabilah ne Shubah se khabar di , unhein Ashath ne . Ashath ne kaha ke mein ne apne baap (Sulaym bin Aswad) se suna aur mere baap ne Masrooq se suna , unhon ne byaan kiya ke mein ne Aisha razi Allahu anha se poocha ke Nabi Karim salla Allahu alaihi wasallam ko kaun sa amal zyada pasand tha ? Aap ne jawab diya ke jis par hameshaigi ki jaye (khwah woh koi bhi nek kaam ho) mein ne daryaft kiya ke Aap (raat mein namaaz ke liye) kab kharay hote thay ? Aap ne farmaya ke jab murgh ki awaaz sunte . Hum se Muhammad bin Salam ne byaan kiya , kaha ke humein Abul Ahwas Salam bin Sulaym ne khabar di , un se Ashath ne byaan kiya ke murgh ki awaaz sunte hi Aap kharay ho jaate aur namaaz parhte .

Hum se Musa bin Ismail ne byaan kiya , kaha ke hum se Ibrahim bin Saad ne byaan kiya , kaha ke mere baap Saad bin Ibrahim ne apne chacha Abu Salamah se byaan kiya ke Aisha Siddiqa razi Allahu anha ne batlaya ke unhon ne apne yahan sahar ke waqt Rasool Allah salla Allahu alaihi wasallam ko hamesha letay huay paya .

Hum se Yaqub bin Ibrahim ne byaan kiya , kaha ke hum se Rawh bin Ubadah ne byaan kiya , kaha ke hum se Saeed bin Abi Arubah ne byaan kiya , un se Qatadah ne , un se Anas bin Malik razi Allahu anhu ne ke Nabi Karim salla Allahu alaihi wasallam aur Zayd bin Thabit razi Allahu anhu donon ne mil kar sahari khayi , sahari se farigh ho kar Aap salla Allahu alaihi wasallam namaaz ke liye kharay ho gaye aur donon ne namaaz parhi . Hum ne Anas razi Allahu anhu se poocha ke sahari se faraghat aur namaaz shuru karne ke darmiyan kitna fasla raha ho ga ? Aap ne jawab diya ke itni der mein ek aadmi pachaas aayatein parh sakta hai .

Hum se Sulayman bin Harb ne byaan kiya , kaha ke hum se Shubah ne Amash se byaan kiya , un se Abu Wail ne aur un se Abdullah bin Masood razi Allahu anhu ne farmaya ke mein ne Rasool Allah salla Allahu alaihi wasallam ke saath ek martaba raat ko namaaz parhi . Aap salla Allahu alaihi wasallam ne itna lamba qiyam kiya ke mere dil mein ek ghalat khayal paida ho gaya . Hum ne poocha ke woh ghalat khayal kya tha to Aap ne bataya ke mein ne socha ke baith jaoon aur Nabi Karim salla Allahu alaihi wasallam ka saath chhor doon .

Hum se Hafs bin Umar ne byaan kiya , kaha ke hum se Khalid bin Abdullah ne byaan kiya , un se Husayn bin Abdur Rahman ne un se Abu Wail ne aur un se Hudhayfah razi Allahu anhu ne ke Nabi Karim salla Allahu alaihi wasallam jab raat ko tahajjud ke liye kharay hote to pehle apna munh miswak se khoob saaf karte .