Hum se Muhammed bin Ubaidullah ne yeh Hadees bayan ki, un se Ibrahim bin Sa’d ne, woh Saleh se riwayat karte hain, woh Ibn-e-Shihaab se, woh Abu Umamah bin Sahl bin Hunaif se rawi hain, woh Abu Sa’eed Khudri Radhiallahu Anhu se, woh kehte the ke Rasoolulllah Sallallahu Alaihi Wasallam ne farmaaya ke main ek waqt so raha tha, main ne khawaab main dekha ke log mere saamne pesh kiye jaa rahe hain aur woh kurte pehne huwe hain. Kisi ka kurta seene tak hai aur kisi ka us se neecha hai. (Phir) mere saamne Umar bin Khattab laaye gaye. un (ke badan) par (jo) kurta tha. Use woh ghaseet rahe the. (Yani un ka kurta zameen tak neecha tha) sahaba ne poocha ke ya RasoolAllah! Is ki kya ta’beer hai? Aap Sallallahu Alaihi Wasallam ne farmaaya ke (is se) deen muraad hai.

Abdullah bin Yousuf ne hum se bayan kiya, woh kehte hain ke hamein Maalik bin Anas ne Ibn-e-Shihaab se khabar di, woh Saalim bin Abdullah se naql karte hain, woh apne baap (Abdullah bin Umar Radhiallahu Anhuma) se ke ek dafa Rasoolulllah Sallallahu Alaihi Wasallam ek ansaari shakhs ke paas se guzre is haal mein ke woh apne ek bhai se keh rahe the ke tum itni sharm kiun karte ho. Aap Sallallahu Alaihi Wasallam ne us ansaari se farmaaya ke is ko is ke haal par rahne do kiunki haya bhi imaan hi ka ek hissah hai.

Is Hadees ko hum se Abdullah bin Muhammed Musnadi ne bayan kiya, un se Abu Rauh Harami bin Umaarah ne, un se Sho’bah ne, woh Waaqid bin Muhammed se riwayat karte hain, woh kehte hain main ne yeh Hadees apne baap se suni, woh Ibn-e-Umar Radhiallahu Anhuma se riwayat karte hain ke Rasoolulllah Sallallahu Alaihi Wasallam ne farmaaya, mujhe (Allah ki taraf se) hukm diya gaya hai ke logon se jung karun us waqt tak ke woh is baat ka iqraar kar len ke Allah ke siwa koi ma’bood nahi hai aur yeh ke Muhammed Sallallahu Alaihi Wasallam Allah ke sachche Rasool hain aur namaz ada karne lagen aur zakaat den, jis waqt woh yeh karne lagenge to mujh se apne jaan-o-maal ko mehfooz kar lenge, siwaaye Islam ke haq ke. (raha un ke dil ka haal to) un ka hisaab Allah ke zimme hai.

Kiunki Allah Ta’ala ka irshaad hai «وَتِلْكَ الْجَنَّةُ الَّتِي أُورِثْتُمُوهَا بِمَا كُنْتُمْ تَعْمَلُونَ» “Aur yeh jannat hai apne amal ke badle mein tum jis ke Maalik huwe ho.”Aur bahut se ahl-e-ilm Hazraat irshaad-e-Baari Ta’ala «فَوَرَبِّكَ لَنَسْأَلَنَّهُمْ أَجْمَعِينَ عَمَّا كَانُوا يَعْمَلُونَ» (Aakhir tak) ki tafseer mein kehte hain ke yahan amal se muraad «لاَ إِلَهَ إِلاَّ اللَّهُ» kehna hai aur Allah Ta’ala ne farmaaya hai ke“Amal karne waalon ko isi jaisa amal karna chahiye.”

Hum se Ahmad bin Younus aur Musa bin Ismail dono ne bayan kiya, unhon ne kaha hum se Ibrahim bin Sa’d ne bayan kiya, unhon ne kaha hum se Ibn-e-Shihaab ne bayan kiya, woh Sa’eed bin Al-Musayyab se riwayat karte hain, woh Abu Hurairah Radhiallahu Anhu se ke Rasoolulllah Sallallahu Alaihi Wasallam se daryaaft kiya gaya ke kaun sa amal sab se afzal hai? Aap Sallallahu Alaihi Wasallam ne farmaaya“Allah aur us ke Rasool par imaan laana”kaha gaya us ke baad kaun sa? Aap Sallallahu Alaihi Wasallam ne farmaaya ke“Allah ki raah mein jihaad karna”kaha gaya, phir kya hai? Aap Sallallahu Alaihi Wasallam ne farmaaya“Hajj-e-Mabroor”.

Jaisa ke irshaad-e-baari Ta’ala hai. Jab dihaatiyon ne kaha ke hum imaan le aaye Aap keh dijiye ke tum imaan nahi laaye balke yeh kaho ke zahir taur par musalmaan ho gaye. Lekin agar imaan haqeeqatan haasil ho to woh Allah Tabaraka wa Ta’ala ke irshaad (be-shak deen Allah ke nazdeek sirf Islam hi hai) ka misdaaq hai. Aayaat-e-shareefah mein lafz «Imaan» aur «Islam» ek hi ma’ne mein istemaal kiya gaya hai.

Hum se Abul Yamaan ne bayan kiya, woh kehte hain ke hamein Sho’aib ne Zohri se khabar di, unhein Amir bin Sa’d bin Abi Waqqas ne apne waalid Sa’d Radhiallahu Anhu se sun kar yeh khabar di ke Rasoolulllah Sallallahu Alaihi Wasallam ne chand logon ko kuch atiyah diya aur Sa’d wahaan maujood the. (Woh kehte hain ke) Rasoolulllah Sallallahu Alaihi Wasallam ne un mein se ek shakhs ko kuch na diya. Haalaanke woh un mein mujhe sab se ziyada pasand tha. Main ne kaha: Ya RasoolAllah! Aap ne falaan ko kuch na diya haalaanke main use momin gumaan karta hun. Aap Sallallahu Alaihi Wasallam ne farmaaya momin ya musalmaan? Main thodi der chup reh kar phir pehli baat dohraane laga. Nabi Kareem Sallallahu Alaihi Wasallam ne bhi dobarah wahi jawaab diya. Phir Aap Sallallahu Alaihi Wasallam ne farmaaya ke aye Sa’d! Bawjood yeh ke ek shakhs mujhe ziyada azeez hai (phir bhi main use nazarandaaz kar ke) kisi aur doosre ko is khauf ki wajah se yeh maal de deta hun ke (woh apni kamzoori ki wajah se Islam se phir jaaye aur) Allah use aag mein ondha daal de. Is Hadees ko Younus, Saleh, Ma’mar aur Zohri ke bhateeje Abdullah ne Zohri se riwayat kiya.

‏‏‏Ammar ne kaha ke jis ne teen cheezon ko jama kar liya us ne saara imaan haasil kar liya. Apne nafs se insaaf karna, salaam ko aalam mein phailaana aur tangdasti ke bawjood Allah ki raah mein kharch karna.

Hum se Qutaibab ne bayan kiya, unhon ne kaha hum se Laith ne bayan kiya, unhon ne Yazeed bin Abi Habib se, unhon ne Abul Khair se, unhon ne Abdullah bin Amr Radhiallahu Anhuma se ke ek aadmi ne Rasoolulllah Sallallahu Alaihi Wasallam se poocha kaun sa Islam behtar hai? Aap Sallallahu Alaihi Wasallam ne farmaaya ke tu khaana khilaye aur har shakhs ko salaam kare khwaah us ko tu jaanta ho ya na jaanta ho.

Is baare mein woh Hadees jise Abu Sa’eed Khudri Radhiallahu Anhu ne Nabi Kareem Sallallahu Alaihi Wasallam se riwayat kiya hai.