Hum se Abul Yamaan ne Hadees bayan ki, un ko Sho’aib ne, un ko Abuz Zinaad ne A’raj se, unhon ne Abu Hurairah Radhiallahu Anhu se naql ki ke be-shak Rasoolulllah Sallallahu Alaihi Wasallam ne farmaaya, qasam hai us zaat ki jis ke haath mein meri jaan hai. Tum mein se koi bhi imaandaar na hoga jab tak main us ke waalid aur aulaad se bhi ziyada us ka mehboob na ban jaaon.

Hamein Hadees bayan ki Ya’qoob bin Ibrahim ne, un ko Ibn-e-Ulayyah ne, woh Abdul Aziz bin Suhaib se riwayat karte hain, woh Anas Radhiallahu Anhu se woh Nabi Kareem Sallallahu Alaihi Wasallam se naql karte hain aur hum ko Adam bin Abi Iyaas ne Hadees bayan ki, un ko Sho’bah ne, woh Qatadah se naql karte hain, woh Anas Radhiallahu Anhu se ke Nabi kareem Sallallahu Alaihi Wasallam ne farmaaya tum mein se koi shakhs imaandaar na hoga jab tak us ke waalid aur us ki aulaad aur tamaam logon se ziyada us ke dil mein meri mohabbat na ho jaaye.

Hamein Muhammed bin Musanna ne yeh Hadees bayan ki, un ko Abdul Wahhaab Saqafi ne, un ko Ayyub ne, woh Abu Qilaabah se riwayat karte hain, woh Anas Radhiallahu Anhu se naaqil hain woh Nabi Kareem Sallallahu Alaihi Wasallam se Aap Sallallahu Alaihi Wasallam ne farmaaya teen khaslatein aisi hain ke jis mein yeh paida ho jaayein us ne Imaan ki mithaas ko paa liya. Awwal yeh ke Allah aur us ka Rasool us ke nazdeek sab se ziyada mehboob ban jaayein, doosre yeh ke woh kisi insaan se mahez Allah ki raza ke liye mohabbat rakhe. Teesre yeh ke woh kufr mein waapas lautne ko aisa bura jaane jaisa ke aag mein daale jaane ko bura jaanta hai.

Hum se is Hadees ko Abul Waleed ne bayan kiya, un se Sho’bah ne, unhein Abdullah bin Abdullah bin Jabr ne khabar di, woh kehte hain ke hum ne Anas bin Malik Radhiallahu Anhu se is ko suna, woh Rasoolulllah Sallallahu Alaihi Wasallam se riwayat karte hain ke Aap Sallallahu Alaihi Wasallam ne farmaaya ansaar se mohabbat rakhna imaan ki nishaani hai aur ansaar se keena rakhna nifaaq ki nishaani hai.

Hum se is Hadees ko Abul Yamaan ne bayan kiya, un ko Sho’aib ne khabar di, woh Zohri se naql karte hain, unhein Abu Idrees Aa ne khabar di ke Ubadah bin Saamit Radhiallahu Anhu jo Badr ki ladaayi mein shareek the aur Lailat-ul-Aqabah ke (baarah) naqeebon mein se the. Farmaate hain ke Rasoolulllah Sallallahu Alaihi Wasallam ne us waqt jab Aap ke gird sahaba ki ek jamaat baithi hue thi farmaaya ke mujh se Bai’at karo is baat par ke Allah ke saath kisi ko shareek na karoge, chori na karoge, zina na karoge, apni aulaad ko qatl na karoge aur na amdan kisi par koi naahaqq bohtaan baandhoge aur kisi bhi achchi baat mein (Allah ki) na-farmaani na karoge. Jo koi tum mein (is ahed ko) poora karega to us ka sawab Allah ke zimme hai aur jo koi in (buri baaton) mein se kisi ka irtikaab kare aur use duniya mein (Islaami qanoon ke tahat) saza de di gayi to yeh saza us ke (gunaahon ke) liye badla ho jaayegi aur jo koi in mein se kisi baat mein mubtala ho gaya aur Allah ne us ke (gunaah) ko chupa liya to phir us ka (mu’aamla) Allah ke hawaale hai, agar chaahe maaf kare aur agar chaahe saza de de. (Ubaadah kehte hain ke) phir hum sab ne in (sab baaton) par Aap Sallallahu Alaihi Wasallam se Bai’at kar li.

Hum se (is Hadees ko) Abdullah bin Maslamah ne bayan kiya, unhon ne ise Maalik Rahimahullah se naql kiya, unhon ne Abdur Rahman bin Abdullah bin Abi Sa’sa’ah se, unhon ne apne baap (Abdullah Rahimahullah) se, woh Abu Sa’eed Khudri se naql karte hain ke Rasoolulllah Sallallahu Alaihi Wasallam ne farmaaya woh waqt qareeb hai jab musalmaan ka (sab se) umdah maal (us ki bakriyaan hongi). Jin ke peeche woh pahaadon ki chotiyon aur barsaati waadiyon mein apne deen ko bachaane ke liye bhaag jaayega.

Aur is baat ka suboot ke «ma’rifat» dil ka fe’l hai. Is liye ke Allah Ta’ala ne farmaaya hai“lekin (Allah) girift karega us par jo tumhaare dilon ne kiya hoga.”

Yeh Hadees hum se Muhammed bin Salaam ne bayan ki, woh kehte hain ke unhein is ki Abdah ne khabar di, woh Hishaam se naql karte hain, Hishaam Aisha Radhiallahu Anha se woh farmaati hain ke Rasoolullah Sallallahu Alaihi Wasallam logon ko kisi kaam ka hukm dete to woh aisa hi kaam hota jis ke karne ki logon mein taaqat hoti (is par) Sahaba Radhiallahu Anhum ne arz kiya ke ya RasoolAllah! Hum log to aap jaise nahi hain (Aap to ma’soom hain) aur Aap ki Allah paak ne agli pichli sab laghzishen mu’aaf farmaa di hain. (is liye hamein apne se kuch ziyada ibadat karne ka hukm farmaaiye) (yeh sun kar) Aap Sallallahu Alaihi Wasallam naraaz huwe hatta ke khafagi Aap Sallallahu Alaihi Wasallam ke chehra-e-mubarak se zahir hone lagi. Phir farmaaya ke be-shak main tum sab se ziyada Allah se darta hun aur tum sab se ziyada use jaanta hun. (Pas tum mujh se badh kar ibadat nahi kar sakte).

Is Hadees ko hum se Sulaiman bin Harb ne bayan kiya, un se Sho’bah ne, woh Qatadah se riwayat karte hain, woh Anas Radhiallahu Anhu se, aur woh Nabi Kareem Sallallahu Alaihi Wasallam se naql karte hain ke Aap Sallallahu Alaihi Wasallam ne farmaaya, jis shakhs mein yeh teen baatein hongi woh imaan ka mazah paa lega, ek yeh ke woh shakhs jise Allah aur us ka Rasool un ke ma-siwa se ziyada Azeez hun aur doosre yeh ke jo kisi bande se mahez Allah hi ke liye mohabbat kare aur teesri baat yeh ke jise Allah ne kufr se najaat di ho, phir dobarah kufr ikhtiyaar karne ko woh aisa bura samjhe jaisa aag mein gir jaane ko bura jaanta hai.

Hum se Ismail ne yeh Hadees bayan ki, woh kehte hain un se Maalik ne, woh Amr bin Yahya Al-Maazini se naql karte hain, woh apne baap se riwayat karte hain aur woh Abu Sa’eed Khudri Radhiallahu Anhu aur woh Nabi Akram Sallallahu Alaihi Wasallam se naql karte hain ke Aap Sallallahu Alaihi Wasallam ne farmaaya jab jannati jannat mein aur dozakhi dozakh mein daakhil ho jaayenge. Allah paak farmaayega, jis ke dil mein raayi ke daane ke barabar (bhi) imaan ho, us ko bhi dozakh se nikaal lo. Tab (aise log) dozakh se nikaal liye jaayenge aur woh jal kar koile ki tarah siyaah ho chuke honge. Phir zindagi ki nehar mein ya baarish ke paani mein daale jaayenge. (Yahan rawi ko shak ho gaya hai ke upar ke rawi ne kaun sa lafz istemaal kiya) us waqt woh daane ki tarah ug aayenge jis tarah nadi ke kinaare daane ug aate hain. Kya tum ne nahi dekha ke daana zardi maail pech-dar-pech nikalta hai. Wuhaib ne kaha ke hum se Amr ne ( «‏‏‏‏حياء» ki bajaaye) «حياة» , aur ( «خَرْدَلٍ مِنْ إِيمَانٍ») ki bajaaye ( «خَرْدَلٍ مِنْ خَيْرٍ») ka lafz bayan kiya.