Aur jab sardi ya barish ki raat ho to moazzin yun pukar de ke apne thikano mein namaz parh lo .

Hum se Muslim bin Ibrahim ne bayan kiya , kaha ke hum se Shoba ne Muhajir Abul Hasan se bayan kiya , unhon ne Zaid bin Wahb se , unhon ne Abu Dharr Ghifari raziyallahu anhu se , unhon ne kaha ke hum Nabi Karim salla Allahu alaihi wa sallam ke sath ek safar mein thay . Moazzin ne azan deni chahi to aap salla Allahu alaihi wa sallam ne farmaya thanda hone de . Phir moazzin ne azan deni chahi to aap salla Allahu alaihi wa sallam ne phir yahi farmaya ke thanda hone de . Yahan tak ke saya telon ke barabar ho gaya . Nabi Karim salla Allahu alaihi wa sallam ne farmaya ke garmi ki shadeed dozakh ki bhaap se paida hoti hai .

Hum se Muhammad bin Yusuf Faryabi ne bayan kiya , kaha ke hum se Sufyan Thauri ne Khalid Haza se , unhon ne Abu Qalaba Abdullah bin Zaid se , unhon ne Malik bin Huwairith se , unhon ne kaha ke do shakhs Nabi Karim salla Allahu alaihi wa sallam ki khidmat mein aaye yeh kisi safar mein jane wale thay . Aap salla Allahu alaihi wa sallam ne un se farmaya ke dekho jab tum safar mein niklo to namaz ke waqt raste mein azan dena phir iqamat kehna , phir jo shakhs tum mein umar mein bara ho namaz parhaye .

Hum se Muhammad bin Musanna ne bayan kiya , kaha ke humein Abdul Wahab ne khabar di , kaha ke humein Abu Ayyub Sakhtiyani ne Abu Qalaba se khabar di , unhon ne kaha ke hum se Malik bin Huwairith ne bayan kiya , kaha ke hum Nabi Karim salla Allahu alaihi wa sallam ki khidmat aqdas mein hazir hue . Hum sab hum umar aur naujawan hi thay . Aap salla Allahu alaihi wa sallam ki khidmat mubarak mein hamara bees din wa raat qiyam raha . Aap salla Allahu alaihi wa sallam bare hi reham dil aur milansar thay . Jab aap salla Allahu alaihi wa sallam ne dekha ke humein apne watan wapas jane ka shauq hai to aap salla Allahu alaihi wa sallam ne poocha ke tum log apne ghar kise chhor kar aaye ho . Hum ne bataya . Phir aap salla Allahu alaihi wa sallam ne farmaya ke achha ab tum apne ghar jao aur un ghar walon ke sath raho aur unhein bhi deen sikhao aur deen ki baton par amal karne ka hukm karo . Malik ne bohot si cheezon ka zikr kiya jin ke mutalliq Abu Ayyub ne kaha ke Abu Qalaba ne yun kaha woh batein mujh ko yaad hain ya yun kaha mujh ko yaad nahi . Aur Nabi Karim salla Allahu alaihi wa sallam ne farmaya ke isi tarah namaz parhna jaisay tum ne mujhe namaz parhte hue dekha hai aur jab namaz ka waqt aa jaye to koi ek azan de aur jo tum mein sab se bara ho woh namaz parhaye .

Hum se Musaddad bin Musarhad ne bayan kiya ke hum se Yahya bin Saeed Qattan ne Ubaidullah bin Umar Umri se bayan kiya , unhon ne kaha ke mujh se Nafi ne bayan kiya ke Abdullah bin Umar raziyallahu anhuma ne ek sard raat mein maqam Dajnan par azan di phir farmaya ala sallu fi ar-rihal ke logo! apne apne thikano mein namaz parh lo aur humein aap ne batlaya ke Nabi Karim salla Allahu alaihi wa sallam moazzin se azan ke liye farmate aur yeh bhi farmate ke moazzin azan ke baad keh de ke logo! apne thikano mein namaz parh lo . Yeh hukm safar ki halat mein ya sardi ya barsaat ki raton mein tha .

Hum se Ishaaq bin Mansoor ne byaan kiya , unhon ne kaha ke hamein Jafar bin Awn ne khabar di , unhon ne kaha ke ham se Abul Umays ne byaan kiya , unhon ne Awn bin Abi Hujayfah se Abu Hujayfah ke wastay se byaan kiya , kaha ke main ne Rasool Allah salla Allahu alayhi wasallam ko Abtah mein dekha ke Bilal haazir huay aur Aap salla Allahu alayhi wasallam ko namaaz ki khabar di phir Bilal razi Allahu anhu barchhi le kar aage barhe aur usay Aap salla Allahu alayhi wasallam ke saamne (bator sutrah) maqaam Abtah mein gaarh diya aur Aap salla Allahu alayhi wasallam ne (us ko sutrah bana kar) namaaz parhayi .