Hum se Musa bin Ismail ne byaan kiya , unhon ne kaha ke hum se Jareer bin Hazim ne byaan kiya , unhon ne kaha ke hum se Abu Rajaa Imran bin Tamim ne Samurah bin Jundab razi Allahu anhu se naql kiya , unhon ne batlaya ke Nabi Karim salla Allahu alaihi wasallam jab namaaz (farz) parha chukte to hamari taraf munh karte .

Hum se Abdullah bin Maslamah Qanabi ne byaan kiya , unhon ne Imam Malik se byaan kiya , unhon ne Saleh bin Kaysan se byaan kiya , un se Ubaydullah bin Abdullah bin Utbah bin Masood ne byaan kiya , un se Zaid bin Khalid Juhani razi Allahu anhu ne byaan kiya , unhon ne byaan kiya ke Nabi Karim salla Allahu alaihi wasallam ne hamein Hudaybiyah mein subah ki namaaz parhayi aur raat ko barish ho chuki thi namaaz se farigh hone ke baad Aap salla Allahu alaihi wasallam ne logon ki taraf munh kiya aur farmaya maloom hai tumhare Rab ne kya farmaya hai . Logon ne kaha ke Allah aur us ke Rasool khoob jaante hain (Aap salla Allahu alaihi wasallam ne farmaya ke) tumhare Rab ka irshaad hai ke subah hui to mere kuch bande mujh par imaan laye . Aur kuch mere munkir huay jis ne kaha ke Allah ke fazl aur us ki rehmat se hamare liye barish hui to woh mera momin hai aur sitaron ka munkir aur jis ne kaha ke falan taare ke falani jagah par aane se barish hui woh mera munkir hai aur sitaron ka momin .

Hum se Abdullah bin Munir ne byaan kiya , unhon ne Yazid bin Haroon se suna , unhein Humayd Zayli ne khabar di , aur unhein Anas bin Malik razi Allahu anhu ne ke Rasool Allah salla Allahu alaihi wasallam ne ek raat (Isha ki) namaaz mein der farmayi taqreeban aadhi raat tak . Phir aakhir hijray se bahar tashreef laye aur namaaz ke baad hamari taraf munh kiya aur farmaya ke doosre log namaaz parh kar so chuke lekin tum log jab tak namaaz ka intizaar karte rahe goya ke namaaz mein rahe (yani tum ko namaaz ka sawab milta raha) .

Aur hum se Aadam bin Abi Iyaas ne kaha ke un se Shubah ne byaan kiya un se Ayyub Sakhtiyani ne un se Nafi ne , farmaya ke Abdullah bin Umar razi Allahu anhuma (nafl) usi jagah par parhte thay aur jis jagah farz parhte aur Qasim bin Muhammad bin Abi Bakr ne bhi isi tarah kiya hai aur Abu Hurayrah razi Allahu anhu se marfooan riwayat hai ke imam apni (farz parhne ki) jagah par nafl na parhe aur yeh sahi nahi .

Hum se Abul Waleedah Hisham bin Abdul Malik ne byaan kiya , unhon ne kaha ke hum se Ibrahim bin Saad ne byaan kiya unhon ne kaha ke hum se Zuhri ne Hind bint Haarith se byaan kiya un se Umm al-Momineen Umm Salamah razi Allahu anha ne byaan kiya ke Nabi Karim salla Allahu alaihi wasallam jab salam pherte to kuch der apni jagah par baithe rahte . Ibn Shihab ne kaha Allah behtar jaane hum to yeh samajhte hain ke yeh Aap is liye karte thay ke auraten pehle chal jayen .

Aur Abu Saeed bin Abi Maryam ne kaha ke hamein Nafi bin Yazid ne khabar di unhon ne kaha ke mujh se Jafar bin Rabiah ne byaan kiya ke Ibn Shihab Zuhri ne unhein likh bhi bheja ke mujh se Hind bint Haarith Firasiyyah ne byaan kiya aur un se Nabi Karim salla Allahu alaihi wasallam ki paak biwi Umm Salamah razi Allahu anha ne (Hind un ki sohbat mein rehti thi) unhon ne farmaya ke jab Nabi Karim salla Allahu alaihi wasallam salam pherte to auraten lot kar jane lagti aur Nabi Karim salla Allahu alaihi wasallam ke uthne se pehle apne gharon mein daakhil ho chuki hoti .

Aur Ibn Wahb ne Yunus ke wastay se byaan kiya , un se Ibn Shihab ne byaan kiya aur unhein Hind bint Haarith Firasiyyah ne khabar di aur Usman bin Umar ne kaha ke hamein Yunus ne Zuhri se khabar di unhon ne kaha ke mujh se Hind Qurashiyyah ne byaan kiya Muhammad bin Waleed Zubaydi ne kaha ke mujh ko Zuhri ne khabar di ke Hind bint Haarith Qurashiyyah ne unhein khabar di . Aur woh Bano Zuhrah ke haleef Mabad bin Miqdad ki biwi thi aur Nabi Karim salla Allahu alaihi wasallam ki azwaj mutahharaat ki khidmat mein haazir hua karti thi aur Shoaib ne Zuhri se is hadees ko riwayat kiya , unhon ne kaha ke mujh se Hind Qurashiyyah ne hadees byaan ki , aur Ibn Abi Ateeq ne Zuhri ke wastay se byaan kiya aur un se Hind Firasiyyah ne byaan kiya . Layth ne kaha ke mujh se Yahya bin Saeed ne byaan kiya , un se Ibn Shihab ne byaan kiya aur un se Quraish ki ek aurat ne Nabi Karim se riwayat kar ke byaan kiya .

Hum se Muhammad bin Ubaid ne byaan kiya , kaha ke hum se Isa bin Yunus ne Umar bin Saeed se yeh hadees byaan ki , unhon ne kaha ke mujhe Ibn Abi Mulaykah ne khabar di un se Uqbah bin Haarith razi Allahu anhu ne farmaya ke main ne Madinah mein Nabi Karim salla Allahu alaihi wasallam ki iqtida mein ek marteba Asr ki namaaz parhi . Salam pherne ke baad Aap salla Allahu alaihi wasallam jaldi se uth kharay huay aur safon ko cheerte huay Aap salla Allahu alaihi wasallam apni kisi biwi ke hijray mein gaye . Log Aap salla Allahu alaihi wasallam ki is tezi ki wajah se ghabra gaye . Phir jab Aap salla Allahu alaihi wasallam bahar tashreef laye aur jaldi ki wajah se logon ke taajjub ko mehsoos farmaya to farmaya ke hamare paas ek sone ka dala (taqseem karne se) bach gaya tha mujhe us mein dil laga rehna bura maloom hua , main ne us ke baant dene ka hukm de diya .

Aur Anas bin Malik razi Allahu anhu daayen aur bayen donon taraf murte thay . Aur agar koi daayen taraf khwah makhwah qasd kar ke murta to us par Aap itiraz karte thay .

Hum se Abul Waleed ne byaan kiya , unhon ne kaha ke hum se Shubah ne byaan kiya , unhon ne Sulayman se byaan kiya , un se Umarah bin Umayr ne , un se Aswad bin Yazid ne byaan kiya ke Abdullah bin Masood razi Allahu anhu ne farmaya ke koi shakhs apni namaaz mein se kuch bhi shaytan ka hissa na lagaye is tarah ke daayni taraf hi lotna apne liye zaroori qaraar de le . Main ne Nabi Karim salla Allahu alaihi wasallam ko aksar bayen taraf se lotte dekha .