Hum se Abdaan ne byaan kiya , unhon ne kaha ke hamein Abdullah bin Mubarak ne khabar di unhon ne kaha ke hamein Ibn Abi Zayb ne khabar di , unhein Saeed Maqbari ne , unhein un ke baap Abu Saeed ne , unhein Abdullah bin Wadiah ne , unhein Salman Farsi razi Allahu anhu ne ke Rasool Allah salla Allahu alaihi wasallam ne farmaya jis ne juma ke din ghusl kiya aur khoob paaki haasil ki aur tail ya khushbu istemal ki , phir juma ke liye chala aur do aadmiyon ke beech mein na ghusa aur jitni us ki qismat mein thi , namaaz parhi , phir jab Imam bahar aaya aur khutbah shuroo kiya to khamosh ho gaya , us ke is juma se doosre juma tak ke tamam gunah bakhsh diye jayen ge .

Hum se Muhammad bin Salam Baykandi rahmahu Allah ne byaan kiya , kaha ke hamein Mukhallad bin Yazid ne khabar di , kaha ke hamein Ibn Jurayj ne khabar di , kaha ke main ne Nafi se suna , unhon ne kaha main ne Abdullah bin Umar se suna , unhon ne kaha ke Nabi Karim salla Allahu alaihi wasallam ne is se mana farmaya hai ke koi shakhs apne musalman bhai ko utha kar us ki jagah khud baith jaye . Main ne Nafi se poocha ke kya yeh juma ke liye hai to unhon ne jawab diya ke juma aur ghair juma sab ke liye yahi hukm hai .

Hum se Aadam ne byaan kiya , unhon ne kaha ke hum se Ibn Abi Zayb ne Zuhri ke waaste se byaan kiya , un se Saib bin Yazid ne ke Nabi Karim salla Allahu alaihi wasallam aur Abu Bakr aur Umar razi Allahu anhuma ke zamane mein juma ki pehli azaan us waqt di jati thi jab Imam minbar par khutbah ke liye baithte lekin Usman razi Allahu anhu ke zamana mein jab musalmanon ki kasrat ho gayi to woh maqam Zawra se aik aur azaan dilwane lage . Abu Abdullah (Imam Bukhari rahmahu Allah) farmate hain ke Zawra Madinah ke bazaar mein aik jagah hai .

Hum se Abu Naeem Fadl bin Dukayn ne byaan kiya , unhon ne kaha ke hum se Abdul Aziz bin Abu Salamah Maajshoon ne byaan kiya , unhon ne kaha hum se Zuhri ne byaan kiya , un se Saib bin Yazid ne ke juma mein teesri azaan Usman bin Affan razi Allahu anhu ne barhayi jabke Madinah mein log zyada ho gaye thay jabke Nabi Karim salla Allahu alaihi wasallam ke aik hi muazzin thay . (Aap salla Allahu alaihi wasallam ke daur mein) juma ki azaan us waqt di jati jab Imam minbar par baithta .

Hum se Muhammad bin Muqatil ne byaan kiya , unhon ne kaha ke hamein Abdullah bin Mubarak ne khabar di , unhon ne kaha ke hamein Abu Bakr bin Usman bin Sahl bin Hanif ne khabar di , unhein Abu Umamah bin Sahl bin Hanif ne , unhon ne kaha main ne Muawiyah bin Abi Sufyan razi Allahu anhuma ko dekha aap minbar par baithe , muazzin ne azaan di «Allahu Akbar Allahu Akbar» Muawiyah razi Allahu anhu ne jawab diya «Allahu Akbar Allahu Akbar» muazzin ne kaha «Ashhadu alla ilaha illallah» Muawiyah ne jawab diya «wa ana» aur main bhi tawheed ki gawahi deta hoon muazzin ne kaha «Ashhadu anna Muhammadan Rasoolullah» Muawiyah ne jawab diya «wa ana» aur main bhi Muhammad salla Allahu alaihi wasallam ki risalat ki gawahi deta hoon jab muazzin azaan keh chuka to aap ne kaha hazireen! main ne Rasool Allah salla Allahu alaihi wasallam se suna isi jagah yani minbar par aap baithe thay muazzin ne azaan di to aap yahi farma rahe thay jo tum ne mujh ko kehte suna .

Hum se Yahya bin Bukayr ne byaan kiya , unhon ne kaha ke hum se Layth bin Saad ne Aqeel ke waaste se byaan kiya , un se Ibn Shihab ne ke Saib bin Yazid ne unhein khabar di ke juma ki doosri azaan ka hukm Usman bin Affan razi Allahu anhu ne us waqt diya jab namazi bahut zyada ho gaye thay aur juma ke din azaan us waqt hoti jab Imam minbar par baitha karta tha .

Hum se Muhammad bin Muqatil ne byaan kiya unhon ne kaha ke hamein Abdullah bin Mubarak ne khabar di , unhon ne kaha ke hum ko Yunus bin Yazid ne Zuhri se khabar di , unhon ne kaha ke main ne Saib bin Yazid razi Allahu anhu se yeh suna tha ke juma ki pehli azaan Rasool Allah salla Allahu alaihi wasallam aur Abu Bakr aur Umar razi Allahu anhuma ke zamane mein us waqt di jati thi jab Imam minbar par baithta . Jab Usman bin Affan razi Allahu anhu ka daur aaya aur namaziyon ki tadaad barh gayi to aap ne juma ke din aik teesri azaan ka hukm diya , yeh azaan maqam Zawra par di gayi aur baad mein yahi dastoor qaim raha .

Aur Anas razi Allahu anhu ne kaha ke Nabi Karim salla Allahu alaihi wasallam ne minbar par khutbah parha .

Hum se Qutaybah bin Saeed ne byaan kiya , unhon ne kaha ke hum se Yaqub bin Abdur Rahman bin Muhammad bin Abdullah bin Abdul Qaari Qurashi Askandarani ne byaan kiya , unhon ne kaha ke hum se Abu Hazim bin Dinar ne byaan kiya ke kuch log Sahl bin Saad Sa'idi razi Allahu anhu ke paas aaye . Un ka aapas mein is par ikhtilaf tha ke minbar e Nabwi ala sahibihas salatu wassalam ki lakri kis darakht ki thi . Is liye Saad razi Allahu anhu se is ke mutalleq daryaft kiya gaya aap ne farmaya Allah gawah hai main jaanta hoon ke minbar e Nabwi kis lakri ka tha . Pehle din jab woh rakha gaya aur sab se pehle jab is par Rasool Allah salla Allahu alaihi wasallam baithe to main is ko bhi jaanta hoon . Rasool Allah salla Allahu alaihi wasallam ne Ansar ki falan aurat ke paas jin ka Saad razi Allahu anhu ne naam bhi bataya tha . Aadmi bheja ke woh apne barhayi ghulam se mere liye lakri jor dene ke liye kahein . Taake jab mujhe logon se kuch kehna ho to is par baitha karoon chunanche unhon ne apne ghulam se kaha aur woh Ghabah ke jhao ki lakri se ise bana kar laya . Ansari khatoon ne ise Rasool Allah salla Allahu alaihi wasallam ki khidmat mein bhej diya . Nabi Karim salla Allahu alaihi wasallam ne ise yahan rakhwaya main ne dekha ke Rasool Allah salla Allahu alaihi wasallam ne isi par (kharay ho kar) namaaz parhayi . Isi par kharay kharay takbeer kahi . Isi par ruku kiya . Phir ulte paon laute aur minbar ki jar mein sajda kiya aur phir dobara isi tarah kiya jab aap namaaz se farigh hue to logon ko khitab farmaya . Logo! main ne yeh is liye kiya ke tum meri pairwi karo aur meri tarah namaaz parhni seekh lo .

Hum se Saeed bin Abi Maryam ne byaan kiya , kaha ke hum se Muhammad bin Jafar bin Abi Kaseer ne byaan kiya , kaha ke mujhe Yahya bin Saeed ne khabar di , kaha ke mujhe Hafs bin Abdullah bin Anas ne khabar di , unhon ne Jabir bin Abdullah razi Allahu anhuma se suna ke aik khajoor ka tana tha jis par Nabi Karim salla Allahu alaihi wasallam taik laga kar kharay hua karte thay . Jab Aap salla Allahu alaihi wasallam ke liye minbar ban gaya (Aap salla Allahu alaihi wasallam ne is tane par taik nahi lagaya) to hum ne is se rone ki aawaz suni jaise das mahine ki gabhan oontni aawaz karti hai . Nabi Karim salla Allahu alaihi wasallam ne minbar se utar kar apna haath is par rakkha (tab woh aawaz mauqoof hui) aur Sulayman ne Yahya se yun hadees byaan ki ke mujhe Hafs bin Ubaidullah bin Anas ne khabar di aur unhon ne Jabir se suna .